Investigative Journalism tih kha

Vanglaini May 1-2, 2016 chhuakah khan "Investigative Journalism leh Investigative Journalist" chung chang Pu H.C. Vanlalruata khan ngaihnawm tak leh bengvar-thlak takin a rawn ziak a. He hna atana mi kan neih lohzia leh hetiang hna thawktu tur chanchinbumi kan mamawhzia a rawn sawi a. A rawn sawi hi a pawimawh hlein ka hria a, hman aṭang tawha hetiang lam ti mi kan neih lohzia leh kan mamawhzia hi ka rilrua ka lo vei ve ṭhin a ni.

Mizote hian hman aṭang tawhin chanchinbu chi hrang hrang kan nei ve ṭeuh tawh a, amaherawhchu thil chik taka chhui a, thil thlengte chipchiar taka achepakaia chhui chhuaka report ṭhin hi an vang hle. Investigate tih chu J.F. Dictionary-ah chuan - chik, endik, enthlithlai tihna a ni a. Sawrkarin thil ṭha lo a tihte chhuichhuak a, sawrkar khalh ngil nana hman kha a pawimawh em em a, chu mai bakah chuan khawvel thil pawimawh lo thleng thut thutte eng thil pawh lo thleng se a lo thlen dan leh a chanchin kimchang report theitu hi an pawimawh bawkin ka hria.

Thil pawimawh lo thleng thut thut ṭhin - breaking news-ah te hian thil chik taka chhui a, chipchiar taka report theitu reporter te hi kan mamawh tak a chu a niin ka hria. Kan ram chanchinbu-ah te hian thil lian tham deuh pawh lo thleng se a bul a balah pawh chhui lovin a ler lam aṭangin thil hi a chhum bung rem ruma report, hriat theih deuh nial nual chauhte hi a ni ṭhin. Kimchang taka thil thleng chanchin han hriat chakawm tak takte pawh a chiang lo ruai ṭhin a ni.

Hman deuh, Senhri chanchinbu a chhuah ṭhin lai khan ka la hriat reng chu Pu H.C. Vanlalruata hian thil thleng pawimawh deuh te hi a chepakaia chhui chhuakin chipchiar takin a chhuah ṭhin a, a bengvarthlak bik em em a ni. Khatiang a thil report ṭhin kha mipui tan a hlu hle a ni. Chuvangin, chanchinbu mite zingah hian hetiang lama mi inpe lo chhuak tam deuh deuh se a ṭha ngawt ang.

- Sanga Ralte,

Luangmual, Aizawl