Thlarau pangchang Part - 2

Aw, Thlarau pangchang, lo kal la,

Kan lung tino ang che,

Kan rinna in min hmuhtir la,

Pangchanna ram nuam chu.

Pangchan nuam kan tih a, pangchannaa thiamthu kan la sawi tlat chuan kan la puitling lo tihna a ni. Naupang pangchang hi nu leh pa tan pawha ngeiawm chin a awm thei a, Pathian tan meuh pawh kan pangchan dan hi a ngeiawm ve fo lo ang maw ka ti hial ṭhin.

Engkim ti thei a nihna te, hmangaihna leh zahngaihna ngah a nihna te hi kan hre hle a, chu chu mihring mai mai kan ni tih hian a rawn thlawp a. Mahni kea ding thei lo, kaih leh puak ngai nia inhriatna a rawn hring chhuak ta a ni awm asin! Camping tel loa nun kawng siam ṭha thei lo mi chak loah kan in chhuah a, camping meuh pawh chuan kan tuihalna a phuhruk zo lo a. Follow up programme-ah kan han in-chhu zui leh ngat ngat a, chuti chung chuan thla khat em daih lo te pawh sawi tur an awm!

Mahni theihnaa sual sim tum lo, sim theia inngai reng reng lo kan kat nuk mai a. Eng emaw tak boruak sang tak a lo thlen loh chuan nunkawng siam ṭha turin tha kan thawh hlei thei lo. Khawvelah mi tam takin rilru siam tharin nun kawng thar an zawh a, tumruhna nen an bei a, an thei a ni. An tih theih ang ti turin kan fei tawk lo a, kan pachang tawk lo fo ṭhin. Hei hi kan thlarau lam pangchan vang a ni a, chu chu kan sakhaw kalpui dan leh sakhaw huang chhunga kan inzirtir dan tam takin a hrinchhuah a ni.

Hetiang kan nih tawh hnu-ah hi chuan, kan sakhua emaw kan intih sakhaw mi-na emaw hi kan enfiah a nih loh pawhin, kan inenkawl dan tal hi chu ennawn a hun tawh hle a ni lo’m ni?

Zu kan duh loh dan pawh hi thlarau sawngnawi hrin ni awm tak a ni. Zu dawr awmna rama kristian ni thei lo turah kan inngai tlat a ni deuh ber a, hei hian kan rilru pangchanzia a tilang. Eden huan philosophy - mihring duhthlanna leh mawhphurhna kan inbel ngam lo. Adama kha ni ta hlawm ila, chhia leh ṭha hriatna thing kha kih tumin hreipui nen kan veh kan veh ang a. A nih loh leh thirhling neia hung turin Pathian kan kar kan kar duh mai awm e. Rilru sawngnawi kan pu laklawh tawh a, eiru chunga kristian ni theite meuh pawh hian zu zawrhna ramah kristian thei lo turah an inngai a nih hmel hle mai. Kum 50 vel a ral leh hunah, kan pangchan dan hi ṭhangthar zingah fiamthu thawhna atana hmang duh an la awm hialin ka ring.

Ngaihdamna: Misual vek kan ni a, ngaihdamna kan mamawh vek. In ngaidam tawn lo ila khawsakho a harsa hial mai thei. Mizote phei hi in ngaidam nasa tak leh ngaihdam mamawh zual kan ni emaw tih hial tur a ni.

Thil engkim hi, in ngaihdam tiamin, “uar lutuk” a awm thei thung. Kan in ngaihdam dan tam tak hi chu thlarau pangchangin a hrin a ni. Chu chu kan “Mizo Kristianna” hian hman aṭanga a ken tel niin a lang. Vivekananda-an, “Thil sual ka tih chuan ka tuar mai ang; ka tihsual avanga ka tawrh ai tuartu mamawh tur khawpin ka dawizep lo” a tih nen chuan kan kar hi a hla hle a ni. Mahni engmah ni bik loa inngaihna te, mamawh ve tho tih inhriatna te hian a hring a, mihring leh mihring inkara thinlung taka in ngaihdamna tel lem loa in ngaidam ṭhin kan awm bawk a. Khawtlang hmaizah vang te, thubuai neih kan hreh vang te, kan sakhuain min phuar avang te a ni thei.

Hetianga kan inngaidam ṭhin hi indem theih a ni lo mai thei a; kan in ngaihdamna avanga sawrkar dan che thei loa kan siam ṭhin erawh hi chu a ṭha ber lo. Thlasik/ ṭhal lai apianga inkap palh an awm ṭhinte hi dan kal pela in ngaihdamnain inthlahdahna a hrin rah chhuah leh chhawng a ni thei a, min tiharhtu atan hmang thei ila a ṭha hle ang. Accident chungchangah te, tuallaia insual te pawh, inngaihdam kan ching a, kan inngaihdam avanga dan kan tizeng tlat hian inthlahdahna a hring ta a nih chu.

Dan chu a nih anga kan hman loh chuan, a tawp khawkah ramin a tuar a, mipui phurrit a lo thleng ṭhin. Dan chu a nih anga hman a nih chuan, zawi zawiin mihring rilru-ah Dan ngaih pawimawhna a lo piang a. Mipui rilrua dan ngaih pawimawhna a awm chinah chuan, mihring nun a thlamuang a. Dan hnuaia kan chanvo tur dik kan chang thei a, vantlang tana hnawksak a tlem ṭhin. Chutiang taka mipui rilru dan ngaih pawimawhna a awm theihna tur chuan dan chu lekkawh a ngai a. Chu chu dan vawngtute mawhphurhna a ni.