ZOKHAW LAM HRISELNA

Minister-in hmun kilkawra doctor-te hlawh tihpun a tum thu a sawi hi a lawmawm.

Thingtlang lama doctor thawkte hi khawpuia an doctor puite ai hian kawng tam takah an work environment a chhe zawk a, dinhmun harsa an tawh chang a tam bawk ṭhin. Heng avang hian increment hi an phu viau a ni. Hmun kilkawra awm that tirtu a nih ngei a beiseiawm.

A tlangpuiin Mi­zoramah hian mi 2500 velin doctor pakhat an inṭawm ang a ni a, damlo 1400 velin nurse pakhat inṭawm ang a ni bawk. Zokhaw lam doctor hian a khaw mipui mai bakah a chhehvel khaw mipuite a vil a, doctor pakhatin mi 4000-5000 zet vil chang a tam ka ring.

An nitin damlo en bakah vantlang hriselna, hna thila zin, hriselna lama tlangauna, dam­dawiin inrelbawl, emergency leh chhungkua mimal chhiat ṭhat thila an buai ve a ṭul. Hei vang hi a ni ang an indaih loh fo ṭhin.

Greenwood Hos­pital-a doctor pakhat chuan khawl changtlung hi nei ila chuan ram hausaa doctor-te ang hian ṭha takin (efficient) damlo kan enkawl dam ve thei tawh ang a ti. Hmun kilkhawra doctor-te hian khawl ṭha ve deuh chu nei sela tun ai hian hna an thawk ṭha thei zawk ang. Hmunpui pan ngai tam tak a pumpelh theih bawk ang.

Ultrasound, en­dos­copy, biopsy, hae­matology leh inzai tenau te hi sub-division tinah tal hi chuan tih theih ve vek theih sela a duhawm. District tinah hian hmeichhia, naupang, medicine, ENT, inzai, naupai lam (obsteric) leh ruh lama thiam bik pakhat tal neih theih a va itawm em.