Chapchar Kût a chuai?

Zofate kutpui neih zinga kan chhawm­nun awmchhun Chapchar kut chu Zoram hmun hrang hrang ah kan lawm zo ta. March 6, Vanglaini chhuakah khan Chapchar kut aiin Anthurium Festival-ah sum hman a tam zawk tih a lo langa, ka thin a rim phat mai. Engvangin nge kan kutpui ber aia kut phuahchawpah sum kan sen tam zawk? Mahni sahmim tihpuarna tur siam a remchan vang em ni?

A thuhrimah Sorkar-in Aizawl-ah Chapchar Kut a lawm theilo tur anga thuthang awm kha sorkar tan a mualpho thlak. Thla hmasa lawkah khawthlang mite chin uar, ṭhalai hawklak te hman tura ngaih Valentines Day ah meuh Tourism department chuan sum sengin Hmuifang hmunah function an huaihawt a; chapchar kutah erawh sorkarin kutsil an tum leh si maw? CYMA hruaitute hmalakna a fakawm, sorkarin a lawm theilo a nih pawha lawm an tum tho leh,an kaihhruaina a sumdawng (dawrkaite), passenger phur lirthei te hnena Zothuama inthuam te duhsak bik tura ngenna an siam leh pawl hrang hrangin an thlawp kha a lawmawm takzet. Taxi driver, thangchhuah kawr ha leh diartial khim te khan lung an va dum tak em! CYMA hmalakna zah vang nge sorkarin a tawpah chuan phuai deuhin a lawm ta tho a. A ropui lemlo hle.

A phuai deuh nia ka hmuh chhan te

Venhimna a nep: Ni e, hlimni a ni. Pi leh pute chuan chapchar kutah inhau te, intih thinrim te an rem tilo. Chhungkaw hlim taka hman an duh. Tunlai khawvel-ah chuan mipui punkhawmna ah reng reng venhimna a pawimawh hmasa. Naupang aṭanga puitling,nula tlangval kalkhawmna tur a nih vangin venhimna a ṭha tawk tur a ni. Police duty tlem zia kha! Muallaiah police ṭhenkhat an duty laiin pavillion hnuaiah insual an awm,! MPS rualin an ṭhelh ta a nih kha, a zahthlak hle. Tin, pavillion thlang lam hmunawlah sawn kumtin zu in leh thilsual ti an awm ṭhin. Engvangin nge hei hi an tihrem theih loh, an vaiin man khawm vek ang hmiang. Programme ṭan hmain CYMA secy khan zurui emaw buaina siam avanga man an awm chuan tantir zel tur an ni bakah an hming leh veng branch YMA puan zel a ni ang a ti a. Mahse puan a awm lem lo.

Programme a nawi: Mizote hian tihpui nikhuaa thusawi tur kan ruat ṭeuh hi sim kan ngai. Infuih hun a nilova, hnathawh leh ruahmanna sawi vak vak a hun lo. Hlim ni tur a ni a, mitin tan a hriat reng tlak, an tel ve takzet a ni tih an inpawmna tur programme duan a ngai. Thusawi tu tam zawk khan chapchar kut lam hawi an sawi lo. A rei si a ninawm bawk. Tin, programme ah reng reng hian kum dang aia danglamna leh mipui tiphurthei hmuh belh tur a awm lo. Programme a phuailuai em em tihna a ni.

Zaithiam te hi ka dem ṭhin: Mizo zaithiam te telna/zaina function hrang hrangah ka tel fo. Min awi tur leh min thawidam tura sawm an ni. Mahse mipui zawm theih hla hi engatinge an sak ṭhin loh le? Nikum khan International Women's day hmanna ah zaithiam pakhat chuan "Mizo hnam val rual chhuan­awmte u, in zam mai dawn em ni le? tiin kalkhawm MHIP member ho a awi a, a mak ve khawp mai. Tin, taxi driver ho kohkhawmna ah zaithiam dang leh chuan driver te zawm(sakpui) theih miah loh hla a rawn sa tawh bawk. Amah kha a hmelṭha, driver ho ralkhat ngaihzawn pawh a ni. A hla sak dawna music rawn rik khan driver ho chuan kut an beng dual dual a, mahse kutben pawh rem lo leh zaipui theih loh hla a rawn sa a, an kutben pawh an chawl vek. Tikhan a zai hlawh a la anga, hlawhtling a inti tho angem le ka ti. Vawikhat leh pawh thingtlang lammi deuh ho kohkhawmna ah sap hla an rawn sa nghek tawk, a ngaithlatu tur (target audience) mipui te hi thluk ve ṭhin se, anmahni pawh a chawisang zel ang.Tin, zaithiam hrang hlui tam tak hi chu tunlai ṭhangtharte hian an hla kan zawmpui thei lo,lo hahchawl ve tawh mai se tih hi ka ngaihdan a ni.

Cameraman an tam lulai em mai!: DSLR Camera neih hrim hrim kha Lammual chhung luhtheihna permit em ni? Journalist (Media) leh I&PR a thawktute, Mizo Photographers Society aṭangin panga vel leh hnamdang rawn chhimtu te chauh luh phal se. Midangte kha chu camera to ber nei pawh nise luhtir lo ngam ang u. Lammual ah hmanlaia an ramchhuah dan an lantirna lemchan an rawn chang a, mipui hmuh chak a ni, mahse mipui te hmuh theih loh tura cameraman ten an bawr nasa lutuk kha thil ṭullo a ni. Journalist leh official photographer (I&PR) ni lemlo hi chu luhtir lo ngam ang u,anni hian chapchar kut thehdarh leh tihlar kawngah an thawhhlawkna ka hmu ve hauh lo. Miss thlan leh a behbawm thil avanga lammuala Cheraw kan laia tei suau suau ho kha an hnawksak, mit an tikham bawk.

Naupang costume parade hi thlak ang u: Mizo thuama inthuam naupang tana parade an siam hi a ṭha khawp mai. Mahse i her danglam ang u; naupang lutuk, entirnan kum 8 hnuai lam ang chi hi chu tel tir lo ila. A hruaiturin nu leh pa or pi leh pu emaw an u te an tel zel a ngai si. Anni khan mizo thuam an inbe leh tawh si lova,an inkai reng si a, thlalatu tan pawh naupang chauh kha lak a rem lo. Programme nawi lutuk leh rei lutuk tur vennan kum 8-15 inkar te tan tih ni tawh se. Anni chu tuma kaih leh hruai ngai an ni lo. Thlalatu te tan pawh a hahdam, programme huaihawttu tan pawh a hahdam ngei ang.

A tawp berah chuan mitin telve theihna,an hriat reng tlak programme siam a ṭul. Chai ah te khan hnam dangte nen, khualliante nen mipui te kha lamtualah lam dual dual ila. Midang zaia lam mawl tawp tura insezawl chhuah hi chu a ho deuh. Tin, ṭhalai ṭhenkhat inhawrkhawma Mizo lam pawh nilo, street dance? or luleivit lama an ti chiam ṭhin pawh hi phalloh ni se, chapchar kut a nih ang ngeiin i fir lehzual ang u.