Pathian biak in dik kan hai zo ta!

Solomon-a'n Jerusalem Temple Pathian hnena a hlan dawn khan, 'I chhiahhlawh leh i mi Israelte hian he mi hmun lam hawia an ṭawngṭai hunin, an dilnate lo ngaihthlâksak ṭhin ang che' tiin a dil a.

Kha Jerusalem Temple kha Pathian chenna hmun entirna, symbol mai niin Pathian chenna hmun tak zawk erawh, Solomona vek hian, 'I chenna hmun vana'n lo ngaithla la; tin, lo ngaithlain ngaidam ang che' tiin min hrilh a nih kha.

Lal Isua lo kal thleng pawhin he rinna hi, Israel fate'n nghet takin an la chhawm nung reng tih, Samari nu nena an inkawm ṭum khan kan hmu a nih kha. He ngaihdan tho hian Zoram ringtute hi min la bual â ve ta tlat reng a nih hi.

Kan inrin hma hauha hrilêngin min nuai thut a, tun thlenga kan biak in zawng zawng khar a la nih thleng hian, ringtu tam tak thlarau nun chu thlalera hnim ṭo ri re ang maiin a ro fip zo ta a nih hi. 

Paula khan Hebrai kaltlangin keimahnia sual bet tlat leh, min tihnawk apiang thlauhthla tur leh, Timothea kaltlangin ringtute chu rinna-a intlansiakna ṭha bei turin min fuih a. Amah ngeiin intihsiakna a beih zawh tawh thu pawh, fuihna angin min hrilh bawk a nih kha.

Mahse, Zoram ringtute'n intihsiakna kan neih duhzawng erawh Paula intihsiakna ṭha nen chuan a danglam hlauh a nih hi. Kohhran mi in neih tam siakah te, ruai in ṭheh ropui siakah te, zaipawl in neih ṭhat siakah te kan tlan nasa a.

Sande sikul in kai ṭhat siakah te, thawhlawm in thawh tam siakah te, inkhawmpui in neih hautak siakah te, zirna in in neih ṭhat siakah te, kohhran upa atâna khawvel ngaiha mi ropui in thlan chhuah siak kawngahte kan inel nasa ta.

Kan inelna pui ber pakhat erawh, Pathian biakbûk sak ropui kawngah niin, a pung awma loan pûk chawpin mipui economy han thlir ngial pawha, mipui ei leh bar, sum leh pai thawh chhuah khum zâkin, fawren châkkhai tinrenga thuam biak in kan sa sup sup a. 

Kan biak in a ropui tial tial a, ka in la fekfawnin kan in la puithu tial tial bawk a. Chutih reng lai chuan kan biak inah thlarau chaw ei tur a tlem tial tial a, Thlarau Thianghlim hnathawh hmuh tur pawh a vâng tial tial thung a nih hi. 

Biak in chhûngah lah chuan nungchang ṭha ber, hmangaihna leh tlawmnaa khat nun neiin hun kan hmang liam ṭhin a. Keimahniah duhamna, hlemhletna, itsikna, chapona leh suahsualna tinrengte'n hmun an chang ngai bawk hek lo.

A tawpah phei chuan heng kan biak inte hi kan pathian biak zo ta hial a. A chhûngahte chuan zahawm takin, kan nungchang mawi lai leh ṭha lai ber berte kan lantir a. Biak in hung pawn lama kan nun chu eng anga ṭawp leh tenawm pawh ni raw sek sek, pawi kan ti tawh lo.

Mite'n min hmuh theihna kan biak inah erawh, vantirhkohte ang maia duhawma khawsain, ngai ṭha êm êmin kan hun leh nite kan chhiar liam ṭhin a nih hi. Chu nun lem lutuk aṭang chuan, biak in ni lova Pathian hminga inpawlkhawmnate thlengin kan ngai thei lo zo ta a nih hi.

Mahse, zawlnei Hosea'n, 'Ka mite chu hriatna tlakchham avangin tihboral an ni' a lo tih ang chiahin, nitin sual vanga thlanmualah boral mekte sûnna hun kan hmang reng a. Sualin a man beh tlatte lah, a ni telin kan pung tual tual si a nih hi. 

He biak in chibai bûkna hian rah chhe tak chhuahin, biak in pawn lama Pathian ṭihna; Thufingin, 'Lalpa ṭih chu sual huat hi a ni; Chapona te, uanthuanna te, thil ṭha lo chinna te, ṭawng chaltlai te hi ka haw takzet a ni' a tihte erawh, pawisa alawi kan awm tak.meuh loh phah ta zawk a!

Puala'n Korinth mite kaltlangin Zoram ringtute hnenah, 'Pathian in in nih leh Pathian Thlarau nangmahniah a awm reng tih in hre lo em ni?' tiin zawhna min zawt ta mek a. Biak in baka rawngbawlna leh, inpawlkhawmna kan ngaih theih lohna pawhin a vawrtawp a thleng ta mek a nih hi.

Zoram Kristian nunah hian mak takin, biak ina fel taka inkhawm a, Sande sikul kai a, ṭha taka thawhlawm thawh a, inpawlkhawmna (fellowship) hrang hranga tel a, hla zir leh fehchhuahnaa tel piah zawng, miin Thlarau Thianghlim zirtirna leh kaihhruaina hnuaia biak in pawna thil a tih vaih chuan, kal sual leh kal filawra ngaih tlatna a awm reng a nih hi!

Penticos nia Thlarau Thianghlim hnathawh leh, a baptisma miin lo changin, Petera-te ang khan kan hmuh leh hriat sawi lovin kan awm thei lova ni, tiin biak in pawn lamah rawngbawlna nei ta se, Zoram Kristian ngaiah chuan kal sual a ni nghal der a nih hi!

Lal Isua ngeiin kan hnenah, "Pathian Lehkha Thu leh Pathian thiltihtheihna inhriat loh avangin in ngai sual ṭhin a ni' tiin min zilhhau ta a nih hi. Chuvangin, Zoram Kristiante hian biak in dik tak, keimahni ngei hi siam ṭhat a duh ta a ni.

Lal Isua ringtute kalkhawmna hmun, a biakbûk ni lovin Thlarau Thianghlim chenna keimahni ngeia hi zah a, ngaihlu a, enkawl uluk a, Pathian ṭihna hmuna hmang tur leh, Amah chawi sânna hmuna hmang tawh zawk turin, tun hun hnuhnungah hian Pathianin min phut ta a nih hi.

Biak in kan ṭihna leh kan inzah siaknaah kan ram damna pakhatmah a awm lohzia kan hmu tawh a. Biak in sak ropui viau avanga kohhran a dam tak thu lah kan hre ngai bawk hek lo.  Kan nihna zawng chu, lang theia ropuina zawng ringtua kan chhuahna mai hi a ni.

Intihthupuifun siaknaah Pathian a lawm lo a. Chhûngrila taknaah zawk Lalpa a lawm ṭhin. Zoram ringtute hian Pathian chenna biak in dik tak kan hriat thar a, chu biak ina chu Thlarau Thianghlim thiltihtheihna hmanga kan thuam tawh zawk a, taksa leh thlarau dam lo zawng zawng damna kan nih vek a hun ta a lo ni zawk e.