MUFFLERMAN

Mihring maktaduai 19 vel chenna, Assembly seat 70 awmna Delhi inthlan a zo a, kum 51 mi Arvind Kejriwal leh a party Aam Aadmi Party chuan chiang takin hnehna an chang nawn a, seat 62 an la. 

Lehkhabu chhiar leh Chess khelh ngaina Kejriwal hi a thluak a ṭha. Indian Institute of Technology, Kharagpur aṭanga Me­chanical Engineering a beih vawi­khatnaah a pass a, Central Service a beih vawikhatnaah tlingin Chief Minister ni tura a beih vawikhatnaah a tling nghal bawk a ni. 

Mechanical Engineering a zawh hnu kum 1989 khan Tata Steel, Jamshedpur-ah a thawk a, he hmuna a thawh lai hian a mihring pui, rethei leh harsa tak takten a rilru an luah a, a theih ang angin a ṭanpui ṭhin. A mihring puite rawngbawl sak a duh avangin TATA Steel-a a hna hi bansanin Mother Teresa kiangah Missionaries of Charity, Kolkatta-ah a thawk a, midangte tana thawktu pawl Ramakrishna Mission leh Nehru Yuva Kendra (NYK) ah te a thawk zui leh. 

Ṭanpuina hna thawk chungin kum 1995 khan Central Service-ah a inziak tling a, Indian Revenue Service (IRS) a zawm. Mipui rawngbawl a duh avangin kum 2006 khan Joint Commissioner of Taxes hna a bansan. 

Pawn lam aṭanga sawrkar siamṭhat harsatzia a hriat avangin November 2012 khan Political Party thar Aam Aadmi Party (mi vantlang intelkhawm tihna) an din. Kum 2013 Delhi inthlan hmachhawnin seat 28 an la. Sawrkarna siam turin seat 70 awmnaah seat 36 tal neih a ngaih avangin Congress, JD leh Independent MLA te nena ṭang hovin sawrkar inṭawm an siam. 

Delhi Assembly-ah eirukdona tur Jan Lokpal Bill pulut mahse a tlang zo lo, hei vang hian ni 49 CM a nih hnuah February 14, 2014 khan Delhi CM aṭangin a bang. Inthlan nawn lehah seat 67 zet an la a, CM aṭanga a ban aṭanga kum khatna chiahah CM atan a vawi hnih na’n lakluh a ni. 

Kejriwal hi Hindu ni mahse Isua zirtirna a ngaisang hle. A naupan laiin Kristian sikul Sonepat leh Gazhiabad-a a lo kal tawh vangin Kristian zirtirna a thisenah a bet niin a lang. 

India rama rorel mektu BJP chuan tun inthlanah khan paihthlak an tum hle a, bawng atchilh Amit Shah-a hovin BJP MP 200 chuang an campaign a, Rally vawi 350 chuang an buatsaih. Ṭhalai hip an tum avangin shuttler lar Saina Nehwal chu lawmlutin hmathehah an nei bawk. 

Mahse, mi nun sang lo, muffler a leklam tam avanga ‘Mufflerman’ an tih mai, mi hnuaihnung zawkte pawh ngam tura kekawr tlang thlepa vawthlep nena teihawi ṭhin Kejriwal-a’n a ching chau. Kejriwal an ngam lo a ni lo, mipuiin an thinlunga hnathawk ṭha, mi inngaitlawm leh dikna ngaina, a huna huaisen tlak ṭhin natzia an pholang a ni. 

Kan rama MLA te hausakna kum 5 chhunga 200% vela a pun tlangpui lai leh ṭhenkhat sum neih punna phei chuan za zelah sang bi a pelh laiin a ni erawhin kum 5 CM a nih chhungin ro engmah a neih belh lo. Chutih a hnekin kum tin a hausakna hi Rs. nuai 5 dawnin a kiam ziah. Eizawnna’na politics khel a ni ve lo. 

Chief Minister atana an lakluh hmasak ṭuma a thusawi ṭhenkhat: 

“Kum 2 kal ta chhung khan ram siamṭhat na’n thil hrang hrang kan lo huaihawt tawh a, mahse politics kan luhchilh a nih loh chuan ram a siamṭhat tak tak theih loh tih kan hre chhuak. Annaji (Anna Hazare) khan Politics hi a bawlhhlawh a ni, tih min hrilh ṭhin a, mahse kei chuan he thil bawlhhlawh tak hi kan luhchilh a, kan thenfai a ngai a ni, tih ka hrilh ṭhin. 

“Vawiina kan ramin harsatna hrang hrang a tawh hi Politics tuinu vang a ni. Zirna, hriselna, kawng leh thildang chhe tak tak hi kan politics chhiat vang a ni.” 

Kumin inthlan dawnaa thusawi:“Kum nga kan sawrkar chhunga kan lungawina ber chu Lal Isua min zirtir anga kan kal thei hi a ni. Lal Isua khan a nun pumpui mi rethei tan a hmang. Bible kan chhiar chuan tihdam rawngbawlna a thawk nasa a, amah pantute a lo tidam ṭhin. 

“He zirtirna dungthul hian Delhi-a mi rethei, damlo inenkawlna atan veng hrang hrangah inenkawlna tur kan hawng a, retheiten inenkawlna ṭha zawk an dawn theih na’n sawrkar damdawi in tih changtlun niin damdawi in thar tam tak hawn a ni. Mi zawng zawng tan free clinic siam a ni bawk. Mi retheiten zirna changtlung tak an dawn theih na’n school tam tak thuam ṭhat a ni. 

“Lal Isua hmaah chuan mi te tak te, mi satliah ve mai kan ni a, a zirtirna zaa pakhat tal kan tih hlawhtlin chuan mi vannei berah ka inngai ang. Min zirtir a tum lian tak chu ‘kan chunga sualte laka ṭhat chhuah’ hi a ni. 

“Lal Isua khan amah nghaisatu leh hmusittute kha a ngaidam mai ni lovin, 'Ka Pa, anni hi ngaidam rawh, an thil tih an hre lo a ni,' tiin a la ṭawngṭai sak thei! Kei erawh tuten emaw min khei hlekin phuba lak duhnain ka khat ṭhin. Lal Isua’n amah tiduhdahtute a ngaihdamna hi a thuchah ropui berah ka ngai.” 

Dikna leh rinawmna ngaina, mipui tana hnathawh a duh avanga a hna kalsan ngam, hnathawk ṭha, mi huaisen, chaw dangral mai mai hmachhuana inzuar ni lo, Kejriwal hi Mizoramah rawn ding ve ta se kan vote duh tak tak hlawm ang em?