Zirlaite leh Scholarship

Hmanni lawka Mizo Students' Union bul tuma scholarship an hmuh tur ang an hmuh lawk loh avanga college zirlaite lungawi lo kawng zawh kha kan hmu hlawm ang a. An chanvo hren khawtlai sak vanga an lungawi lohzia lantir kha Democracy rama chengte tihawm reng a ni. Sawrkar pawhin an lungawi lohna chu dik tiin a ngai pawimawh a, tun thla (March) thla chhung ngei hian an scholarship lak tur chu pek a tum thu a puang nghal ni awm tak a ni. A lawmawm hle.

Scholarship hi dawng tur kan ni em?

Mi tinin hma kan sawnna tur hi sorkar hian a ngai pawimawh a, zirlai lamah pawh zirlaite zirna senso tih ziaawm nan scholarship chi hrang hrang - merit scholarship, pre-matrict tribal scholarship, post-matrict tribal scholarship leh special scholarship te a pe chhuak ṭhin.

Tun hnai kum hnih thum liam ta mai aṭang phei kha chuan Minority Scholarship a pek chhuah bakah zirlai hmeichhe tan bik Incentive to Girl Child Scheme a siam a, kan nihlawh takzet a ni. Mahse a nawlpuiin kan dil theih leh kan hmuh ngei ngei tur emaw tia kan dil ṭhin hi a dik vek lo a, pawl sang lamah post-matrict tribal scholarship leh high school chin hnuai lamah minority scholarship-te tan a ni. Mizote hi tribal kan nih avang leh hnam tlem/ hnufual (minor) kan nih avang hian a tua te pawh hian dil tur leh dil thei niin kan inhre vek hlawm a. Post Matrict scholarship leh Minority Scholarship dil tur hian tribal certificate te, income certificate leh residential certificate te thil tel a ngai a. Post matrict scholarship dil tur hian a diltu zirlai nu leh pa kum khat lakluh chu Rs. 100000 (nuai khat) tling lo leh minority scholarshi dil tur chuan kum khat chhunga Rs. 50000 (sing nga) lalut tling lote leh an exam-naa 60% marks hmu phak chin zirlaite tan chauh dil theih niin ka hria.

Tribal certificate leh residential certificate-te hi chu a dik ṭhin viau a, amaherawhchu kan income certificate erawh hi chu 99.+ % hi a dik lo hialin a rinawm. Chutiang dawt hmang chuan scholarship hi kan dawng ṭhin. Minority scholarship phei hi chu Mizoram sorkar hian 25% a tum ve tur a ni a, sorkar pachhiatzia ngaihtuahin la kan tam poh leh kan sorkar leiba hi a pung tam ting mai dawn a ni.

Chakai nufa inzirtir

Kan fate hi mi dik leh mi rinawmah ṭhang lian se kan duh vek. Thu dik sawi turin kan zirtir a, kan hriat loha pawisa la mai mai lo tur te, Pathianin misual a hrem ṭhin thute nen lam kan hrilh ṭhin. Ṭhenawm khawvengte nena ti ti chang pawhin kan faten thu an awizia kan sawi uar hle ṭhin.

Mahse an lo ṭhang lian a, sual tenau deuh kan palzut dan leh kan pawi sak lohzia an rawn man chho a. An tet laia kan zirtirnate khan awmzia a nei thei tawh lo a, mahni inthiam chawpin 'chu mi officer fate pawhin an dil' tih leh a dang te sawiin an inthiam chawp a, a tawpah income certificate dik lo kan siam a, dawt hmangin scholarship chu kan dil chhuah sak leh nge nge ṭhin. Hetianga kan tih hian naupangte hian nu leh pa rilru an hre chak khawp mai a, chakai nufa kal inzirtir te pawh kan ang ṭhin hle.

Kan ti lutuk deuh em?

Kan fate chuan an chanvo ngei nia an hriat an scholarship phut chhuah tumin an intiam rual a, kawngpui hnawh phui mup mup khawpin Aizawl khawpui kawng an han zawh ta tak tak a. A kaikuang ber an puh kan sorkar hotu lu ber Chief Minister chu ṭawngkam mawi lo tak takin an au khum a. An ṭawngkam duh tui loh luatah sorkar ṭan lotute pawhin zirlaite au hla kha an tui pui tawh zawk daih a ni.

Tun hnuah chuan tute pawh sorkarin Chief Minister se, Mizo hnam, tribal mai mah ni ila kan pi leh pute hun aṭanga nunze mawi nei, aia upate biak dawn pawha zahawm taka in koh dan nei kan nih avangin hetiang ṭawngkam mawi lo hi bansan vang vang chi a ni.

I ngaihtuah chiang ang u

Scholarship la thei tur chin hi bituk neiin sorkarin fel takin a siam a, a dil thei chin dik takten an dil a, an hmuh hian an lawmpui awm em em a ni. Tu tute emaw avanga an chanai tur hmu lo an nih chuan dan angin lungawi lohna chu lantir se, mi zawng zawngin kan thlawp ang. Mahse Mizo zirlai 99.+ % hi chuan zirlai kan nih chuan scholarship hi dil ngei tur leh hmu ve ngei turah kan inngai a, kum khat chhunga kan sum lakluh zat, income certificate-ah erawh chuan dawt sawi kan hreh leh miah lo.

Hemi chungchangah hian nu leh pate hian a mawh kan phur lian khawp mai. Dawt sawi duh loh vanga dil lo ngam mi tlemte kan awm laiin, a tam zawk hi chuan kan faten scholarship an hmuh theihna tur a nih phawt chuan thil dik loa tih kan hreh miah lo a, Kristian kan nihna theihnghilh ṭhakin dil a hmu ve ngai turah kan inngai tlat. A nih leh dawt kan sawi avanga kan faten scholarship an lak hi kan ṭangkai pui chiah em le?

Tun chinah fa ṭha leh fel neih kan duh takzet chuan keimahni hi dik ngam ila. Dik leh rinawm tura kan duh kan fate hian an nu leh paten dikna leh rinawmna kan ngaisang tak tak a ni tih an hriat chuan an nunah an ṭhan len pui ang a, mi tin kan rinawma kan dik chuan chhungkua, veng, khawtlang leh ram a lo nuam ang a, ngampa sarhin Pathian kan pawl thei bawk ang. Tichuan, kan dam chhung nite hi nuam ti takin inchhirna leh zahna tel loin kan hmang thei tawh dawn a ni.