Mahni hna ṭha taka thawh

Mizote hi mahni hna thawh lai hneh­sawh taka thawh kan intihhmuh a ngai hlein ka hria. Hnam upa leh kan ngaihsan sap kan tih maite pawh en ila eng hna pawh thawk se an hna an ngai pawimawh thiam hle ṭhin.

Mihring azirin hnaah hian a hniam leh a sang deuh te, hna changkang leh hna hnuaihnung deuhte chu a awm ve ngei ang, mah se hna hniam anga lang thawktute pawhin an hna ṭha taka an thawh theih lohna tura daltu chu an hotute an ni emaw Minister leh MLA te pawh inrawlh se an hnial ngam a, an innghahna an hna pawh an ban san ngam ngat ṭhin.

India rama cheng kan ni a, vai hnam changkang ber ni lote pawh hi Mizote chuan kan tluk chuang lo. Mizorama kan hmuh phak lu met mai mai te pawhin an hna lumeh an thiam em em a, lumehin a ken tel nia kan ngaih lem loh massage te thlengin hnehsawh takin an ti nghal thei zel.

Mizo lumettute erawh chuan lumeh bak kan ti thei ngai meuh lo. Kan hna chu eng hna pawh ni se kan hnathawh leh a kaihhnawihah hian rilru kan inpek hleih a, Mizo mipuite hian mahni hna ngaih pawimawh nachang kan la hre tawk lo viau a ni.

Kan minister-te han sawi kai ta daih ila. Sports Minister, PHE minister ni bawk hian hmanni deuh mai khan PHE hotute ko khawmin hna ho te anga lang tui sem chungchang a sawipui a. Tuisemtu ṭhate hnenah lawmman pek te pawh an sawi kai hial a. Tuisemtu lawmman pek hi a ṭhat leh ṭhat loh lam ka hre ve lo, amaherawhchu khatianga an sawiho aṭanga vawiin thleng hi chuan tui kan haw ṭha regular ta viauin ka hria.

Minister kan ni emaw lumet kan ni emaw kan hna, kan koa tla reng reng hi chu kan theih tawpa ṭhain kan ti tur a ni. Tih tur (duty) a nih vanga ti liam mai mai lo hian rilru leh tihtak zetna thinlung nen thawk ṭhin hlawm ila. Chutiang taka hna ngai pawimawh mi kan nih chuan keimahni pawh kan zahawm sauh dawn a ni.

Sorkar Department dang hotute leh mi­nister-te ngei pawh hian an chanpual ṭheuh hi a theih anga ṭhain ti ve hlawm se, rilru tak taka kan veia kan tih chuan rilru pe lem loa thawkte ai chuan kan ti ṭha ngei ang. Hetianga kan tih ṭheuh chuan mimal, chhungkua, khawtlang leh ramah hmasawnna thar duhawm tak kan hmu ngei bawk ang.