Kan ram hmasawn nan statistics

Vanglaini chhuak hmasa lampang tawhah khan "Kan ram hmasawn nan statistics i zir ang u" tih lampang kha ka chhiar a, a ṭha hle mai. Ka han tuihnih ve ang e.

A bik takin Mizote hian statistics hi eng nge a nih a, eng chen nge a huam a, engtiang chiaha pawimawh nge a nih kan la hre tam lo khawp mai. Statistics bikah phei chuan zirlai pawh kan tlemin kan la hmelhriat ṭha a, Master degree zir chhuak pawh kut zung ṭang elha chhiar tham lek an la awm a. Ph.D nei phei chu kan la tlem hle. Mahse, khawvel ram changkang zelah statistics tel lo chuan nun a kim lo si lo.

Statistics hi a awlsam zawngin sawi ila, kan nitin nuna kan mamawh leh mamawh loh information tlemte kan lak khawm aṭanga thutlukna kan siam zung zung theihna tur hmanrua kan zirna hi a ni.

Thil reng reng hi a taka luh chilh loh chuan a ṭhatna hriat a har ṭhin. Kaisara hun lai aṭang tawha an hman tawh a ni a, Mizote hi chuan secondary leh higher secondary a Mathematics a mi tih loh chu hriat kan la nei tam awm vak lo. Ṭhenkhat lahin chhiarpui (census) te kan la hlau thul!

Tunlaiah chuan statistics hi subject hrang hrangah an hmang nasa tawh hle a, a langsar zual deuh deuh chu Mathematics, economics, commerce, biology, geography leh social sciences-ah te hian an hmang nasa khawp mai.

Khawvel lo ṭang zelah Mizo­te pawn research kan lo tuipui ve deuh deuh a, a thu ringawt hi chuan a chiang tawk lo ṭhin a, chutih hunah chuan statistics test hmangin thutlukna fel tak kan siam thei ṭhin a ni. Chuvang chuan statistics la lo tan pawh heng subject atana hmang ṭangkai theih tur tala kan hriat a pawimawh.

Kan Education deparment hian higher secondary level chinah tal hian a main course-ah an telh thei lo a nih pawhin additional ang tal hian dah thei se, research ti leh zel turte leh subject danga statistics zir tel turte pawn an hlawkpui ngei ka ring bawk a ni.

India ram statistics insti­tutes-te hi khawvelah pawh a ṭha ber ber an ni phak a, India rama kan zir hian thil a awlsam hle a ni. Mizoramah pawh UG zir theihna Pachhunga College-ah a awm ve a, harsatna nei tan biak rawn theih reng an ni. PUC-a statistics zirlaite pawh kan pung chho zel a, kan University-ah pawh kan mamawhna a san zel avangin an hawn ve thuai kan beisei.

Kan ramah industry leh company lian tak tak te pawh kan la din ang a, chutih hunah chuan statistician ṭha tak tak kan la mamawh dawn.

Ṭhangtharte hian kan ram tan a eng emaw tal kan tih sak ve theih nan kan subject lak tur hi i thlang fimkhur ang u.