AMC parking fee khawntu tur kha
Tunhnaia Aizawl Municipal Council (AMC) chuan Aizawl khawpui chhunga motor parking fee khawntu tur zawngin tender a chhuah a, mi tam takin an chhang a. A khawntu tur an thlan danah thil dik lo a awm niin PRISM chuan thuthar thehdarhtute an hrilh.
PRISM-in RTI hmanga an chhui zuina aṭanga a landan chuan AMC-in parking fee khawn tur an thlan danah induhsakna a awm niin a lang a, hei vang hian kum khat chhungin AMC hian Rs. 32,21,040 lai a hloh dawn a, hei hi thil pawi tak a ni. AMC-in tender a chhuahah a chhang sang ber pek an nih bik loh dan an siam a, mahse heti em ema hloh tura induhsakna a awm hi thil fel lo tak a ni.
Mahni party mi induhsak hi Mizo-ramah a nasa em em a, sorkarna chelhtu Congress-ah pawh a ni a, AMC sorkarna changtu MNF pawhin hleihluak takin a ti tih PRISM-in RTI hmanga a dil chhuah aṭang hian a chiang hle a ni. Sorkar sum hloh tur zawnga induhsak uchuak lutuk hi duh taka kan thlan lalte hi chuan an tih loh hram a duhawm ngawt mai.
Parking fee khawn tur tender chhuahah hmun 56 zingah hmun 34 chu a chhang sang ber ni lo hnenah an pe a, hmun 24-ah phei chuan a chhang hniam berte hnenah an pe a ni. Chuti chuan a chhang sang berte pe loa a chhang hniam zawkte an pek avangin cheng nuai 32 zet kum khatah a hloh dawn ta a ni; a rap-thlak tak zetin ka hria.
Tender an chhuah dan hi a dik lohna a awm lo mai thei a, mahse a chhang sang sang pek mai awm, a laihawl pawh ni lo, a chhang hniam ber mi 24 zet hnenah an pe hi thil mak tawpkhawk a ni. Area pakhatah phei chuan a chhang sang berin Rs. 1,00,070 laia a chhan laiin reserve price Rs. 40,000-a chhangtu hnenah pek a ni mauh mai a, a chhang sang ber an pek loh vangin he hmuna AMC-in kum khata sum a hloh tur chu Rs. 60,070 lai a ni a, thil fel lo lian tak a awm niin a lang a, induhsakna hleihluak lutuk a ni.
Heng parking fee tender chhang a, a chhang sangte hnena pe loa a chhang hniam an pek avang hian court-ah pawh thubuai a awm ngeiin a rinawm a, chu chuan AMC hmai fai ṭha tak kha a tibal ngei dawn a, a pawi tak zet a ni. Official lam pawhin sorkarna chelhtu Mayor leh councelor-te thurawn a pe lo nge, official-te hi thurualpui lem loin anmahni duhsak zawng zawng an pe ngawt tih pawh hi hriat a chakawm khawp mai. Engpawh nise thil dik lo leh hnathawk
ṭha chungchang hi kan chanchinbu lam aṭangin chiang deuh zawka hriat i lo tum phawt mai teh ang.
- Lalthlamuana