KUM PUAN

Central Young Mizo Association chuan tun kum hi Ruihhlo Do kum atan an puang leh dawn a ni awm e. Kan hmuh leh kan hriat tawh angin, YMA berin ram pum huapa pheikhai rual taka an han chet meuh kha chuan, ruihhlo tawlh luh leh zawrh chu a rem vek titih a nih kha. Tunah erawh chuan khawtlang ngaihmawh thamin hengte hi an rawn inlar leh ta ni awm tak a ni.

Rule of law pawh pawisa hman bar loa a zuartu leh a ngawlveiho an han nawr tawm tak tak lai kha chuan, the hmeh an sawi ang maiin an bibo duak a nih kha. Kohhran leh Sorkar lah khan sum tam thamin an lo ṭanpui fo ṭhin bawk nen. A hah lah an hah, a sawt lah a sawt.

Ram leh hnam hmelmaho lah silawng fe fe an awm phah a ni awm e. ‘Supply reduction’ leh ‘demand reduction’ tih ang reng, tualchher strategy hmanga helnuai policy kan kenkawh vang khan, kum engemaw zat chhung chu ramin ṭhat pui mah se; chutiang renga chet kumkhua theih lah ni si lo. Hetiang helnuai policy hi a tlo tak tak thei lo a; ‘human rights’ lam aṭanga thlir lahin a dik thei mawlh bawk si lo. A reng thuah 21st Century hnuaiah chuan ‘Zawlbuk haw haw policy’ kha chu leklam reng fo chi a ni tawh lo, a ‘primitive’ em vangin. Hman ang rup rup khan CYMA hi a che dawn, ka tihna a ni hauh lo a, hman aia ṭhaa hmalak dan tur, an lo thul khung reng tawh pawh a ni maithei.

Rawtna mawl tak han siam ve dawn ila. Kan hriat ṭheuh angin, he ramah hian YMA tluka tlawmngai pawl lian dang, ram pum huapa inzar pharh, (Chakma area tih loah chuan) khaw tin tih theiha Branch nung leh mumal taka inrelbawl ṭhin nei an awm lo. Lai area lamah pawh sawn, an YLA te nen pawh inhriat thiamna thuk tak an nei awm e.

Hetianga social network phuisui tak nei ve, North East States dang zingah an awm ve lo. He kan vanneihna (advantage) hi kan hman thiam phawt chuan ‘social crime’ then faina hmanraw ṭha ber a ni phawt ang. Army hoin Guerilla Warfare strategy ṭha ber chu “fight like a guerilla” an tih ang deuha chet ve theihna remchang kan nei a ni.

Khawchhak (Myanmar) leh khaw­thlang (Bangladesh) aṭanga ruihhlo lo luh ṭhinna kawng (route) chu, ramri hnaih YMA Branch awmte hian an hre vek ang; chu loah pawh Narcotics Department te hian min hrilh thei ngei ang. Heng ruihhlote hi a ruk a rala tawlh luh an nih avangin a ruka ral bawka lo man dan kan thiam a ngai. Chu chu ‘covert operation’ hmanga lo chet ve a ṭul tihna a ni. Tichuan, drugs tawlh luhna route-in a pal tlang zawng zawnga awm YMA Branch-te hi ṭan lak dan thiamtir a ṭul a ni.

Narcotics Control Bureau (NCB) hian chutiang taka covert operation hmanga ṭanpui theitu pawl chu, an lo welcome lo thei lo. A chhan chu Mizoram hi International Drugs Trafficking route-in a pal tlang miau vangin kan sawi sual em lo ang chu. Haw hawa beih chi a nih loh avangin YMA Branch thlan chhuah bikte chuan, ‘val rual’ thlan bik engemaw zat nei ta sela; khawtlangin an hriat pui vek chi pawh a ni lem lo ang.

Chung val rual (hmanlai Lushai Scouts ang deuhin) te chu, NCB ten uluk takin surveillance equipment (wireless set, communication device dangte leh arms pawh, a ṭul chuan) thiam taka hman dan training pe ta sela.

State Excise & Narcotics Department hriatpuina leh thawhhona tel vek tur a ni ang a. YMA Branch thlan chhuahte hian tumruhna leh discipline nena kumtluana chet an inhuam a ngai thung ang. A ṭul dan angin NCB hian stipend pek pawh an hnial lo ta ve ang; chung val rualte chet fuh ṭum phei chuan, lawmman a nuai tel te pawh an pe duh fahmiang. Heng covert operatives-ho hi ‘NCB authorised law enforcing agents’ an nih dawn avangin, danin a phal china an chet chhung chuan, tu khawkha sawisel phak an ni lo ang.

India ramah hian ‘narcotic drugs smug­gling menace’ hi ‘normal law enforcing functionaries’ te ven sen rual a ni lo. Kan ramah na na na chuan YMA-te (a chunga kan rawtna zul zuiin) phungbawmna avangin kan thei ang tih a rin theih. Nge kan Narcotics Department hian hetiang idea te hi an lo nei tawh reng a, engemaw chhan vangin a taka hman theih lohah an ngai zawk?