Sorkar hnathawk tur lak hi
Mizoram sorkar chuan a hnathawk tur chi hrang hrang a la ṭhin a, hengah hian thiamna inang rau rauah sorkar hnathawk awm lohna chhungkua aṭang lak tam ni thei se, kan ram hmasawnna chi khat a ni ang.
Kan state-ah hian sorkar hna bak sum lak luhna a tam lo viau mai. Mi state angin company lian leh innghahna tlak kan la nei ve lo a, industry changtlung, ṭhalai tana belh tlak kan la nei lo. Kan sum hnar ber chu sorkar hnathawk hlawh lak nghah a ni tawp mai. Chuvangin, sorkar hnathawk hlawh lakah thui tak kan la innghat a, sorkar hnathawkin hlawh an lak tlai leh kan sum bawm a phai rei mai a nih si maw.
Sorkar hnathawk hlawha kan innghat thûkzia chu tihian a chiang mai. Hlawh an lak dawn hnaih leh hlawh an lakah bazar leh khawlai a lûnin sumdawngte pawhin an in hralh theih phah a. Thla tawp ni 20 vel aṭang chuan bazara veivak pawh an tlem pharh reng hi.
Tunlai hian sorkar hnathawk lak a awm nual dawn a, police pawh eng emaw zat an la thar leh dawn. Hengah hian political fitness ringawt ni lo, mi ṭha leh mi dik, ruihhloa buai lo tur tih chiang chauh la se a duhawm khawp mai. Party inrawlh lo bawk se a lawmawm khawp ang.
An lak turte pawh chu a tling an nih rau rau chuan sorkar hnathawk awm lohna chhungkua duhsak hram a ṭha khawp mai. Kan sum hnar ber chu sorkar hnathawk hlawhah a innghat tlat mai si a.
Hun hmasa lamah khan police chi hrang hrang lak an ni tawh ṭhin a, khang zinga a tam zawk chu political fitness an ni tlat; a nih loh pawhin police officer duhsak zawng an ni deuh zel. Khang an lak zingah khan ruihhlo vanga buai ta, bân leh tak pawh an tam mai.
Tun ZPM sorkarah hi chuan police an ni emaw, hna dang a ni emaw, thiam inang rau rauah sorkar hnathawk awm lohna chhungkuaa mite duhsak thei hram se a duhawm. Hetiang ti tur hian veng tin leh khaw tinah YMA an awm a, hman ṭangkai theih tak tur an ni. YMA chu politics-a inhnamhnawih lo ber tura ngaih an ni bawk a, a fair ber ang.
Chutiang ni lo a, thiamna nei ṭha si, party ngaihtuah lo, rilru thianghlim taka lehkha zira inziak tling ṭhalai fel tak takte rilru kan hliam nasa lutuk ang tih a hlauhawm hlel lo e.
Tun hma deuh kha chuan party induhsakna a na lutuk a, chumi phênah chuan officer fing verther ho an lo che ve vat bawk si. Police lal pakhat phei chuan a vua leh vâng bakah an chhungte chhung leh chhawng a thun ṭeuh mai niin an sawi a, an chhungte la ni tur thlenga sorkar hnaa thun pawh an hria. Hengho hi ministry pawh hian a ven lêt a ngai ta hial a nih hi maw.
- Helen-i Pa