Naupang sunday school inkhawmpuiah I fate rawn hruai ve rawh

Mizo Kristiante’na kan hun pawimawh leh naupangte’na kan nghahfak, kan nuna hun pawimawh leh kan khualzin kawnga min khalh ngiltu Naupang Sunday School inkhawmpui chu a lo thleng leh dawn ta. He hunah hian i tu leh i fate kha an tel ve dawn em?

Naupang thawmhnaw thar leina tur kan nei ve si lo a, kan tu leh fate chu kan teltir ve dawn lo i ti a nih chuan, i ngaihtuah chian a va ngai tehlul em. Kan missionary-te khan engvangin nge naupang sunday school khawmpui hi an lo buatsaih a, eng nge he khawmpui hian tum a neih, tih erawh kan ngaihtuah chian a ngai khawp mai.

Tuna pitar leh putar, nula leh tlangval, tleirawite’na kan Bible châng hriat leh kan sawi theih zawng zawngte hi kan naupan laia sunday school inkhawmpui dawna kan châng zir leh kan fak hla zir zawng zawngte kha a ni e, ti ila kan sawi sual loh a rinawm. Chutiang a nih si chuan naupan laia sunday school kai ve ngai lote hian a eng bung leh châng nge an rawn chhiar a, an rawn hriat ve tak ang le?

Kan ziakfungte hi tun Io ngai kawi lo se, tunlai sanah naupang kum tling lo pawngsual lo hluar ta em em te, hmeithai kâwngvawn sum ît vanga tualthahna thleng mek te, dai hnaia mi huan thlai, a neitute awm loh kar hleka lo bo leh ta fo te, vantlang hmun zah nachang hre hauh lo te, veranda leh in bula mi ar bo ta fo mai te, kawng laia mi wallet/purse leh mobile phone thlauh khuangcher bo ta hmak ṭhinte hi eng vanga thleng ta fo nge ni ta ang le?

A chunga kan han sawi tak zawng zawngte hi naupan laia sunday school kai ṭhinte chuan an pumpelh ṭhin ti ila, kan sawi sual awm lo ve. Kan naupan lai chuan sunday school-ah kan zirtirtute’n Zakaia chanchinte leh chanchin dang tam tak min zirtir ṭhin a. Hun a lo kal zel a, ṭhangtharte remhriatnain a flim (video)-in kan lo hmu leh a. Chuta kan rilrua thil rawn thlengah chuan, kan naupan laia kan zirlaite kha kan zirtirtute khan rinna mitin Zakaia te kha min lo hmuhtir hi a lo ni reng mai tih hi a ni. Naupan lai pawha sunday school kaina tur nei ve lote leh kal ve lote leh zirna sikul pawh kai bawk si lote chan leh nunphung leh chetla lai hi i lo hmu ve ngai em?

JAC-te’n an koha nunphung an hrilh fote hi naupang sunday school kai ngai lote zuk ni zel a. Naupang dangte’n Sunday tlai leh inkhawmpui dawn zing leh tlaiah biak in leh a vela an zîk mur mur laia naupang zilhhautu leh kawng dik kawhhmuhtu nei ve lote chuan dai velah leh khawlaiah an teivâk a. Chutianga naupang khuahkhirhtu nei ve lote chuan tawn loh tur sual, meizial zûk rûk, Denrite hîpte an lo ching ṭhin a ni.

Kan khualzin kawng kan zawh mek lai hian sum leh pai leh hausakna ringawt ûma hringnun hmachhawn tur hian kan lal lsua khan min zirtir lo. Naupang chu a kalna âwm kawngah chuan zirtir u la, a upat hun pawhin a thlah lo vang tih a nih kha.

Naupang sunday school inkawmpuiah i fate rawn hruai ve rawh; chutichuan i tu leh i fate hringnun zinkawng chanve i hruai thleng dawn nia.

- Hranghmingthanga