Halpuah leh halmawi Chungchang
Halpuah leh halmawi hâl ṭhat lohna leh hautakzia chu kan hre ṭheuh awm e, chuvangin sawi lang kher lo mai ila. Kum 2008 tawp lam khan Congress chu rawn sawrkarin, Home Minister hoin halpuah leh halmawi khap chungchang sawi ho a ni a, Krismas a hnaih tawh avangin hmalakna hun a tlem tawh si a, kum hlui thlah lai darkar khat hun chhung halpuah leh halmawi halna hun hawn a ni.
Mizo mipuiin thu kan lo awi tawh ṭhin
Kum 2009 khan khap vek tura rel niin, halpuah leh halmawi hâl tlemna veng tan lawmman siam a ni nghe nghe a; kha mi kum khan a puak lo tih theih a ni. Chutichuan, a hnu zelah pawh kum 2009-2012, kum 4 chhung chu a puak ta lo tih theih a ni ta hial a. Mipuite hi thil ṭhaah chuan kaihhruai kan lo nuam hle mai tih a lo lang kha a lawmawm hle a ni. Ram hruaitute’n an zir phawt chuan Mizote aia hnam pum anga ṭha leh kaihhruai nuam hi an awm bik kher lo ang.
Sawrkar berin halpuah a hâl ta a le
Kum 2013 khan Congress chu sawrkar nawn lehin, khatih laia Chief Secretary Pi L. Tochhawng hoa meeting chuan sawrkar thar lawmnate a ni nghal a lawm tiin CM an hmin a, Aizawl khawpuia hmun thlan bikah halpuah leh halmawi chu sawrkar berin an hâl ta rup mai! Kha ta ṭang khan mipui thuawih tak tak lo insûm ṭang ṭang ṭhin thinlung chu lo sosang thar lehin, kum tin a puak zui leh ta a ni. Sawrkar chuan Mizo thuawih em emte chu palzutin boruak a tichhe ta vek a ni.
Sawrkar khan a ngaihtuah chiang lo
Halpuah leh halmawi hâl khap hi thil namailo tak a ni a, mipui nawlpui inthurual lo tak takte hâl lo tura hmin kha thil khirh tak a ni. Mi ṭhenkhat sawi dan chuan, sawrkar hotu lian leh thil ti thei deuhte khan kum hlui thlah zana halpuah leh halmawi tel loa a han reh duak kha an hrethiam lo an tih kha dik tak ni maw? An tu leh fate’n hâl an ngen nasa an ti tlat a ni.
YMA-te’n hun leh tha tam tak senga halpuah leh halmawi hâl lo tura hma an lo lak tawhna kha an hre chang tawh reng reng lo. Thingtlang khaw ṭhenkhat ti ila, khaw tam zawk leh Aizawl veng ṭhenkhat Kulikawn leh Bethlehem Vengte chuan, halpuah leh halmawi hâl lo turin chak takin hma an la la thei reng a, kum hlui thlah zan hian tar chak lo leh damlo ṭhahnem takin an pan khawm ṭhin an ti a; veng entawn tlak tak an va ni em.
Tun sawrkar hian a dinna tichiang thuai se
Tunah ZPM sawrkar thar kan nei ta a, nikum kha chu a chawpchilh lutuk deuh a, hmalakna hun a awm hman meuh lo a, a puak ṭha thawkhat viau a nih kha. Sawrkar hian a dawn ṭêpa khap tum ai chuan, hun a la thawl deuh lai hian ngaihtuahna sengin hma la ṭhin se, awmzia a nei ngei ang. A nihna takah chuan kum tirah hian thlirletna (review meeting) nei ṭhin se la, kaih thawh chawp ngai sawrkar nih reng hi a dik lo a ni. Tin, sawrkar hnathawk halpuah leh halmawi hâl ching awm ṭeuh ṭhina sawite hi khawng taka hmalak a ṭul khawp mai.
Mizo mipuiin kan hmuh leh hriat reng laia puja-ah vai hoin halpuah leh halmawi an hâl ṭhin hian, mipui rilru a tihel ṭhin khawp mai. YMA tan pawh hlawhtling chuang lo tura hma lo lak hi a tha natthlak ṭhin a. Tin, halpuah chungchangah hian mi tam tak chuan YMA hi sawrkar aiin mawhphurtu zawkah an hmuin, an dem lek lek zawk fo mai. Tuna vai puja kan la hmakhalh theih lai ngei hian hmalak a ṭul khawp mai.
Sawrkar hian a hming maia khap loin, tih tak zetin a hun takah a khap a ṭul tak zet a ni. Chuti lo chu YMA tan pawh inthiar fihlimsan mai a ṭha zawk hial awm e.
- VL-a, Tuikual South