Chief Minister dâwt sawitirtu
Tun hnaiah chanchinbuahte leh social media-ah Assembly Speaker bangla cheng nuai 23.40 senga chei ṭhat thu leh Speaker motor tur cheng nuai 28 chuang (nuai 29 dawn) man lei thu a darh nasa a, sawi zui a hlawh hle. Kum chanve erh awrh lek chhunga Speaker tana sawrkar sum sen (bangla cheina leh motor thar leina atan chauh) hi cheng nuai 52 chuang a ni!
Kan Chief Minister khan CM atana lak luh a nih hnu lawk khan press conference a nei nghal a. Khatah khan ZPM sawrkarin CM leh minister-te tan motor thar lei an tum loh thu te, minister kal ta ten motor an hman lai chu a la ṭhat tawk thu te, bangla hrang hrangte an chei ṭhat dawn loh thute a sawi a nih kha. Tin, an sawrkar kum khatna chu Year of Consolidation atan an puan thute a sawi bawk.
CM-in a sawi ang takin CM leh Minister-te tan motor thar lei a ni lo va, mahse, Speaker motor tur erawh an lei bik ta tlat a. Speaker hian CM chu thu dik lo (dâwt) sawiah a rawn chhuah ta a ni. A zialo tak zet.
Speaker tana motor thar lei hi 'loh theih loh' a lo ni palh a, an lei a nih pawhin, an motor lei hi a to ka ti tak zet zet. State rethei kan nih thu an sawi châmchi a, Mizoram sawrkarin sum lama harsatna a tawh nasatzia kan sawrkar hotute'n an sawi fo bawk a. Chutih lai kara cheng nuai 28 chuang man motor lei hi kan state dinhmun nen a inhmeh lo lungrun!
Speaker banglaah hian kum 2022 October thla emaw ni khan thil pawimawhah ka kal ve a. Khatih lai khan kum 1 chuang hret lek hnua cheng tak tak senga chei ṭhat ngai tur khawpa tlabal emaw, lang mawi lo emaw a ni hauh lo tih ka chiang. Pawn lam lan danah a zahpuiawm loh a, in chhung lam rawngte leh furniture-te pawh a ṭha tawk a; Speaker chenna atan a la ṭha tawk fu tih hi ka hmuh dan a ni.
Mahse, tuna kan Speaker thar erawh chuan Speaker hmasain lungawi taka a luah lai reng kha chei ṭhat ṭul a ti ta tlat mai a. Speaker chhuak ta leh Speaker ni mek hi in leh a chhung bungruate chungchangah an induhtui hleih viau nge maw ni dawn ni?
Chief Minister, Speaker, Minister-te leh MLA-te chenna quarters-te zingah chei ṭhat chakawm tak tak a lo awm palh a ni thei a. Mahse, Year of Consolidation atana puan hun chhung kumah na nâ nâ hi chuan insûm a mawi ang. Year of Consolidation zawh hun nghah hram hram a ṭha e. A luahtu hmasate'n lungawi taka an luah reng a ni a, a luahtu hmasate an chhuah aṭanga kum chanve erh awrh chauh a liam a, chei ṭhat ṭul tih bik tlat hi zawng - a 'Mipui sawrkar zia lo' a, a 'Year of Consolidation zia lo' bawk a ni e.
ZPM sawrkara hotute u, in chet dan leh thil tih hmangin in hotupa ber CM dâwt sawitirtu in ni thei tih hria u la, fimkhur hle u la; CM dâwt sawitirtu ni lo hram ang che u.
- Lalrinchhana