A sen a kawk

Kan Chief Minister zahawm tak ṭawngka sawi chhawn leh chang hian a awmzia min zawttu ka tawng leh zauh ṭhin. An mawh lo e, upa lam tan chuan a awm reng a ni.

Motor hi petrol tanky full-a thun chuan a petrol meter khan a dinglama 'F' tih inziahna a han kawk a, tlan thui tial tial ila oil awm zat azirin a kawk hniam tial tial a, 'tlemte chauh a awm tawh, oil thun belh turin petrol pump pan vat a ngai' tih a khalhtu hriattir turin a meter veilam kila mi chuan 'A sen a kawk' ta ṭhin a ni. Thun belh loa tlan luih zel chuan a piah lawkah a air lock ang a, motor kha a tlan/ a nung thei tawh lo mai dawn a ni.

Tihian entirna pe ta ila - motor = kan ram, driver = kan Chief Minister, Tanky = sum bawm, petrol = chhiah sum (tax). Tichuan a awmzia chu kan ram hian a sen a kawk tawh a, a ngai renga kan kal luih zel chuan reiloteah kan ram hi kal thei loin a air-lock mai dawn tihna ang vel a ni.

Thih ngawt ai chuan a damdawi zawn a ngai ta a, nachhawkna atan tui bill, buhfai man etc. tihsan a, thisen man laka, zu zawrh a, kum 15 road tax lak lawkte a ngai a. Contractor bill bakah sawrkar hnathawkte hlawh chenin tih khawlai a ngai ta zel a. Heng zawng zawng hi kan ram damdawi a la ni lo, nachhawkna mai a la ni.

Ram dam hlenna tur hria mithiamte cho chhuah nan rawtna ṭhenkhat -

Chhiah lak: Vanglaini 7.3.2015 a Pu Thankima ziak ang khan India ram state zingah kan rama sorkar hnathawkte hlawh a sang filawr chungin chhiah kan la la lo lehnghal. State dangte angin chhiah la ve ta ila, sorkar hnathawkte aṭanga kan hmuh tur ringawt pawh buhfai man Rs. 9.50 aṭanga Rs 15 per kg kan tihsanna sum kum khat chhunga a punna tur zawng zawng aiin a tam zawk fe dawn a ni.

Chutiang zel chuan contractor, supplier leh mimal sumdawng lianten han pe bawk se, miretheite tel ve lohna aṭanga kan ram sum pun nasat phah dan turzia chu!

Inrencham: Ram leilung fa leh mipuite'n kan mamawh lutuk loh, saorkar senso tisang lutuk chi 'post' hi nuai bo ni se, phuah chawp post an siamte nen lam hian. Pension tawh tumah ruai nawn lo ila, lak thar belh loh theih lohte pawh con­tractor-a lak zel nise kan ram hian sum a va 'save' hnem dawn em!

Department tam taka ṭul loa sorkar sum kan sen rengna tam tak hi privatise ila kan hlawkpui zawk tur tam tak a awm a ni. Sorkar hian a tih peih a, a tih ngam bawk chuan a sen kawk hi kan tireh thei a ni.