Ringtute do tur chu eng ber nge?

Kan sorkar chuan MLPC Act chu a han tlangzarh ta ngei a, mi tam tak sawi lawk anga zu vanga buai nuai nuai chu kan la hmu lo phawt a, zu a ṭhat loh rualin tun thlenga kan result erawh hi chu a lawmawm lam a la ni e.

Ka ngaihtuah ṭhin a, ringtute do tur dik tak hi eng nge ni ang - zu, drugs, mipat hmeichhiatna, eirukna etc. ni loin Setana hi a ni zawk dawn lo'm ni? Tun dinhmuna kan sawi tam ber leh do ber nia lang chu Setana ni loin zu a ni. Ringtute rawngbawlna leh Pathian ram lakna kawngah te hian khing thil ṭha lote khian min tibuaiin Isua hmel a tibal ṭhin.

Chutihrualin a zung Diabola do ngam tak tak loin a hmanrua mai hi kan do vak vak ṭhin hi a pawi hle a ni. Lal Isua'n a huat ber chu nun Pharisai hi a ni a, mi hmuha mawi tur kan ngaimawh lutuk hian ringtu suak a siam tam niin ka hria.

Kan ram kris­tiannain a beisei, Thlarau Thianghlim hnathawh a lo thlen lahin kan mimal ngaihdanin kan lo teh a, a dawngtute chu kal sual/ thlarau suak dawngah kan puh a. Nikin niah buh tak leh buh lem chu thliar tur a nih thu kan Bible-in a sawi laiin harhna hrang hrang lo thlengte chu mahni tapchhakah Zawlnei ṭhami ang hrimin a him loh thu kan lo tlangau pui ve vak vak ṭhin.

Thlarau thil sawi­sel ching tam tak hi ui ang maia chaw nawi tla chhar tuma mi hausate ke bula mei phêt mût mût ṭhin, kohhran tak tak an ni duh chawk lehnghal!

Khawvel thil taka thil dangdai deuh a lo thlen lahin Pathian thu nen kan lo teh leh lawi a, kan thil tih duh dan han en hian rinna lama la ṭhang mek leh naupang deuhte tan phei chuan a bangbo thlak a, kal ngaihna a awm tawh lo a ni ber e.

I Tim. 4:2-5 thlaah hetiang deuh hian a ziak - Thu chu hril rawh, dawh thei taka zirtir chungin an thiam loh hriattir la, zilh la, fuih rawh. Zirtirna dik an ngaih peih loh hun a la thleng dawn si; an beng te a zat avangin anmahni duhzawng angin zirtirtute an hnenah an khawm zawk ang a, an bengte chu thutak lamah an chhu ngawng ang a, thawnthu lam panin an peng tawh ang. Nang erawh chu engkimah fimkhur la, hrehawm tuar la, Chanchin Ṭha hrilhtu lam hna thawk la, i rawngbawlna kha hlen rawh, a tih ang hian Pathian leh keimahni inkar chauh hi buaipui ila kan dam tlang ngei ang.

Pathian hian setana, zu leh thil ṭha lote hi khawvel ata lak bo a tum lo a, heng sualna hrang hrang lak aṭanga min chhuah zalen a, amah rinchhana sual bawiha tan loh hi a duh ber chu a ni zawkin a lang. Zu in min nge in lo mi makpa atan i duh?