SPEAKERIN ENGTIN TAK TI ANG MAW?

Pu Lalduhawma, Mizo­ram Assembly-a eptu pawl member chu rorel lam (ruling) member 12-ten  a member nihna bantir tura Speaker hnena an nawrna hian Speaker chu dinhmun luhaithlak takah a dintir ta a ni. 

A thiltih turin a rilru a hruai dan tur hi ama nun (life) pumpui kal zel atan leh Mizoram tan, eng ang thutlukna nge dik ang a, Pathian malsawmna dawng  ang tih  a ngaihtuah ngun hle a ngai ang. Pu Lalduhawma leh a thawhpui MLA 6-te hi kum 2018-a Mizoram MLA inthlan laia ZPM-in, ZPM  candidate-a an puan kha an ni a. Party-ah an la in register loh avangin, independent candidate hming an pu lo thei lo a ni. 

Political pawl lo ding tir tan he kawng hi zawh loh theih loh a nih avangin MNF pawhin he kawng chiah hi zawhin, Pu Denga hovin an lo sawrkar tawh a nih kha. Independent hming chu an pu na a, ZPM an ni tih State Election Commision-in a hriat reng avangin, a phalsak angin, ZPM Symbol atan lukhum parh an hmang a, chu chuan an campaign a nih kha. Pu Lalduhawma hi ZPM taka thlan tlin 7-te zinga mi kha a ni a, tun thlengin a ZPM em em ta zel a ni. Amah thlangtute hi a phatsan a nih chuan, amah thlangtute ngei kha ngaimawhtu, thinrima hektu ni awm an ni. 

A thlang tlingtuten an thlan chhan ang taka a la awm zel avanga a chunga an lungawi hle laiin, amah thlannaa vote pe ve hauh loten thikthu an lo zawng hi chu thil mak tak a ni. 

Heta sawi ka tum ber chu, speaker dinhmun hi a ni. Speaker hi Assembly a hruai mekah hian eng ang dinhmuna ding nge nia a inhriat ang aw? MNF MLA a nihna aṭanga Speaker ta a ni a, MNF rilru a tlansan vek beisei phak a ni lo. Mahse, dana rorelna tak takah chuan, ruling party leh opposition party-te hleih bik nei lova danin a tum ang taka rorelna dik keng mai tur dinhmuna ding a ni. A kaihhruai Assembly chinah chuan a thu chu thu tawp a ni. Tuna thubuai rem tur a hmachhawn chungchangah chuan, CM leh Minister dangte nen party rilru pu tur an nihna-ah an dinhmun a dang daih tih pawh a hriat ngei a rinawm e. 

Assembly pumpui dan anga ang khata  hokhawmtu a ni. Assembly chinah thu tawp neitu a ni a, mah se, dan anga rorelna a la inzawm zel thei. Chutah pawh chuan nghet taka ding thei, speaker chhuanawm tak a nih zel i beisei ang u. Tuna kan ram roreltu party hi “Pathian leh kan ram tan” tih aupuitu an nih angin Isuan, “A ram leh a felna zawng hmasa zawk rawh u, a tih leh Tirhkoh Paula’n, “Lalpa duhzawng eng nge ni,” tih lo hre hmasa zawk rawh u a tih ang a, Lalpa duhzawng mila dikna kenkawh  a tum ngei turah ngai ila. Mi huaisen tan chuan, politician huaisen, dikna duh tia tun hnu thleng pawha a ṭha zawnga hming chher theihna tur niin a lang. 

Mi dawihzep leh mahni hmasialna rilru nei tan chuan, mahni sahimna leh pawl tana hnawk thenna tura a thuneihna hman mai pawh thil awl tak tur chu a ni.