Pathian thuawih hun

Hmanah Pastor pakhatin Pathian thuawih hun min hrilh a, tun thleng hian ka la theihnghilh thei lo. Kha Pastor kha a dangdai khawp a, speaker ṭhenkhatin aw tham ṭek ṭuak a, "nangni rul thlah te u," an ti satliah ang hian thu a sawi ve miah lo, ka hnenah hian zawi te hian, "Pathian thu i awih hun tur chu maw sual tura thlemnaah i luh dawn lai tak hian a ni. Nula chetsualpuina remchang i hmuh hunah tak te, i hnathawhna a eirukna tur remchang i hmuh lai tak te'n Pathian thu awih rawh," a ti roh a!

Mizote tluka kan landan aṭanga Pathian thuawih hi kan tam hian ka ring lo. Chawlhni zinga kan inchei dan leh kan ṭhut felfai dan aṭang ringawta teh phei chuan keini aia Pathian thuawih hi an awm lo ang a? tih tur khawpin kan mawiin kan fel fai a, Tirhkoh Paula zirchhuah pui niawm tak tak hi kan kat nuk mai nia.

Mahse...

Mihring nuna pawi ber mai chu 'Mahse...' hi a ni awm e. Entirnan: a hmel hi a ṭha khawp a, mahse... 'an chhungkua chu an fel asin, mahse....' MAHSE tih a tel tawh chuan Side B lam ngaihthlak tur hi a awm nual thin a lo ni. Ni e, Mizote'n Pathian thu kan awih danah pawh hian 'Mahse...' tih a ngai ta a nih hi!

KṬP/ PYD/ ṬKP/ SAY etc te'n kohhran kaihhnawih thil tih tur kan ngahzia leh kan inkhawm hnemzia ngaihtuah hian Pathian thuawih hun hi kan van hre si lo tak!

Khawi kohhranah pawh 'lehkha tar ngat' a innei ngam kan tlemzia te ngaihtuah hian kristian ṭhalaite hian Pathian thuawih hun tur dik tak, "zan thim thama mahni nen chauha awmlaia Pathian thuawih' tur kha kan theihnghilh palh ṭhin niin a lang. Mahni a Pathian thuawih harsat em em si hi a huho chuan Pathian thu kan awih leh em em tho si!

Biakin tlar hmaah inkhuih pial van chungin kan ṭhu a, hnuai lam pawh melh ṭha peih lo in chung lam kan en voh voh a, kan thawhlawm thawh hnemzia kan ngaihtuah a, he kohhranah hian kan thu ve em! kan ti rilru a, Pathian thuawih kan inti em em a.

Mahse, Thawhṭan a lo ni a, office-ah eirukna remchang kan hmu a, chung lam aiin hnuai lam kan melh nasa leh zawk si. Pathian thuawih hun tur diktak 'eiruk dawn lai tak' te khan Pathian thuawih in han ti lo ta ṭhin i la chu 'eiru tamzia' hi kan iak kan iak pui lo deuh tur. Kan ram pawh hei ai hian tlem tal chuan a changkang ve mahna.

Lamtualah kan han lam durh durh a, 'Amen heiha' kan han ti a, vanram hi kan kai hmel chiang em!

Mahse, inkhawm kan bang a, Pathian thuawih hun kha automatic-in a in 'off' nghal a, ṭhenawm nu bai tui lohzia te, an Pa thawuihzia te, an fa te sam phir si theihzia te kan han sermon tak tak a... Amen tih chhuahna 'ka' kha a ni ta lo em ni chu aw? tih mai tur hian a turu buru a! Midang ṭhatlohna kan sawi dawn lai tak te, ṭhenawmte ka rel zuah zuah dawn lai takte hian Pathian thu awih ṭhin ila chu, mi ka rel lo ang a, mi ka sawichhe lo anga, hahdam takin kan 'ka' hi a chawl tur a!

Theipui hauh hlum leh kan nun!

Hmanah Isua'n (te han ti ila... kan sermon mai dawn em ni ang?) theipui kung a hau thi a, a hauh chhan chu a ril-ṭam laia chu theipui kunga thei a lo rah loh vang a ni. Theipui rah hun a la ni lo zui!

"Tehkhin thu in ka 'ka' ka ang ang" ti tu pa hian entawn tur min lo pe reng mai. Biak inah te, inkhawmnaah te, kohhran thil tih na reng rengah hi chuan Pathian thuawih tur sa reng kan ni a, Petera thuhretu ang maia thuawih tur kan ni.

Mahse, tuman min hmuh loh lai te, nula mal no zuta 'kan thinlung sual bawlhhlawh hnu' kaihthawha a awm dawn lai tak te, dik lo taka sum tam tak hlepru tura thlema kan awm lai tak te, midangte tlin lohna leh fellohna sawi a remchan em em lai tak te, hna zawnnaah tling lo chung chunga kan putea/ patea te puihna zara tlin kan tum lai tak te hian Pathian chuan rilṭamin min en a, keimahniah rah lawh tur a zawng ṭhin.

Biak inah ngawt ni lo, kan sawi tak ang hun remchang kan hmuh lai zawng zawngte hian 'Pathian thu hi awih ṭhin ngat ila chu vawiina buaina tam tak hi chu chin fel a ni tur. Mahse fianrial aiin a huho a Pathian thuawih nuam kan ti tlat si.

Nang, Biak In chauha Pathian thuawihtu i ni em le?