PAWL RAM KA HNE!

Mizoramah hian Kohhran hrang chi engzat chiah nge awm tiin kut zungṭang thlep meuhin ka han chhiar chhin a, sawm chuang vel chu ka chhiar thei! Kei ang mi vak zim lutuk pawn chuti zat ka chhiar thei a ni a, kal fawr kohhran nen phei chuan kan tam awm mang e. Tin, political party kan tih pawh hi panga vel chu nghet deuh tak kan nei bawk!

He ram zimt>, mihring pawh uihum zat lek awmna ni si-ah heti tak maia pawl hrang kan tam mai hian ngaihtuahna a hruai thui angreng khawp mai. Mizote hi heti em em hian a ni maw kan lo inlungrual loha kan rilru a lo ngheh loh, tih ngaihtuahna min neih tir.

Pawl tin mai hian kan awmna pawl hi ṭha ber leh dik berah kan ngai ṭheuh emaw tih mai turin, kan pawl tih dik loh hi kan hmu thei lo viau mai lehnghal. Chu mai a ni lo, kan pawl ni lo zawng chu dik loah kan ngai deuh ṭhum ni berin a lang. Chuvang chuan pawl ramah kan buai a, kan pawl din chhan lam kan ngaihtuah chang tawh lo ṭhin.

Kohhrante pawhin koh­hran danga mi kan kohhrana an rawn luh hian hmasawnna ropui takah kan ngai a, kohhran ram lak tumin kan bei ṭhin ni berin a lang! Kan chhehvela ringlo mite leh kohhran belh nachang hre lo, kan khawtlanga mite hruai luh tum ai chuan, kohhran danga mi hruai luh tumin kan inrim tlut tlut fo. Hei hi kan kohhran din chhan a ni em? Kan inenfiah a van ngai em.

Kohhran pawlah hian chhandamna leh vanram kaina a awm lo a, kan Bible-ah zawk hian a ni chhandamna chu awm zawk. Eng kohhran mah hi tidik famkim an awm ka ring lo a, eng kohhran mah hi vanram kai lo tur sa an awm ka hre hek lo! He mi chungchangah hi chuan mimal tin hi kan pawimawh. Pathian leh kan inkar a fel em, tih hi a pawimawh zawk.

Chutihrualin pawl kalsual laklawh, zirtirna fimkhur lo lutuk avang erawh chuan buaina a tawh theih viau ang. Ṭhenkhat chuan kohhran thurin kan tihte hi kan chawi vawng viau mai. Kohhran thurin chu engnge? Bible hi a ni mai lo’m ni? Kohhran hrang hrangin thurin hran hran neih hi eng nge a ṭul na? Bible-a thu inziak chin hi paih leh belh nei loin pawm mai ila a tawk mai lo’m ni? A hranpaa buaipui vut a ṭulna ka hre lo!

‘Ka ngaihdan chuan,’ ti ti lo hian kan Bible-in a sawi chin hi pawm tawp mai ila, tute emaw vei chiam lo hian keimahni nun ṭheuh hi vei ila a ṭha mai. Pawla inhruai luh tum avanga Pathian thu inhrilha inhneh tum vak vakte hi a ṭul lem lo. Duh thlang thei tura A siam vek kan ni a, kan Bible-ah hian duhthlanna tur dik chu min kawhhmuh bawk a - hei hi a tawk mai. Hre miah lote hnena hriattir erawh chu kan mawhphurhna a ni. Chuti ni loa pawla inhruai luh tum avanga in vei chiam chiam mai hi a dik lo. Pawl rama buai tawk lek, ringtu inti ve te thlarau chan ang hi ka chang ve ang tih ka hlauh ru tlat! Kohhran pawla buai tawk hi chuan Pathian ram hi an vei thlen phak tak tak pawh ka ring nek lo e.

Chutiang chiah chuan ram veina kawngah pawh hian a ni. Party pawla buai tawk lekte hi chuan ram hi an vei kuak tak tak ka ring lo. Mahni pawl tihdik loh tawha inchhirna leh zah nachang hriat a hneka, “Anni pawl pawh eng nge an nih bik…?” ti tiho pawl hruaitute hi chuan min hruai ṭhat a rinawm lo.

Ram hmangaihtu tak tak chuan, a tih dik lohah inchhirin sim nachang a hre tur a ni. A tih dik loh an sawi apianga, a tih ṭhat lam leh midang tih dik loh lam a lo sawi len fo chuan ram hruai tlak a ni lo. Hetiang mi hi chu mipuite pawn kan hnawl ngam mai tur a ni.

Ram hruaina fawng an chêl laia engmah tikaw tak tak chuang si lovin hruaitu hnuhnungte tih dik loh leh ṭhat lohna an sawi ve chiam zel te, an tihsual chang rana mit an lo meng ve kawr ṭhinte hi a zahthlak ngawt mai. Mipui te’n hruaitu tlakah min ngai lo a ni ang, tia kimkit ahneka ‘kan sawrkar leh hun chuan,’ la ti ṭang ṭangte hian kan ram an siam ṭhat tak tak ka ring thei lo. Pawla buai tawk lek ringtu intite leh ram vei intite hian kan ram hi enkawl tum lo law law se kan ṭhatpui zawkin ka ring!

Mahni aiin mi dang, ṭha zawkah ruat tur tih thufing hi chu kan ram political party hruaitute nunah hian hmuh tur a vang ve khawpin ka hre ṭhin! Mi dang tih dik loh hi sawi nuam an ti em em a, mahni tihsual erawh chu phat mam dan leh khuh mawi dan an zawng char char emaw tih mai tur a ni.

A tuate mai pawh hi party tih velah hian nghet tlur lem lo ila, dik lo nia kan hriat reng chu hnualsuat ngam mai zel ila a ṭha ngawt mai. Mahni tihdik loh pawm satliah ngawt lo hian, inchhirin sim tak tak ngam zel ila chu kan ram hi a rum a rum lo tur. Party-a buai tawk lek ram hmangaihtu inti ve te ram hmangaihna hian min tiṭhuanawm zawk ni maiin ka hria!

Kan thlahtute aṭanga kan lu phumna a ni a, tih leh eng emaw vel mai mai avanga party-a nghet tlut ringawt maite hi kan ṭhanharh san a hun tawh.

Ram aia party hmangaih zawk emaw tih mai tur mi tam tak kan la awm reng maite hi a dik lo, mi ṭha dip raltu pakhat a ni. Eng inthlan thlan emaw pawh kan la hmachhawn leh zel ang - ‘hei chu kan party mi leh sa a ni lo… eng mi pawh nise kan party a ni tlat…’ ti vel mai maiah buai loin, mi ṭha a nih leh nih lohah i buai tawh zawk ang u. Tichuan, kan ram hian hmasawnna tak tak kan chang ngei ang.