Facebook model-ah ṭang suh

Vanglaini chanchin­bua 'Mizo nula hmelṭha, mal man nei lo' tih ka lo hmuh khan ka ngaih­tuahna a kal thui hle. Kha article-a sawi ang khan Mizo hmeichhe hmelṭha tak tak, lum hlum atan pawha iai awm loh tak takte hi an tlawm luain ka hria a, ka khawngaih a ni.

Thil hlutna hi suma teh vek tur a ni hauh lo mai, mahse cheng khat pawh hlawh loa kan nula hmelṭha tak tak, khawi hmun hmunah emaw Facebook vela post atan ringawta phurh chhuah theih an ni hi chu pawi ka ti takzet a ni.

Aw nula, harh rawh, nakinah pasal neih duh hun i la nei ang, camera­man nazawngin eng tin tin emaw thla an lak sak vak vak nula i nih chuan mipa tam tak hian an iai ngei ang che. Tin, pasal in nei ang a, eng tin tin emaw, camera nei na zawngin, khawi hmun hmunah emaw thla an laksak che kha Facebook-ah hmuh tur a la awm reng dawn. In inneih hnuah i pasalin a hmuh leh hun a awm ngei dawn a, chutih hunah chuan in nupa hlim phahna atan in hman ka ring lo a, in nupa hlim loh phahna atan erawh chuan in hman zeuh zeuh ka ring.

Nang nula hmelṭha hei hi ka hrilh ang che...khawi khawiah emaw thla an laksak che Facebook-a a darh vak vak hian mi lehkhathiam chin chuan an ngaihsan phah hauh lo che ang a, an dah hniam zawk ngei ang che. Han inngaihtuah chiang teh, nalh taka duan i ni a, i mawina chu man nei loa Facebook-a post mai mai atana lak hi in ui ve lo em ni? I taksa nalh tak kha nakin hun atan lak i duh a nih pawhin, i ṭhian ṭhate lak tir la, FB-a dah loin dah ṭha hmak rawh.

Hei hi ka hrilh leh ang che, nula i thlalak khawi khawi emaw lak camera­man hoin an post chuai chuai a nih chuan mipa pangngai chuan veng khat nula fel i nih an ring lo nghal ngei ang. Nalh tih chu i hlawh mai thei, comment lamah pawh thu thlum tak tak a awm ṭeuh mai thei a ni. Mahse, hei hi hre rawh, i thlalak thu thlum tak taka comment-tute hian ngaihzawng atan chuan an duh maithei che a, nupui atan erawh chuan an iai ngei ang che.

Tu tute'n emaw i thla an lak avang khan i hlim a ni maithei, hlim hi a hlu alawm. Mahse, reilote hlimna hi nakin hnua in­chhirna min thlentu a ni theih tih hi hre fo rawh. Nakin hnua i inchhirna mai bakah hian, tun hunah ngei pawh hian mipa tam tak lakah i hniam phah a, i hmeichhe pui ngeite pawhin an ngaihnep phah ngei ang che.

Facebook vela mi hriat hlawh i nih hian i tan phurrit i insiam nghal tih pawh hi nang nula hmelṭha theihnghilh hauh suh. Mi hriat hlawh nia i in hriat tawh chuan incheina lamah ṭan i la nghal ngei ang, chu chuan in chhung­kaw tan phurrit a siam dawn. Hlawh nei loa cameraman hmaa i in post hmaa i lungawinaah khan i lungawi zo tawh dawn lo a, nalh loh hlau reng rengin hun i hmang ang a, nangmah leh nangmah rilru hahna khurah i in hnim lut dawn a ni. FB model i nih hmaa i tih duh ṭhin thil tam tak i ti zak tawh ang a, i thlen tur i thlen loh phah ngei ang.

Nu leh pate pawh ka ngen duh che u chu, in fanu hmelṭha tak takte kha Facebook-a post mai mai turin mipate thla lak tir mai mai phal suh u. Khawi khawiah emaw an hruai ang a, enge an tihzui in hre si lo. FB model nei fanu nei i nih chuan miin engtin nge an ngaih ang che? Nu leh pa ṭha takah an ngai chein ka ring lo a, miin an endan che a mak sawtin ka ring zawk.

Pasal ṭha tak nei turin i duat em em i fanu chu i duh ngei ang. Facebook model hi mipa pangngai takin an ngaisang lo tih hre mawlh ang che u. I fanu FB-a lar avang khan zuamtu a neih belh phah dawn tih theihnghilh suh. Tin, fanu FB model i neih chuan thawmhnaw manah in buai bakah, a tih dun ṭhin a ti zak tawh lo ang a, in chhungkaw tan phurrit a chang ngei ang.

I fanu chu kum lama a la naupan avangin a ngaih­tuahna a la thui lo a ni thei, nangni ngaihtuahna fim tawh zawkte hian dang ngam rawh u. In in chhir lo ang.