Chapchar Kût = Free Concert

Mi tam takin sawi tawh a, mahse kum danga kan tih zel lohna tur leh ruahman dan kan thiam theih nan kumin Chapchar Kût kha tuai nawn leh ka duh. Chapchar Kût nge Free Concert tih kha a hriat mang loh tlat mai kha chu ruahman dan kan thiam loh vang a ni.

Kût tur kan ni a, chai a, lâm a, kan hnam lâm leh hnam nun tilang a, mitena Mizo nun an hmuh theihna turah khawthlang ram concert ang luai luai mai kan ni kha chu a kalphung lo hle mai. Zaithiam zaitir hrim hrim kha ka sawisel a ni lo, concert ang chia kan kalpui kha ka duh lo zawk a ni.

Khatiang zela kan kûtpui ber mai kan hmang zel a nih chuan nakin lawkah chuan Chapchar Kût chu concert-na hmun angah kan ngai ang a, ticket siamte pawh kan la duh rum rum hial mai ang tih a hlauhawm hle. Chapchar Kût hi zaithiamte in show-na tur hmun a ni lo hrim hrim a, mahse programme tihphuisuina tur chuan thil ṭha tak pawh a ni mah na, mahse kan tihdan ang luai luai kha chu a dik lo.

Kût a ni tih kan hria a, sap ṭawnga festival an tih leh Mizoten kût kan tih hi a awmze phung a inang lo. Mizotena kût kan tih chuan kan ngaihtuahna, rinna leh eizawnna nena inkungkaih hunpui eng emaw, hriatrengna te, lawm­na te puala kan serh kha a ni. Tuna kan kal dan luai luai hi chu a ho lam ta hle mai a, huau huau lâwm hrim hrim kalna tur âwm tawk a ni ṭep ta mai.

Show chi hrang hrang kalpuina hmun, zaithiamte an zai a, concert ang maia mipui an lam nuai nuaina hmunah kan chan ta. Khawthlang ram nunzia nen kan chawhpawlh nasa tial tial a, a Mizona a bo mai ang tih a hlauhawm thei mai dawn. Hnam nunzia lantir a, Mizona tilang tura kal khawmah thu sawi a tam em em maite kha a intu lo. Thusawi ngaithla tura kalkhawm kan ni lo a, kût tura kalkhawm kan ni. Kût chibai inbûkna thu tawite te chu awm mah se a pawi lo e, thusawi tur kan dah hnem lutukte kha chu a zia lo lam hret a ni.

Kum dangah pawh kan la kût leh dawn a, Mizo leh­zuala kalpui dan ngaihtuah tawh teh se. A ngaihtuahtute hian kan kût dan kha an thlirlet ve ngei ang a, free concert zia anga kan kal ta lutuk te kha siamṭhat dan ngaihtuah se a lawmawm ngawt ang. Mizo takin, kan hnam nihphung leh tunhmaa kan hnam nunzia tilang tur zawngin i ngaihtuah teh ang u.