Ram leh hnam humhalh hian Hnam dang huat a kawk lo

Bible hlimthla

aṭangin...

YMA ten gas tichingpen lai an phâwk thu leh chung zingah chuan Mizo te kan tel thu kan hre ṭhin a. Kan ram chhungah hnamdangten pawi an khawih hian a tuartu tan chuan a nâ bik a. A thinûrthlak rualin hetiang taka an huangtau ta hi a ram pum hian eng nge kan tihsual lai ni ang tih erawh rilruah a awm a.

‘Ram leh hnam humhalh’ chuan eng nge a kawh?: Kan ṭhianpa chuan, “Ram leh hnam humhalh hian hnamdang huat a kawk lem lo. Chhungkua kan inzilh a, kan infuih hian ṭhenawmte kan haw kher lo ang deuh hi a ni” a ti a, a dik hle awm e. YMA in ram leh hnam humhalh a puang a, hei hi a Pathian thu hle. Ram leh hnam humhalh kan vei lo a nih chuan hnama min dintu Pathian kan zah lo tihna pawh a ni thei. Hnamdang chunga rilru put dan erawh thiam a ngai takzet ang. Phul lem hring dup phah chunga hmel danglam lukhum var khum kun dual dual hmuh hian ngaihtuahna a tikalthui. Ram inpumkhatna tihchhiat hlauhawm tak si karah a tawk thiam a har thin mang e.

Ram leh Hnam humhalh thupui huamchhungah hian chep sa an awm avangin fimkhur a ngai a. A pawng a puia hnamdang hrim hrim nekchhuah tih ang reng kha chu ramhlui zia a ni tawh. Vai thlah an nih avanga an hniamna leh Sap thlah nih vanga an sánna chhan a awm chuang lo va. Eng emaw avanga hnam dang kara lo pianga te hian an pianna hi an duhthlanna a ni bik lo e.

‘Ram leh hnam humhalh’ chuan chhan a nei tur a ni: Ram leh hnam humhalh a lo ngaih chhan tak ber hi eng nge tih hi kan inzawh hmasak tur a ni ang. Kumpuan meuhva neiha ‘humhalh’ ngai khawpin kan lo awm reng tawh hi tu mawh nge tih pawh hi sawi tham a ni ang.

Bible han keu i la, Pathian hian midangte hmangaih turin min duh a, mahse hmangaih tih hian ‘a chhan’(purpose) a nei thin. Pathianin Israel hnam te kha a hung bik a, hnamdang neih kha Pathian hian a tuipui em em lo niin a lang a, nimahsela an zawm vek bik lo. Aigupta aṭanga ramtiam an panna kawngah te khan inneihpawlh hlimthla a lo lang a, Ezra te hunlai te pawhin kan hmuhchian kha. Ezra te hian an hunlaiin chutianga hnamdang nei te chu an thliar a ni ang tih turin ziak kan hmu a (Ezra 10:1-44). An ram leh hnam an humhalh duh avanga an thil tih hi tunlaiah chuan a tha ber tawh kher lo vang. Amaherawh chu hei hi darthlalangah hman thiam a ṭha hle ang.

‘Ram leh hnam humhalhna’ atan Media te chona: Kan ramchhung han thlir i la, Zo hnahthlak ṭheuh pawh kan nihnaa (identity) chiang lo; inlakhran tum tlat an awm em? heng hi eng tin nge ni dawn? Ram leh hnam humhalh kumpuana nei te hian a pawp lai kan hmuh kân a nih si loh chuan engah chulam chu kan hma tel loh vang? “a tih chi rih loh (sensitive)” kan ti em ni? Sawiho, inzirtir (seminar/consultation/awareness) leh thil dang tangkai tur a awm ang em? ram inpumkhatna (national/state integration) programme te hi engtia kalpui tur nge? eng hi nge kan than-mawh-bawk? tute hi nge ram leh hnam inpumkhatna tichhia? Kohhran te hi kan lo tel ve reng em?

Media ten ram hnuk kan buaipui a tul hle a. Tute emaw hlimthla, mimal infak chawpna mai mai leh hlimhlawp (entertainment) lam thil te, Icon/ Idol/reality show leh therhlo te te ai hian thil tak tak hi buan tam ila; Ram leh hnam humhalh hian min chiah hnehin min thuahfai sela, hmalakna thar nena pumkhata min siam dan hi Media miten kan thiam em em ang. Media ten kan tih loh chuan ti tur chuang an awm loh hi!

‘Ram leh hnam humhalh’ a ṭul: Ram leh hnam humhalh kan tih mek lai hian ramdangmi an nih vanga tharum nena vau thaih chunga innawr chiam hi kan tih tur a ni lo. State pawnah chanchintha kan hril a. Kan hrilnate hian “Ram leh hnam humhalh nan haw vek ula kan duh” ti mai selang chuan kan chhe vek. Helaia boruak tha lo kan neih hian ram pawna kan Missionary leh chanchintha kan hrilna thlengin nghawng tha lo a nei thei tih kan hriat thar a pawimawh hle.

Chutih laiin kan chanvo, kan ‘khua leh tui’ anga chanvo lo siamsaka, ram leh hnam tana hnawksak thama lo duhsak hi Pathian hmangaihna a ni ti dawn ila “he pa chu zirtirna him lo keng” min ti ngei ang. Israel hnam tlêmte (minority)te kha an chhehvelah hnam hausa leh lian, fing pui pui an awm a ni tih Pathianin a hria a. A hung bik a, a enkawl a, a kaihruai a. An ‘Ram leh hnam’ a humhalh sak a, an inrelbawlna (administration) thlengin a inrawlh a. Tihdan phung pangngai (tradition) a siamsak a; chu chuan an rilru sukthlek (norms leh value), culture thlengin a khawih; chuvanga tun hun thleng hi an ni tih kan hre vek awm e.

‘Ram leh hnam humhalh’ nan dikna chauh: Eng hnam pawh hian dinchhuah kan duh theuh a. Civilization hrang hrangah a dikna kan hmu. History ziaktute hian an hnam ropuina leh chakzia an phum ṭeuh ṭhin. Hnam chak lo leh salbeh zawkte dinhmun erawh chhiar tur kan hmu tam lo. Post-colonial thlirna aṭangin he hnam chanchin pawh ziah that duh tam tak kan nei maithei e.

Khawvel history-a hnam insual thinteah hian chak zawk leh dinchhuahna tur a nih dawn phawt chuan dikna (fair) palzutna tam tak kan hmu. Chutihrualin chung dik lo taka ti te leh Politics bawlhlawh avanga dingchhuakten rei an daih hauh lo a ni tih Grik leh Rom-ho chanchinah (history) a chiang a. Dinchhuah tumna lamah eng hmanrua pawh hmang hreh loten a tawpah chhiatnain a hmuak tih hi Bible dikna kher lo pawhin a dik ve ta ang. Mi dik, thil tha chauh duhte avangin ram leh hnam a ding chhuak leh nge nge thin a nih hi.

‘Ram leh hnam humhalh’ hmalam hun atan: Israel fate angin kan zingah hnam dang tam tak an awm ve a. A pawng apuia diriam taka intih fo tur pawh a ni lo va; chu chu ram leh hnam humhalhin a tum a ni lo va, kan dinchhuahna tur pawh a ni hek lo. Thil kal tawh sawngsawhlawtna awm lo nek aiin hmalam thlir chunga thil tha zawk kan ngaihtuah a ṭul zawk ang.

Keimahni lam hi in chingfel hmasa ila. Ramri kham chin fel tak - ‘hemi chin/ hetiang hian’ tih hleihtheih loh karah hnam pasalṭha rilru puten humhalh kan tum dan inang lo nuaih hi engtin nge zai khata kan luan ang tih ngaihtuah a ṭul ta a nih hi. Chutih mek lai chuan kan zinga hnamdang awm te pawh Pathianin Israel fate hnena thupek a pek ang khan an chan tawk tur siam sak thiam te (Lev 19:10; 23:22; 25:19-21; Deut 24:19-21; 14:29;) rorelna dik hlenchhuahsak (Deut 1:16) ve te erawh kan bat a ni tih i hre reng ang u.

- Zonunsanga