I ngaihsan awm zawk

A ṭhiante chuan an nu leh pate leisak a ni tih hriat ngawi ngawih an phone changkang tak tak chu an han lek chhuak a, tunlaia games lar em em Clash of Clans chu kan khel sap sap a, an titi-ah pawh chuan thu dang a leng lo, Barbarian, Archer etc, tih vel ngawt a ni.

Chutianga a ṭhian-ten phone changkang tak tak hmanga online game an khelh mek lai chuan ni tina a inhlawhna sum thawhchhuah ngeia a lei ve, phone man tlawm tak, internet khawih ve theih chang chang chu a ipte aṭang chuan inthlahrung takin a han la chhuak ve a. A ṭhiante phone nena a in changkan hleih em avang leh, phone changkang nei ve tura an lo sawi khum fo avang chuan, rei pawh lek chhuak ngam lovin, a message dawn a reply zawh rual rual chuan a han ak leh nghal a. A thianten CoC lampang thu khawchang an sawi tawh chuan sawi ve tur pawh a hre lem lo.

Chutiang ang chu nimahse, mahni dinhmun phu lo leh, chhungte leisak hmanga phone chang-kang tak neih a, online game chang-kang tak tak leh nuam tak tak khelh ve erawh chu a chak der chuang lo.

Mahni dinhmun phu loa a khawsak ngai loh avang chuan sum ngah ngah hmel ṭha kan tih tawhna kan zoram khawvelah hian a ṭhiante angin a luck ve lem lo a, a kawppui neih ve chhun te pawn an dinhmun avangin an lo phatsan ziah lehnghal. A chang chuan ṭhiante zinga awm chu hreawm a ti a, ṭhian kawm loin a awm phah fo bawk.

Chutianga an chhung-kaw khawsak mila a nun ngam avang chuan mi ṭhen-khat ngaihsan a hlawh ve tho a, ngaihsan tur dik hriate phei chuan a ruk takin an lo ngaisang ru em em thung a ni.

Mite ngaihsan leh ngaih ropui, mawi leh nalh duh luat avang te, mite zah leh chawimawi nih duh luat avang tea mahni nihna lo ang puia khawsak chingte hian a tirah mite ngaihsan han hlawh ve ṭhin tak mah se, a tawp a tawpah chuan mite nuihzat leh deusawh an ni leh nge nge ṭhin.

A nihna dik takah chuan mahni nihna anga lang ngam lote ai chuan mahni nihna ang anga lang ngam te, mahni thawh chhuah mila khawsa ngam te hi an ngaihsanawm fe zawk ṭhin.

Mahni nihna ang anga kan awm ngam a, nun kan hman ngam hian kan lo ngaihsan awm fe zawk ṭhin.

- Nawlchunga Chinjah, Siaha