Facebook-ah i zahawmna ti dere suh!

Mark Zukerberg leh a ṭhiante, Eduardo Saverin, Andrew Mc Collum, Dustin Moskovitz leh Chris Hughes te chuan kum 2004 ah Facebook hi an ṭhianho inbiak nan tiin an lo siam a. Hun a lo kal zel a, tunah chuan tiang hian mi zawng zawngin (ziak leh chhiar thiam, phone internet support nei tawh phawt chuan) an khawih tawh a, account an nei ta fur mai a ni.

Mizote pawn ṭhian tur zawna siam nan te leh kawppui tur ngaihzawng zawn nan te, nupui pasal in zawn nan te, chanchin thar chhiar nan te leh upload nan te, thu thar inhrilh chhawn nan te mai bakah thil tam tak atan kan hmangin kan chhawr ta a nih hi. A lian a te, nula tlangval aṭanga a pitar a putar thlengin facebook account kan nei ta fur mai. Nei lo chu tlemte kan nih a rinawm. Tun dinhmunah hian khawvel pumah facebook hmangtu hi billion khat aia tam an awm mek a. Chung zingah chuan nang leh kei pawh kan tel.

Tunlai khawvelah chuan facebook khawih lo leh facebook-a account nei lo chu mawl nih leh changkang lo nihna a ni ringawt tawh a, a mawl ber aṭanga a fing ber thlengin kan khawih ta. Internet sites dang khawih nana internet pack thun nana kan sum hman ral chu sawi loh, facebook khawihna tur ringawt atan pawha nitina kan sum hman ral ringawt pawh hi eng zata tam ni ang maw? Chhut tham fe a ni.

Kum reilote chhungin tiang khawp hian Mizo mipuite hian facebook hi kan khawih nasa a, a hman dan leh a khawih dan te pawh kan thiam chakin, a chhawr pawh kan chhawr ṭangkai ta hlawm khawp mai. Kei ngei pawh hian ka chhawr ṭangkai a, ka hmang ṭangkai khawp mai. Hriatna tih zau nan mai bakah thu thar chhiar nan te hmang tak ka ni. Mahse, chutih rual chuan a hmang thiam lo leh chhawr ṭangkai thiam lo te, hmingchhiat phah nan te leh mualpho phah nan tea lo hmang tawk erawh kan awm veleh zeuh zeuh thung ṭhin niin a lang.

Tumah mi ṭha famkim leh fel famkim kan awm miau lo a, a hmang ṭangkai tawk leh hmingṭhat phah nan te leh lar phah nan te a lo hmang tawk an awm laiin, a hmang thiam lo tawk chu an lo awm lo thei lo. Indem theih ngawt pawh a ni hran lo, tu te emawin an lo hmang sual palh ṭhin pawh hi. Chutianga kan khawih nasat a, kan hman nasat tawh avang chuan Mizo mipuite pawn kan hmang thiam viau tawh alawm le kan intih mek lai hian, sawi tak ang khan a la hmang thiam lo hi kan la tam niin a lang a, mahni zahawmna te pawh mi ṭhenkhat hi chuan facebook-ah hian kan ti dere ṭhin ni hian a lang.

Internet sites pakhat a nih tak avang ringawt hian kan ngai hoin, kan ngai thutak lutuk lo a ni mai thei. Chungte avang chuan status kan update duh danah te, kan wall-a kan thu post duh danah te, kan thlalak kan upload a, kan post duh danah te hian kan fimkhur lo palh ang tih a hlauhawm khawp mai.

Mihring zahawmna hi thil hote hmanga humhim theih a, tih ropui theih a nih lai hian, thil hote hmang vekin engmah lo maiah a chhuah theih a ni tih hi nula leh tlangval, nu leh pate hian kan hriat a pawimawh hle. Chuvang chuan he facebook-ah hian keimahnia zahawmna awma hi theh dere emaw, engmah lo maia chantir i phal lo ang u. Chu kan zahawmna chu he facebook hmang hian chawi nun zel tum ila, he internet site pakhat hi a hmangthiamlotu nih aiin a hmangthiamtu nih i tum ang u. A bikin nula leh tlangval te hian, kan status kan update duh dan te, kan wall-a kan thu post duh dan te leh kan thlalak kan upload duh dante hian kan zahawmna a tinep theiin, a tibawrhbang thei a ni tih hria ila, heng thilah te hian i fimkhur ṭhin ang u. Kan thusawi chhuah duh dan te leh kan inlan chhuah tir duh dante hian eng ang mi nge kan nih tih a lantir ṭhin tih hria ila, facebook-a kan thusawi duh danah te i fimkhur ṭhin ang u. Nula tan chuan zahmawh rawng kai te leh, hmeichhe easy anga lantir thei tur ang zawng tea status update fo mai te hi zahawmlohna a nih bakah, mipaten an zuam a, engahmah an ngai lo ṭhin tih hriat a ṭha ve khawp mai.

Group-a thu kan post duh dan aṭang te leh, status kan update duh dan aṭang te hian mipa tan zuam chi kan nih leh nih loh te a lan mai bakah, mipaten zuam tur ang chi an hre lutuk tih hi hria ula. He site pakhatah ve mai mai hian inzahawmna ti dere lo hram ula, tute emaw zuam mai mai theihin awm lul suh u, Mizo hmeichhia te u. Mipate pawn he internet site pakhatah ve mai mai hian midangte hmuhnep theih tur zawng leh, kan zahawmna hloh tur ang zawnga awm i tum lo ang u.

Hmeichhia an thlalak aṭanga hmelṭha kan tih zawng te leh, kan duh ang zawng te pawh hi va biak huam huam chin loh a ṭha. Ka rin aiin Mizo mipa ṭhenkhat hi chu hmeichhia kan lo lawmin, kan lo duh ni hian ka hria. Hmeichhe ṭhenkhatin an status-ah leh group ṭhenkhatah, hmeichhe awlsam deuh anga lang thei tur ang zawngin thu han ziak hlek se, like leh comment duh tawk ta mai loin, inbox lama umzui nghal chawt kan ching.

He facebook hi kan zahawmna tih dere na hmun atan ni loin, humhimna hmun atan, aṭangkai thei ang berin hman i tum ṭhin ang u, a bik takin ṭhalai te hian.