Kan hauh ngam loh doctor

Hman deuh khan khaw pakhata doctor awm tura sorkarin a dah chu a awmna hmunah a kal duh tlat lo a, khawtlang hruaituten sorkara hma an lak lahin an doctor ber chuan chu khuaa awm ai chuan a hna aṭanga bân a duh zawk a ni, an ti mauh mai si a. Khatiang a nih kha chuan khawtlang hruaitute tan pawh thil tih a harsa ngawt ang. Hman ni lawk khan kan ṭhianpa pakhat nen kan inhmu a, Aizawla inentir tura kal a tum thu a min hrilh a. An khuaah damdawi in ṭha tak a awm a ni lawm ni tiin ka zawt a, an khuaah doctor an awm ṭha duh lo niin min chhang.

Heng doctor-te hian anmahni ma-mawh vetute tho khua-ah eng vangin nge hna an thawh duh loh tih ka ngaihtuah a, a chhan ni theia lang chu Aizawlah chuan clinic hawnin a hlawk a, anmahni pantu an tam. A dang lehah chuan private damdawi inah a thawh theih a, damdawi in pahnih pathumahte an thawk ṭhin an ti a, a hlawk viau a ni ngei ang. Tin, thingtlang ai chuan khawpui chu a lo nuam deuh zawk nghe nghe bawk.

Doctor zawng zawng hi an sual hauh lo a, mahse doctor duh-am deuh deuhṭhen-khat hi chu an awm ngei a nih hmel hle mai; sorkar lah hian a ngam lo nasa mai si a, tih  vak ngaihna a hre lo a nih hmel. Kan khuaa hmana doctor rawn awm pa kha sorkarin min sawnsak leh mai pawh kan ui teh a nia. A thiam si, pan a nuam si, mi retheite a hrethiam nasa mai si a, khatiang doctor kha Mizoram hian a mamawh a ni.

Sum leh pai hmuh duh leh hausak duhin lehkha kan zir ṭhin a, hna hrang hrang kan thawk a, hna kan thawh zingah pawh mipui leh mi retheitena kan ngaihhlut, anni tana hna pawimawh bik thawk hi chu an awm a, chung zingah chuan doctor-te hi khawpuia mite chauh ni lo, thingtlanga mite pawhina kan mamawh an ni. Doctor tam takin khawpuia sum tam zawk lakluh duh avanga awm an tum tlat mai hi chu tihngaihna a awm si lo a, thingtlang lam chu kan na tlawk tlawk mai a nih hi.

Doctor tam tak, an mawhphurhna hria, mi rethei leh thingtlang mi mawlte pawh ngaihsak em em an awm laiin, anmahni mamawh ve ngawih ngawihtute tho zinga pawisa a tlem zawk avanga awm duh tlat lo an awm ṭhin hi chu a vanduaithlak ngawt mai. Keini khua phei chuan Doctor hi kan hmuh phak ve mai mai loh avangin kan ngaisang hle a, Ph.D vanga doctor pawh kan natnaah chuan rawn mai kan duh thut thut tawh mai.

Doctor ṭha kan neih loh avangin kan damloh chang pawhin enkawltu ṭha kan nei lo a, neih thinglungkhawnga khawpui damdawi in kan han pan ve meuh chuan kan tlai lutuk tawh a lo ni ṭhin. Sum tam tak aia hmingṭhat thlang zawk doctor hi Zoram hian kan mamawh hnem hle a ni. Thingtlang mite hrisel lohna leh harsatna hre pha, Zoram hmangaih tak taktu doctor hi kan mamawh chu a ni.

- Lalkhumtira Hlawncheu