Fashion Photography

Tunlai hian Face­book leh print media lamah Fashion Pho­tography chungchang selna lam chhiar tur a awm ta fo mai. Side A lam kan ngaithla nual tawh a, side B lam tlem azawng thlir ve ila.

Thil reng reng hian ṭhat lohna a neih rualin ṭhatna pawh a nei vek. Khawvel ṭhang mekin a ken tel thil hi tu pa rawt phur chawp ngai miah loin a awm hran ve a, tun hnaiah Mizote pawh taksa enkawl, in leh lo vawnfai, zuk leh hmuam lama inthiar fihlim kawngah te, ei tur ṭha leh hrisel ei uar kawngahte hma kan sawn hle. Aizawl khawpuia food industry ṭhang chho thut hi kan hmuh hmaih ka ring lo, fashion industry phei hi chu thawmhnaw dawr tam danah hian a lenzia a lang mai.

Beauty care lamah pawh parlour a ṭhang a, customer pawh an awm ve zel. Lei pang lehlama incheina leh mawinate chu tapchhakzawl aṭangin kan hmu thei ta a, chu ka thil hmuh leh hriatte chuan chona leh phurna min pe a, khel loa a kentel pakhat chu fashion photography a tuihalna hi a ni.

Ram changkang zawkte anga kal a la harsat rih avang leh modeling agency puitling pawh a la awm loh avangin kan Mizo nula nalh tak tak te, designer leh artist duai lo tak takte leh photographer hmanraw nei ṭha tak takte hian an mawina leh an kutchhuak nalh tak tak te khawvel entir hi chak viau mah se, keini ang ram retheiah chuan duh anga ke pen chak a harsa si laitak hi kan mu-tan chu a ni.

Sorkar hian sports lama a thawh ṭhat ang hian youth services lam pawh tihtakzeta kan tih chuan kan Mizo model-te hi an duai lo leh viau ang.

Tun dinhmunah chuan inphochhuahna chance a van em avang­in social network - facebook leh WhatsApp ah te, Magazine cover-ahte hlawkna um miah loin an inlar ve chauh zawk a ni tih hi kan hriatthiampui a ṭha. Heng lehzel hi chu umzuiin i bauh i bauh lo ang u, kan ti khaw­ngaihthlak em mai.

Kan nula hmelṭha leh lehkhathiam hetiang lama tui mi ṭhenkhat te, an nu leh pa te pawn an tuipui em em te, 'Facebook-model' tiin kan vaihma a, a dik lo. 'Mal man neilo' te kan tihsak a, mahni hnam pui hmeichhiate zahlohna ṭawngkam hman fo hi hnam mawl apiangah a nasa.

Mal hi man neih tir vek kher a ṭul lo, mal man nei duh chu zanah Zodin leh a chhehvelah kal mai rawh se, an lo tlar put mai ang.

Chuvangin, he khawvel mifel tak reng awm lohnaah hian ',al man nei lo' titute hi miten, 'mifel thawhchhuah nei lo', 'Hlawh nei loa thuziak' min tih ve loh nan hawh u, thil hi a ṭha lo lai sawisela duhtawk mai loin, a ṭha lai leh chhuanawm laite inhmuhsakin intiphur tawn ṭhin ila, mahni koa lum hi rinawm leh taima takin i thawk ṭheuh zawk ang u, chu chu Kan Pa vana mi duhdan pawh a nih ka ring.