RAMRI NGE RAMRI BUAINA KAN BUAIPUI?

SÂWM LOH RAM HMANGAIHNA -

Tu MLA mah hian a sawm chhuak lova

Tu YMA mah hian a fuih hman lo

Tu NGO mah hian a tlan khalh lova

Khawi CM mah a inrawlh hek lo

Tu Party mah insawi thei turin an siam lova

Politics in a tur chhuak hauh lo

An chhungten an chelh hman lova

An lainate thu ṭha an chah hman hek lo

Politician pakhat pawhin hma a hruai lova

Ram an hmangaihna kha 

fuihphurah a in nghat lo.

Hei hi a ni RAM HMANGAIHNA chu. 

Heti chung hian vuak an huam a, chem sen an hmachhawn huam a, Ram chhan nan Thih an hreh lo, nghawnga zai, lua vuak an tuar a; silaimu pawh an hmachhawn huam ngei ang. Party, NGO leh chhungkua aia ram chhan nana thih pawh hreh lo kan lo tamzia hmuh hian ngaihtuah a ti thui a, sawi tur a va ti tam em! 

Ramri inchuh avanga kan vawikhat buaina nise hmalakna zawng zawng hi thlawp thlap tham tling a ni ngei ang. Mahse vawi engzat nge kan buai tawh? Ramri buaina chhuak avanga Opposition laia tai pawng pawnga Ruling beitute Sorkar hun a lo her chhuak leh a, eng ual lah ni hek suh! An ṭanhmun leh thusawi a inthlak vel mai mai chauh a ni. 

Vawi engngemaw zat kan buai tawh a, thisen a luang a, tharum thawhna a thleng a, hriamhrei kan lek a, chutiang kara Politician dawngdah te dem hauh lova lu chhum ban chhum huam kan la ther fur mai hi lairil a fan rualin lung a ti chhe tel tlat tawh. 

Heng thil lo thlen chhan hi ramri chinfel tum hauh si lova Manisfesto a dah ve ziahte hrin chhuah, hma la thei miah si lo hmaiphih nana Boundary Commission din kur ve zut ṭhinte cho chhuah, kawng a tlang ṭhata kan in tihbuai loh chuan ramri a fel emaw tia ram hruaitu inthlahdahte hrin chhuah a ni. Chu inthlahdahte zar chu zovin Zopa ram hmangaihtu tak tak zawk thisen a luang fo a, ram tana Martarna kan nghak thleng lovang tih a sawi theih ta loh! 

Hetiang hi kan dinhmun a ni a, buaina chinfel aia pawimawh zawk ramri chinfel lama pressure siam emaw, hmalak tak tak aiin a buaina hmuna chakai khawrh kawr, cotton jeans, sneaker changkang ber ber nena zu in khualtelem a, ram zu in hmangaih siak a, news lam leh thlalak lama lan tam chu kan intihsiakna a ni zui a. 

Ngawi renga rilru na taka duty bûk an ṭhiah mawlh mawlha an duh tawka an chet a, an liam fel hnu fe a thu rumra pui pui sawi chu kan thiam hle lawi a. Ramri buaina hi thleng zeuh zeuh ta se, ṭhenkhat tana mawlmang taka 'A ni zet hi chu' an tih tura in lak 'hero' na hun a tam ting ve thei tho a ni. 

Emergency Meeting chu koh aṭanga darkar 24 velah neih a ni ta thuai a, hemi chhung hian emergency meeting dang (YMA/ VC/ LC) zan dar 11/12 a ko te thuchhuah erawh chu a zan a zanin kan hmu nghal nuai nuai a. 

Cabinet Meeting 

thuchhuak tlangpui;

Assam Sorkarin boruak muanawm an siam thuai beiseina, Police dah belh, gas leh oil lak luh dan ngaihtuah, mipuite tuar hram hram tura ngenna, ramri hrula buaina chinfel nana hmalak, mimal leh pawl hamṭhat nana hmang lo tura ngenna te a ni. 

Nghahhlelh awm ber ramri chinfelna lam hawi a lang lova, buaina chinfel dan kawng a ni vek mai. Thil ṭul hmasa tak chu a ni ngei a, buaina thlen fo chhan erawh kan thleng hleithei lo. Leimin fona hmun tlawh zut a, a min tawh lohna tura hmalakna tak tak ngaihtuah si lova leimin ngai bawka ṭanpuina pek fo nen pawh a in zul viau.

Hruaitu leh Party ngaiah kan kual kual a, a chinfelna hre em ema insawi vek ṭhin an ni. Mahse kan thlen chin chu hei hi a ni si. Ram inṭawm, neitu awm bik lova 509 Sqkm awm reng khu kan in remsiam thei mai lo em ni? An nin an ram an tih kha kan ramah kan chhâl a, kan ram ngei kan tih kha nêk em emah min ngai ve thung a, a hmunah kawk ila, inremsiam pui tawh mai ang u. Ram hlutna a nasa telh telh a, kan la sar thi lovang tih a sawi theih ta lo. 

He ramri chingfel thei leh hmala nghal thei hi mipuiin kan thlir tur dik niin ka hria. Ramri buaina chu chatuan a ni dawn lo, engtikah emaw a reh ang a, nunphung a pangngai leh mai ang, a ramri erawh chinfel a nih si loh chuan vai chhe pakhat vang pawha in sam buaih buaihna thleng thei  dinhmunah kan awm reng zawk a ni. 

Hruaitute pawhin ramri buaina a 'hero' vak aiin ramri chin felah 'hero' tum zawk se. Buaina kumhlun aṭanga chhanchhuahna an thlen zawk ang a, Zoram tan a ṭha zawngin an hming an chher bawk ang. Buaina hmuna tei ve sek ringawt zawng mi nazawng pawhin an tih theih a ni. 

Hri len laiin kan sawi tawh "Tun hi in dem hun a ni lo, ṭanrual hun a ni" tiin. Tunah kan thupui a ni leh tawh. 'Ṭangrual lovang u' ka ti lo, mahse hetiang dinhmuna min thlentu, ramri chinfel vei tak tak lote zar zoa thisen luang hmuh fo hian thurualpui harsa tihna chen ka nei. 

Ke pen ṭha duh miah lo te ke penpui tum tlat hi mipui bat ni pawhin ka hre ta mang lo.