L Keivom aṭanga zirlai
Mizo thu leh hla chhiar ngaina ve tawh îk tan chuan L. Keivom (15, July, 1939 – 28 November, 2021) kha hriat loh chi a ni lo va. A lehkhabu ‘Zoram Khawvel’ hmanga Zo fate thu leh hlaa lo chawm tawhtu a ni tihte phei chu tlang hriat a ni ang. Matric pawh mathematics avanga fail, beidawng lova zir chhunzawm zel, a tawpa IFS (India Foreign Service) ni thei a ni.
L Keivom thuziakte han chhiar hian mi tumruh leh huaisen a ni tih a hriat theih ṭhin a; hlawhtling tura bei vak ṭhin mi ni pawhin a lang. Ama'n, "Dan naranin, ka zin buai loh chuan kar tin artikul puitling, thu mal 2,500 – 3,500 vela sei ziak turin ka inbituk a, ka hlen deuh zel bawk a. Kum sawm chhunga ka ziak tawh zawng pawh lehkhabuah khung lut ta ila, bu sawmnga chuang leng ni tawhin ka hria," tia a sawite khan a taimak zia a tarlang chiang hle.
Kum 35 zet India sawrkarah hna a thawh hnuin kum 2002 May thla khan a pension a. A pension hnuah pawh chawl hahdama awm mai mai duh lovin, Hmar ṭawnga Bible lehlin a tum a, mi tam tak a râwn nghe nghe. Thil hautak a nih thu leh mi thiam rualte paw'n kum 10-20 an buaipui ṭhin thu leh, a dam chhunga a lehlin hman loh tur thu an sawi a ni awm e. Amerawhchu, a chhiarkawp hmangin zawh hman a inring a. Ni tin a tlem berah darkar 12 a buan a, minute tin a hman hlawk chuan kum 4-5 velah zawh hman a inring.
Tichuan, tuk tin zing dar 7:00 aṭanga hna ṭanin, zan dar khat thleng a thawk ṭhin a. Kum li a vei hmain lehlin hnapui chu a zo dêr a, editing tih nan kum hnih a hmang a, kum 2007 October thlaah a tlangzarh hman dêr a ni. "Hemi Baibul, Delhi Version kan tih hi phek 1,686-a chhah, thu mal 8,65, 754 awmna a ni."
Amah vekin, "Baibul lehlin kan beih ngawrh anga ngawrh hian tu pawhin hna thawk se, an hlawhchham theih ka ring lo," tiin a sawi hial. (L.Keivom Thukhawchang Vol.1,2011, p.36)
Mi hlawhtling nih i duh chuan hun hlutna hria la, i hun neih hlu taka hmangin rim takin hna thawk rawh. L. Keivom hna thawh dan khi hre reng bawk ang che.
‘Thawhrimna zawng zawngah hian hlawkna a awm a, kâa sawi mai mai erawh chuan tlâkranna mai a thlen a ni,’ Thufingte 14:23
- Zoliansanga Tlau