Tam ngaisang hnam kan nia lawm le!

Chapchar Kut kan hman dan faktu an awm a, seltu an awm bawk.

Tun ṭum chu a seltu lamah ka ṭang a, kan Chapchar Kut kha Free Concert nen a danglamna chu a khat tawka hnam lam awm leh CM hoa kan kal khawm kha a ni deuh ber mai.

Infiamna tura phul lem phahah ngei mai kan han kut ta a, Lammualah concert neih kan hal dawn loh tehlul nen Chapchar Kuta kan awm dan kha chu concert nen a danglamna hmuh tur a awm lo. Music an play a, sound system ṭha tak an chhawp a, Mizo zaithiam langsar tak tak an zai a, an hla sak chu Mizo nen inzawmna nei lo.

Mizo hnam zai lam hawi pawh ni lo, tunlai hla lar eng eng emaw an sa a, Mizo kut pui bera hun pawimawh ber an la chang zui hi ka ngaihdan a ni vak lo.

A buatsaihtu lam chuan, "Mipui an tama a hlawh­tling," an ti ngei ngei ang. Tam ringawt hi hlawh­tlinna a ni lo. Tam duh hrim hrim vanga zai mup mupa a hminga 'Chapchar Kut' tih leh ringawt chu ka ngaihsan zawng a ni lo. Tam hi kan lawm ve hrim hrim a, kohhran thila punkhawmnaah pawh mipui zat hi an puang uar ziah mai a, tam deuha lan hi kan lawm a ni.

Chapchar Kutah pawh Mizo thil hlui aiin mipui tamna tur kan dah pawimawh zawk a, zaithiam ve dek dek chu an zai deuh vek tawh a, free concert nen an sawi zawm pawh kha a mak ka ti ta lo e.