Naupang inkhawmpui leh thawmhnaw thar

Kohhran hrang hrang hian kum tin naupang sunday school inkhawmpui kan nei ṭhin a, naupangte’n an puala inkhawmpui awm hi nuam an tiin an hlim thei hle ṭhin. Kum khata naupangte puala hun bik siam hi a hlu em em a, Pathian thu leh hlaa an nun châwm seilenna kawng atan pawimawh leh ṭangkai tak a ni.

Hun eng emaw aṭang khan naupang Ssunday school inkhawmpuiah hian thawmhnaw thar neih kan intihhmuh ta tlat a, hei hi a ṭha nge ṭha lo tih hriatthiam a har. Nu leh pa ṭhenkhat chuan an fate awlsam takin an leisak thei a ni mai thei a, mahse, nu leh pa ṭhenkhat tan chuan naupang inkhawmpui hi phurrit leh huphurhawm a tling thei hial awm e.

Ngun taka ngaihtuah a ngai a, a ṭhatna nge ṭhat lohna tam zawk ang tih ngaihtuah chian a ṭul ta hle. Kum khatah vawi khat naupangte’n an puala inkhawmpuiah hian thawmhnaw thar nena inkhawmpui hi a hlu ve alawm titu tan chuan a dik thlap a; amaherawhchu, kohhrana kan nunphung, chet velna leh incheina erawh hi chu ngun taka ngaihtuah hi a hun tawh tak zet niin alang.

Krismas a lo thleng a, kan fate thawmhnaw thar leisak an ngai leh a, ṭhenkhat tan chuan a huphurhawm asin. Nu leh pa tam tak hi an rûm vawng vawng a, Kristiante ni pawimawh hi phurritah a chang zo ta emaw tih mai turin hrehawm ti takin an kun tlawk tlawk a. Heng mite hi kohhrana tel, kohhran mite tho an ni. Kan inenkawl danah hian eng emaw chu kan tih a ngai niin a lang a, inher rem hret kan ngai niin a lang ta.

Naupang sunday school inkhawmpui chauh a ni lo va, bial inkhawmpui, kohhran hmeichhe inkhawmpui leh ṭhalai pawl inkhawmpuiah pawh a ni tho. Chu miin a nghawng chhuahte pawh a ni mai thei, naupang sunday school inkhawmpuia thawmhnaw thar neih heti tak maia kan uar ta hi? Ngaihtuah chian a ṭul hle a ni.

Naupang inkhawmpuia a theiin an fate thawmhnaw thar an leisak hi sawisel rual a ni lo. Chutihrualin, a theiate pawh hian ti lo ngam ila, a thei ve lote pawhin tih ve hram hi tum lo ila, naupang sunday school inkhawmpui hi thawmhnaw thar neih ngei ngeina tur a ni lo tih hi nu leh pa leh zirtirtute hian kan inzirtir hi a ṭul hle a ni.

Naupang sunday school inkhawmpui lo thleng turah hian kan tu leh fate hnenah thawmhnaw thar hi neih ngei ngei tur a ni lo, tia inzirtir hi ṭul sa lohvin a ṭul ta a ni hi.

Thawmhnaw leh incheina hi a pawimawhin a ṭangkai em em a, chintâwk kan neih erawh a ngai. Chuti lo zawng, nakinah chuan kohhrana telte hi miin hautak an ti lutuk palh ang tih a hlauhawm a nia.

- Mala Pachuau