Kawng chhiat vanga indem tawnna hi

Fûr ruahtui a lo tla a, Mizoram kawngpui khawi lai mahin a tuar lo. Khawpui chhung kawng pawhin a tuar lo. Ruahtui tlak hma khan sorkar tharin theihtawp chhuahin kawpui kawng chu an chûlmâm ve hman. Ruahtui lo a tla a, a khawk leh nghal nasa mai. Chûlmâmna chance awm reng reng lovin ruahtui a tla ta ngat ngat a; khawpui kawng khawkrawk a tam a, khaw kar kawngpui a chhe sawp kawi nuaih mai a; indem tawnna a lo thleng ta a ni.

Opposition lamin, “ZPM chu an insawi ang an ni lo,” an tih laiin, ZPM lam chuan, “An sorkar laia kawng siam kan hmang mek zawk a ni,” an ti bawk. Tun ang zela kan kal chuan hetiang indem tawnna hi a reh mai mai dawn lo. A chhan zawn chhuah tum zawk ang u.

A ṬOBUL A FUH LO

Mâwl takin kan sawi kan sawi ve ṭhin. Mi thiam tam tak kan nei, kawng tlona atana ṭulte chu an hre nasa, kawng metal hi engtia chhah tur nge, eng lung nge hman tur, alkatra eng zat nge hman ngai tihte chu keini aiin an hre daih zawk. Tuna kawng kan siam dan hian kum eng zat nge a daih ang tih pawh an hria, a tlo dan tur pawh an hre lutuk; mahse, an thiamna chu hmanin a awm ngai si lo.

Mi ramin kawng an siam dan Youtube lamah hmuh tur a tam mai. Kawngpui siam kum 50 daih tur reng reng chu cement concrete chunga black top siam vek a ni. Bihar CM Nitish Kumar kawng siam lai pawh hmanah ka zuk hmu ve tawh. Prime Minister hlui Manmohan Singh-a hun laia India rawn dung leh vâng kawngpui sial tlang highway leh Mumbay aṭanga Pune super highway siam pawh ka hmu ve tawh. Heng kawng zawng zawngte hi concrete chunga blacktop vek a ni.

KAN RAM VE HI LE

Kan ram leilung leh ruahtui tlak dan aṭang hian tuna kan kawng siam dan hi chuan kum khat bak a support lo. Kan lung neih lah a chang ṭha bawk si lo. Hun rei atana hman tur atan a hman tlak lohzia chu, Bairabi–Sairang rel kawng siam aṭang khuan a hmuh theih nghal. Anni chuan kan ram lung an hmang ve reng reng lo, state danga mi lung chang an rawn phur lut ngat ngat mai a ni.

Lung chang nei ṭha ve lo ram kan nih rau rau chuan, kan lungte lung changa chantir nan eng ngati nge cement kan hman mai loh? Kan sawi fo tawh ṭhin, cement concrete-a kawng siam a tlo zawkzia chu, Bawngkawn–Ṭhuampui kawng siam aṭang hian example ṭha tak kan hmu vek. A hautak em alawm kan ti a ni mai thei; kum khat chhunga kan siam theih thui lo mah se, sorkar term khat chhung, kum nga chhung chuan thui tak kan siam hman ang. Kan rawtna hi chu zâwm ila, kawng chhia sawi reng mai hi a reh deuh ang maw le.

VAI COMPANY HMAN NGAI LO CHI

Hman ní chu thinglang kawng blacktop-a siam mektu Vai ho zingah kan kal a, company bungrua lianpui pui nen an lo inchhawp rup mai a. An kawng siam chu kawng zîm tê, a zawhtu pawh khaw tam tak ni bawk si lo hi a ni a. Ka ngaihtuahnaa lo lang nghal chu, heng Vaite hmang lo hian kan kawng siam dan hi Mizo pa thawh theih cement concrete bawk hian siam ila, a zawhtu motor lah an tam lo viau bawk si. Tun hnaia thingtlang kawng kan siam dan cement a hautak lutuk lova kan siam dan hian siam ta ila, kan senso sum lah ram pawnah a chhuak lo ang a, Mizo pa contractor tam takin an siam ve thei tho dawn bawk si. Vai company hmang kher lo hian, Mizo pa tih theih zawng hian kan hna hi kalpui a va ṭha em.

KAWNG FEET HNIHA ZAUH DAN

A bikin khawpui kawng hi, khawi lai mai pawh hi a zîm em em vek a, zauh ngaihna a awm tawh lo, a sirah in kan sa khat vek tawh. Kan kawngte a zîm tawh nâk alaiin a sirah tuihâwk luankawr, thûk kêk kûkin kan la siam zui, kawng kan siam zîm lehzual hi a ni ringawt mai.

He kan tlang ramah hian tuihâwk luankawr khuar kêk kûka siam ngai lohna, V shape khuar lutuk lo, hmun ṭhenkhata kan siam ṭhin, a ṭul changa motor pawhin a dai theih mai chi hi, tuna khuar kêk kûka kan siam ai hian siam ta ila, tuna mi ai hian kan kawng a zau ngei ngei ang.

Hmun ṭhenkhatah khuar siam ngai chu a awm ngei mai; khuar siam ngaihna laiah hian a chhinna kan siam nêp em em bawk si. Hei pawh hi a chhinna lam hi motor rah ngam tura chhah ṭha tawk siam ni se, a ṭul changa rah ngama kan siam chuan khawpui kawng kan neih hi feet hnih ṭheuhin kan zauh thei ang.

Heng kan rawtnate hi kan hotute beng thleng phak ve se. Hna nêp tê têa kalpui lo hian kan siam chin hi tlo se la, Vai company hmang lo zawng hian, Mizo pa contractor hian kan hna tam tak chu an siam ve thei ang a, kan economy pawhin hma a sawn phah ve ang maw le.

- Lalrinliana Colney