Chapchar Kut kan hman dan kha

Tun kum 2015 Chapchar Kut hman danah sawi leh selna a tam hle mai. Vanglaini lamah pawh ziaktu panga vel chuan MZI inhmuhkhawmna ang maia chhuah a ni a, free concert leh modern music nena concert chikhat kara Mizo hnam lam tel ve zeuh zeuh a nih ber thu leh, he Kut hi a la ṭawp tawlh tawlh an hlauh thute an rawn tarlang nasa a ni.

Ziaktu pakhat erawh chuan tlai lam hun reilote chhunga zaithiamte zai avanga modern musical concert a nih ngawt loh dan a rzawn ziak thung a. Lammual chhak lam tlanga ṭhu ṭhalai engemaw zat tihtak zeta “Hnehna chu Lalpa ta a ni” tia uar taka au an awm thu a rawn tarlang a.

He Chapchar Kut hmanna tur atana hnam lam zir, hnam lam la thiam ngai lote pawhin hnam lam an thiam phahna a nih thute pawh a tarlang bawk a ni.

Mizote hi sap Kristian Missionary-te enkawlna hnuaia hun rei tak lo awm tawh kan nih avangin kan hla thluk ngainat zawngte pawh hi lengzem, lenglawng leh gospel hla kan ṭawnga kan neihte hi sap hla thluk a ni deuh ber a. Lengzem leh lenglawng hla thlukah Mizo taka hla thluka hla siam kan nei ṭeuh a. Hetiang ang hla thluk tam tak kan neihte hi he niah hian sak tam pawlah awm thei se a duhawm khawp mai.

Assamese-ho khuan kut chi hnih - Bohag Bihu leh Rongali Bihu an nei.

Bihu Kut hi an hlut a, an nghakhlel em em bawk ṭhin. He an kutin a ken tel an ngaihsan em em chu an Bihu hla leh he kut nia an thuamhnaw inbelna leh an Bihu lam leh Mizotena kut sa kan lo tih ṭhin anga an hlut em em buh aṭanga siam chhang leh dhoi (curd) a ni.

Mizote pawh hian he Chapchar Kut niah hian kan hnam ziarang chi hrang hrangte hi a tam thei ang bera kan lantir kan tum tur a ni. Hnam lam chi hrang hrang kan neih zinga lam mawi tak leh hmuhnawm tak ‘Dar Lam’ hi he Chapchar Kut kan hmannaah hian pho­chhuaha a awm ka la hre meuh lo.

Dar Lam hi Sa­zep khua khian an thiam em em a, a hmuhnawmin chawi­nun tlak a ni. Thu­neituten ngaiven se.

Chapchar Kut hi hnam lam chi hrang hrang kan neihte lantir leh kan sawi tak Mizo hla thluk dik tak kan neihte hi Chapchar Kut niah hi chuan a tam thei ang ber tihlan ni tawh se.

Chutiang tur chuan nakkuma Chapchar Kut hmanna tura hman dan tur duan a nih dawnah heng ziaktu kan sawi tak­te - Lawmzuala Jau­cha, Khumtea Pu, Zozo, Lalmuanpuia, Ramropuia leh Mic­key Hlondo te hi Organising Commi­ttee-ten Chapchar Kut hman dan tur reltute zingah tel turin sawm se. Ngaihdan leh duh dan ṭha tak tak an nei ngei ang.