Aizawl hi Mizoram a ni lo

Aizawl hi Mizoram khawpui ber a ni a, thu thiam takin Zofate Jerusalem tia a phuah pawh hi a phu thlawt. Amaherawhchu, hetih rual hian Aizawl khawpui hi Mizoram a ni lo a, engkim chunga rorel nan Aizawl khawpui kan hmang ringawt hi chu kan Mizoram dinhmun tur thlirin a ṭha ka ti thei lo a ni. Tun hnaia kan thu vuakthlak tehfunga Aizawl khawpui kan hmang nia ngaih, ṭha lo ka tih deuh deuhte chu.

Sikul ṭan hma

Tuna zirna kalpui kan tum dan zirna ṭan hma a, ban hma leh hi a thei fa leh khawpuia awm tam tak tan chuan a lo ṭha pawh a ni thei. A chhan chu khawpuiah zawng thil zir tur apui a tam a, sikul zirlaibu pawnah rualelna tur chi hrang hrang a tam em a ni. Mahse, thingtlangah chutiang rualelna tur ṭha chu eng nge awm ve le? Duh ve ngawih ngawih mah sela, computer zirna hmun an nei ve lo a, rimawi zirna in a awm ve lo a, infiamna hmun changtlung lah vana rah ang hlauh a ni si. Thingtlang nu leh pa tam zawkin lo neiin ei an zawng a, tlai thimah an lo haw a, sikul bang hma an fate tan chuan an nu leh pate hmuah paha sava veh leh lui kal te, ṭhianho inkawm khawm bak chawhnu hun tih tur hi vang deuh a nia. A tlangpuiin tleirawl/ rawlthar rual awmkhawm a, inkawmkhawm tam lutuk hian rah ṭha aiin rah ṭha lo, sual rawngbawlna leh ruih theih thil tihnaah mi a hruai lut zawk lehnghal.

Sikul ṭan hma kan duh a nih pawn engnge ban hma kher a ṭulna. Ka hriat sual loh chuan, Roman sikul kan tihho hi sikul dang aiin an ṭan hma deuh vek a. Mahse, sikul dang zawng zawng rualin an bang leh tho. Tichuan, sikul dang zawng zawng aiin subject khatin nitin an zir tam zawk tihna a lo ni a, kar khatah chuan subject ngain sikul dang aiin an zir tam a, thla khatah chuan subject sawm hnih velin sikul dang aiin an zir tam ta a. Kum khatah phei chuan a tam ngawt ang. Romanho tihdan zuia sikul ṭan hma a, ban hun a ngaia kalpui hi ni thei se chuan thu hran. Tuna kalpui kan tum dan hi chu Aizawl khawpui lirthei tawt lutuk tihziaawm tumna atana rawtna kal zel kan amen-na tih loh rual a ni lo.

Tun hma hun engemaw ti lai aṭang khan roman sikulho chuan an zirna an lo ṭan hma tawh a, chu sikula kai zirlai leh an nu leh pate pawh an zirnain tihdan milin an lo insiam rem a, ṭan hma thei lo nu leh pate chuan sikul dangah an fate an luh tir a, tu man Roman-ho zirna ṭan hma hi kan engtoin kan sawi kan sawi lo. Hetiang chiah hian, tun hunah zirna ṭan hma hi ṭha zawk tura ngai kan lo awm chho ta a nih pawhin, Zoram pum huapa ṭan hma ngei ngei tur ti zawnga kalpui lo hian, a remchanna hmun leh a theihna hmunah ṭan hma thei te tan hma turin ti ila, a ṭan hma theite chu duh leh hamṭhatna te siam sakin entawn tlaka ṭan hma hi a ṭhatna phochhuak thei tura hmalak ni zawk se a duhawm.

Tuna kan ṭan hma chhan ber nia lang hi sawi dan tam tak awm mah se, a ban leh kan hma tho dan en hian trafic jam a ziaawm theih dan kawng zawnna nia an sawi hi a chhan lian ber chu niin a lang - mah se thingtlangah trafic a jam ve si lo. Tuipui ral ata kan Chanchin Ṭha dawnin run lui ngai a ṭap ṭhin Zofate Jordan lui ngaia min her tir angin, kan tuk-ṭhuan ei ṭhin leh chawfak hun bi te rawn her danglamin, phai vaiho dungthulin eirawng min bawltir chho dawn a ni. Zopain a lo tih ṭhan zing thingpui in paha khawhar in chuankai leh damlo tlawhna hun te a bo tur hi uipui tuilian thlira lo thlir atan chuan a pamhmai lua lo maw?

Sumo Stand khawpui pawna sawn

Thingtlang mi tan khawpui kalna tur sum thawhchhuah a harsat tluk zetin zin veivah pawh an harsa a, ṭul tawpah hman lo leh buai karah loh theih lohna avangin Aizawl an rawn zin a. Kal man an sen a hnu lamah Aizawl khawpui chhung thleng loa dai pawna an chhuk a, khawpui chhung veivahna mana an insenso belh tur zawnga rorel saka an awm hi a va ṭha lo tak em!

Thingtlang mite tan chuan khawpui kal hi a hlu a, an chakkhai leh mamawhte tualchhungah lam mai tur a awm ve ṭhin loh avangin an khaw lama an haw tur hi chu an bangbawr ṭhin tlangpui a, chutiang bungraw hrang hrang nena khawpui daifem lama an khaw pan tur lirthei an panna senso san turzia hi tehkhin thuin i chhut chhin dawn teh ang.

Chhingchhip khuaa Pu Liana chu krismas chakkhai lain Aizawl a lo kal a, a thlenna tur chu Dinthar a ni a, a sumo chuan man chu Rs 200 a ni. Ṭhuampui daiah a sumo chuanna chu a din avangin Dinthar pan turin taxi a lak a ngai a, Ṭhuampui aṭanga Dinthar chu taxi fare 200 a lo ni. A haw a lo hun a, Ṭhuampui pan turin taxi fare-ah Rs 200 a lo ngai leh a, zinna senso a sang lo thei ta lo a, a hautak hi a thuahhnih thuahthum ta a ni.

Hethiang vek hi thingtlang mite zinna senso tur chu a ni e ka ti lo, mah se khawpui daia an chuanna tur sawnsak an nih hian rawn an hlawh si lo, khawpui miten khawpui tana ṭha tura ruahmanna an siam a thingtlang mite phur tirit zawnga thu keuh thluk a ni hi a pawi a ni. Khawpui mite hmakhua chauh ni loa sumo hmanga zin ṭhin leh a hmangtu dik tak zawk thingtlang mite dinhmun ngaihtuah chunga an zai ngaia rorel thiam a duhawm hle.

Thingtlang khuate tan hian Aizawl khawpui hi er phak rual a ni lo a, Aizawl khawpuiin a inenkawlna tur sum a vaibelchhe tel a hmuh ang hi dawn tur lah an nei ve hek lo. Chutih a kara sum nei zawkin a nei lo zawk thingtlang khuate harsatna siam zawnga ro a rel hi thil tih dan tur ṭha leh dik a ni dawn em ni? Khawpui chhungah hian thingtlang zin veivak phurtu lirthei dinna tur hi ngaihtuah sak dan a awm ngang lo em ni?

Thingtlang mite chan ve loh ro sum an dawn hi pumbilh mai loin, kan pi pute dungthulin, ‘sem sem dam dam ei bil thi thi,’ han ti sela chuan, thingtlang mipuite hian Zawlkhawpui hi an va chhuang lehzual dawn em. Ngaihtuahna pakhatah chuan tuna bazar bula Power House saw, a building saw ṭhiatin ruahmanna fel tak hnuaiah building lian pui sak theih a ni a, a hnuai ber aṭanga chhawng lina thleng pawn lirthei hunna hmunah siam sela, a chung lamah office saw a la awm thei tho si a. Chutah chuan, thingtlang zin mi phurtu lirtheite hi hun ni sela, a nih loh pawn bazar huam chhung, Chanmari aṭanga bazar bungkawn inkara lirthei englai pawh inhung phui mupho hi tah chuan hun tir vek sela, khawpui chhung lirthei tawt lutuk hi chu a ziaawmin, khawpuia thingtlang mite chanvo a bo lo tur.

Hetih laia tun hnaia Mizoram Maxi Cab Owners’ Assocition General Assembly-a khuallian, Tranport Minister Pu John Rotluangliana'n Aizawl khawpui daia Maxi Cab stand dah chungchangah, “Sawrkarin Maxi Cab stand a sawn vanga khawkar kawng chuan man zat deuh thaw Taxi fare-a sen a ngai ti a, chanchinbu ṭhenkhatin an chhuah chu ram changkang zia a ni,” tia a sawi phei kha chu thingtlang mite hmuhsitna a niin, thingtlang mite harsatna hrethiam duh lo luitu thusawi a tih loh theih lo a, Minister thusawi thingtlang mite dinhmun hretute tan chuan ngaihthlak hrehawm tawp a tling tak meuh meuh a ni.

Kha ti lo khan, thingtlang mite lung tidam zawnga sawi dan hi a awm turah kei chuan ka ngai. Eng pawh nise, Maxi Cab-te khawpui pawna an din avang hian thingtlang mi Aizawl zinte chuan a hma aiin sum zawng an sen belh chiang khawp mai.