Tui, gas, buhfai leh power a ṭha

Hun eng emaw chen aṭang khan Mizoramah tui, gas leh buhfai dinhmun a ṭha viau a, duhthusam erawh a ni lo. Mahse harsatna em em a awm lo a, mipui pawh kan phunchiar lem lo. Eptu party lam tih loh chu.

Aizawl khawpui leh district khawpui dangah pawh duh thala hnianghnarin tui kan hmu lo mai thei, amaherawhchu harsatna em em a awm khat ta hle. Hei hi a enkawltu minister ṭhat vang te, department hotute thawh ṭhat vang te, minister leh department hotute inlungrual vangte a ni ngei ang.

Hun kal tawh lamah khan a bikin Aizawl khawpui tui pump chho turin power supply-ah harsatna an tawk ṭhin a, hei hi P&E department chet ṭhat loh leh power supply an pek ṭhat loh em vang a ni lo. A changtu minister-in PHE leh Power department hotute a kokhawm a, thawhho dan tur ṭha zawk a awm em tiin open takin a sawipui niin ka hria. Chuta ṭang chuan power supply a ṭhat loh vanga tui pump chhoh theih loh sawi tur a awm ta lo. Hei hi a enkawltu lam an chet ṭhat vang a ni a, tui harsat em em pawh kan tawk ta lo tih kan hre vek awm e.

Buhfai leh gas chungchangah pawh a changtu minister chak vang te, department changtu tenen an thawho ṭhat vangte a ni kan ti thei ang. Pu K Sangṭhuama'n supply minister a nih lai khan oil leh gas chungchangah buhfai chungchangah a hmunah kalin harsatna nasa tak a lo chingfel tawh a. Chutiang bawk chuan tuna kan supply minister hian theihtawpin hma a la a, ti hian harsatna em em a awm lo a nih hi.

Eptu party ten buhfai kudam a ruak hlek a, "Bang rawh se" an han ti ngawt ṭhin hi a nuihzatthlak zawkin ka hria. Theihtawp chhuahin minister hoin department official-te'n ṭan an la a, mipui kan ṭam loh nan te, gas kan nghei loh nante theihtawp an chhuah a, chhuah zel bawk rawh se.

Hetihlai hian power supply pawh state dang ai chuan kan chhe bik lo. Hei pawh hi a changtu minister leh department officfial-te'n theihtawpa hma an lak vang a ni. Kan tharchhuah aia tam fe kan hman a vangin power hian duhthu a sam lo tih erawh kan hriatpui bawk.

Kawng chung-changah erawh hmalak nasat a ngai hle mai. A changtu minister leh department hotute'n theihtawp chhuah teh se. Rangvamual kawng helna pawh siamṭhat theih loh tlat maite hi mipuiin kan hrethiam lo. A kawng chu a awm ngei ang.

Kum 1985-a Tlabung kawng blacktop pawh tun thlengin chei zui a awm lote hi enge a kaikuang ni ang le?

- Lalremruata