Mizote kan la rinawm e

Hmanni chu kan motor Tata Xenon-in Lunglei-ah chanchin­bu dahin kan kal a.

Zana kal kan ni a, Lunglei pana kan tlan mup mup laiin ka motor ke chu a lo bo daih mai a. Kan tum ram kan thlen hnu chuan dan pangngaiin a tukah Aizawl lam panin kan lo let leh mai a, ka motor ke spare chu a tla tih pawh hre loin in kan thlen chuan garage-ah motor ka dah lut mai a.

A tukah chuan ka motor chu a balh em avangin ka tifai vel a, tah chuan ka motor ke la thar ṭha tak cheng sang sing dawna ka lei chu a awm lo tih ka hre chhuak ta chauh a. Ka han ngaihtuah let vang vang a, a bona tur awm ka hre thei hauh lo a. Lunglei pana ka kal dawn khan a la awm reng tih chiah ka hre thei.

Ni thum vel a ral leh hnu chuan a ke spare ka tihbo Tata Xenon bawk chu khalh chhuakin Sikulpuikawn lamah ka kal a. Ka motor ke bo chu zawn ngaih­na pawh ka hre tawh chuang lo a. Sikul­puikawnah sawn thing­tlang aṭanga lo kal motor pakhat nen hian kan in sulpel a, chu motor-a chuang nu pakhat chuan min rawn au vak vak a, keimah min ko a ni tih pawh ka hre lem lo a.

An motor chu tidingin min rawn au leh a, eng nge ni tia ka va chhawn chuan chunu chuan, Chamring aṭanga lo kal a nih thu leh ka motor ang chiah, motor sen lian deuh (Tata Xenon) ke an chhar thu a sawi ta a. Tichuan, hmanhmawh taka a phone numbar te min pek hnu chuan traffic a lo kal a, kal tura a hrilh hnuah an kal sawn leh ta a.

A phone number min pekah chuan ka va phone a, Pu Lian­mawia, Chamring khua ami chuan min lo chhang a. Kei chuan motor ke ka tih bo thu leh a awmna chin ka la hriat loh thu te ka han sawi chuan a ni chuan motor ke an chhar thu min lo hrilh ve bawk a.

Pu Lianmawia chuan tih ngaihna an hriat loh thu leh chan­chinbu leh TV lamah motor ke tibo an awm leh awm loh an ngaihven reng thu te sawiin a neitu an zawn mek thu min lo hrilh a, tichuan ka motor thar ṭha tak ke cheng sing dawn senga ka lei chu Chamring khuaa pa rinawm tak hnen aṭang chuan engmah phut let nei loin ka hmu let leh a, ka lawm hle a ni.

March ni 11, 2015 pawh khan Vanglaini-ah ngei hian Kawnpui leh Buichali inkar kawng siam mek atana ram lak neitu pahnih H. Lalnghakliana, Kawn­pui Chhim Veng leh Zoramthanga, Kawn­pui Bangla Vengte chuan zangnadawmna an dawn tur chu an dawng duh lo a, kawng­pui siamna atan an pek kir thu an rawn ziak a ni.

Ka han sawi lan duh ber chu Mizote hi kan la rinawm a, Mizo tlawmngaihna leh rinawmna hi a la bo lo a ni tih hi a ni.

Mi ṭhenkhatin Mi­zote hian rinawm­na, taimakna leh tlawm­ngaihna kan nei tawh lo angin an sawi ṭhin a, mah se; Mizote hi kan tlawmngai a, kan taima a, rinawmna kan la vawng nung reng e.