Politician-te thlalak/lim hâl hi

Mizote hian kawng hrang hrangin hma kan sawn ve zel a, keini hriat phak ve chinah mai pawh hma kan sawn nasa hle a ni. Khawvel zau zawk kan hmu phak tawh a, thil ṭha lam leh ṭha lo lam thlengin kan khâr chhawng nasa tawh hle. Kan Mizo nunphung leh khawsak dan thleng hian ram dang tih dan kan entawn nasa tawh khawp mai. Kan hnam nunphung ṭha leh mawi leh kan sakhaw zirtirna pêla hnam dang tih dan ṭhenkhat kan lak (copy) erawh hi chu thil ṭha tak a ni lo.

Kan pi leh pute kha mi pawi sawi hlau tak, aia upate zah thiam leh ṭhenawm khawvengte tana mi hnawksak nih hlau tak an ni a. Kristian an nih hma pawh khan Zo nun ze mawi kan tihte leh Kristian zirtirna mil nunpui tlat kha an lo nei a ni. Kristian kan nih hnu hian Zo nun ze mawi chu kan hloh ta mek zawk a, hnam dang tih dan, kan sakhaw tan pawha ṭha lo hi kan la lut ta mek zawk a ni mai em? Ngaituah chian a ṭul ta hle mai. Kan ram hruaitute leh politics-a inhmang zawng zawngte hian ngaihtuahna an sên a ṭul tak zet a ni.

Politiciante thlalak/lim inhâlsak hi tun hma aṭangin kan state-ah hi chuan sawi tur ting chu awm ve bawk mah se, a tam lo khawp mai. Sawrkar order duh loh vanga order copy hâl erawh chu a awm ve zauh ṭhin. Tun hnai, August 22,2024-a Chanmari West AMC Ward no. VI by-election neih tur kaihhnawih thilah MNF leh Congress ṭhalaite huaihawtin Pu K Sapdanga thlalak/lim an hâl a. Tun hma lama kan politician-te lim hâl kha tute nge tih leh a hun pawh ka hre ta mai lo va, thil thleng khât tak a nih vang pawh a ni awm e.

Eng pawh ni se, thlalak inhâlsak hi kan state-ah hi chuan a tam lo khawp mai a, thil lawmawm tak pawh a ni a, kan Kristianna vang pawh a ni mai thei e. Tun hnaia kan Home Minister thlalak an hâl kha AMC by-election dawna thil thleng a ni a, han chhui zuia a chhan leh vâng lam ûm zui emaw, politics-a hlâwkpui an awm leh awm loh lam emaw pawh chhui ka tum hran lo.

Thlalak/lim inhâlsak hrim hrim hian eng nge a tum, tih lam zawk hi ngaihtuah tham tak awmin ka hria. Miin thil pawi lian tham leh ram tana thil ṭha lo a ti a nih chuan dan anga hma la turin law court-a zualko theih a ni a, kawng dangin duh lohna lantir mai pawh a kawng ni zawk awm tak a ni. Ram hruaitu pawimawh ber berte thlalak kan hâl hian Mizo hnam hmai a tibâl a, ram rorelna chan phahna pawh a ni chuang lo.

Thlalak/lim inhâlsak kher hi chu, an hâl taka chungah khan thil chhe ber pawh thleng se pawi an ti lo tihna nge? A hâltute rilru puthmang hi chutiang chu a ni reng em? Ram hmangaihna rilru aṭanga chhuak nge? Mi dangte îtsîkna rilru leh politics-a hlawkna zawn vang zawk? Hengte hi ngaihtuah theih tak a ni. Thil chiang tak erawh chu, kan duhsak takte lim chu kan hâl ngai lo va, lim hâl hrim hrim hi ring lo mi, hnam dang chîn dan ṭha lo kan seng luh zinga mi ngei niin a lang bawk.

Mizote hi kan la tlemin kan la inhre tawn deuh ṭhûm a, politics avanga inenhrang leh inhaw tur kan ni lo. Political party hranga awm tak avanga kan inhmelma en mai a nih chuan kan inpumkhatna ṭha tak, kan Zo nun ze mawi thlengin kan hloh zel ang a, kan sakhua leh kan rinna thlengin nghawng ṭha lo a nei thei ang.

Politics leh mei hrim hrim hi thlun zawm chi niin a lang lo, remna aiin buaina leh harsatna thlentu mai a nih dan kan hriat vek hnu a nih kha. Kan Aizawl khawpui leh khaw tam takah rambuai laiin kângmei nasa tak kan tuar a, a rapthlakzia kha ṭhangthar hre pha lo tam tak an awm tawh a ni. Kan in leh kan thil neih chhun kâng ral vekte kha politics kaihhnawih vek a ni a, vawiin thlenga rilru dam lo an la tam a ni. Politics awmze dik tak hre chung zelin kan politics khelhna kawngah hian kan fimkhur a ṭul hle a ni.

Kan Pathian thu thiam leh sakhaw hnarkaite hian lim/thlalak inhâlsak hi kan Bible zirtirna aṭang hian kan tih awm a nih leh nih lohte hi han sawi thei se a ṭha mang e. Kohhran inzawm khawm pawl (MKHC) leh MPF-te pawh hian thlalak/lim hâl hi a awm zel loh nan hma la thei se a duhawm hle bawk. Thlalak/lim hâl mai bakah tharum thawhna lam hawi zawnga politics kalpui hi kan Kristianna nen suih zawm harsa ka la ti reng fo mai.

Hawh u, tu thlalak/lim mah hi i inhâlsak tawh lo teh ang u, unau inpêng tawn ṭheuh kan la nih hi. Pathian leh kan ram tan hian rinawmna nen ṭan i la tlang dial dial zawk teh ang u.

- H. Lalchhuanliana