Roreltute rorel chhan

Kan Assembly House ah Minister-in vawkte tha chi, Rs. 98,000 man England atanga an chah luh tur thu a sawi a. Opposition MLA in a puitlin huna a man zat tur a rawn zawt veleh a, a chhanna chuan mi tamtak nuih a tiza zo ta a. Social media hrang hrangah he an zawhna leh chhanna hi fiamthu thawhnan an hmang ta luai luai a.

Ni e, vawkte 98,000 man chu a puitlin huna a hralhna tur man chu hriat a chakawm lah tak a. A sa lei a ei ngam pawh an awm manglo maithei. Hetih lai hian Vety Department chuan thuchhuah siamin vawkte hi a lakna atanga a lo kalna leh a enkawlna zawng zawng nen Rs 98,000 a nih tur thu leh, kum 1999 a Australia atanga an lo chahluh tawh aia a man a la tlawm zawk thu an la sawi ta dah a.

He thu rawn pulut tu mi­nister hian vawkte lei chhan leh he vawkte lei kan tangkai phahna tur hi hrechiang se chu he hmalakna tha tak hi nuihza siamnan kan hmang kan hmang lo tawp ang le. Vety doctor te ka zawh chian chuan anni chuan a puitlin hunah a chi kha kan la anga, artificial insemnination hmangin vawk chi tha zawk siam nan kan hmang thei anga, hei hian kan vawk vulh nasa takin a ti tha dawn niin an sawi a. Heti anih chuan he vawkte manto hi kan ram hmasawnna tur a ni tehmeuh mai.

Kan minister hian heng zawng zawng hi a hrelo a, department lamin an rawn duan ang ang assembly-ah a pulut mawl ve tawp a ang ta ber a. Opposition MLA zawh­naah khan heti zawng hian lo chhang ta se mipui te chuan kan ngaisang sawt ngei ang. Mahse kan Minister hian a department hnuaia hmalakna te hi a hriatpui thuk lemlo a ang a.Tin, department lam pawh hian aman rawn buaipui lo in a hmanna te kha rawn sawi tel se mipui te lung a dam ngei ang le, an in chhan ta sa sa.

He zawhna atanga ka rilru a lo awm ta ber mai chu, kan ram roreltu te hian ram hmasawnna aiin a pawisa ringawt hi an ngaihtuah ta emaw chu, ro an rel chhan te hi ram tih hmasawnna aiin pawisa hmanna leh neih dan ringawt hi a ni ta em ni tih a ni. Ram tana a thatna lam aiin a pawisa ngai zat kha an tuipui ta zawk a. A chahluhna a pawisa hman turah hian chan annei ve anga, a pawisa hmanna tur hrim hrim kha house a pass remtih kha an duhtawk mai a ang bawk. Diktak chuan Ui breed tha chi pawh nuai chuang sengin an chahlut duh a, Vawkte chi tha chi chahluh nan hian nuai chuang pawh hmang se mipui te chuan na kan ti lo tawp ang.

He vawkte tha kan lei duh chhan leh tum te pawh hrechianglo chuan vawkte hi chahlut ta tehreng pawh ni ila, engtin nge a tangkai thei ang bera hmang turin hma kan lak ang. Artificial Insemination ti tur leh a chi te kawl tha tur hian enge hmalak la ngai zel ang tih phei chu an la ngaihtuah thlenglo hial maithei. Kum 1999 a vawkte manto 120 chahluh ang mai hian, a chahluhna man chang hi a to anga. Kan ramin a thatphah na sawi tur hi a awmlo leh mai mai ang tih a hlauhawm hle mai.

Pawisa hi pawimawh viau mahse kan thu rel chhuah te hi ram tana a thatna lam aia a pawisa ringawt kan buaipui chuan ram hmasawnna a thleng har viau dawn.

Ram hmasawnna tur a nih chuan mipuite hian tax pek pawh hi kan hreh lo. Mahse ram hmasawnna siam tura ngaih­dan leh tumdan nei hmasa uk lo a, pawisa hmanna tur hriat em em mai hi sim a hun a, kan state hi state dang te awh thama siam turin pawisa aiin ram hmasawnna hi kan rorel chhan ber ni zawk turin ram roreltu zahawm tak te ka ngen ve che u a ni e.