Rin aiin kan rui lo

Sual tinreng bula kan puh zu chu kan zuar ta. Mifingho chuan hetiang deuh hian an sawi lawk a - zu zawrh zanah chuan kawngpuiah zurui kan lamin kan au tuau tuau ang. Zu rui insual buai hmuh tur a tam ang. Kan khawlai chu len chhuahna tlak a ni lo ang. Hengte hi mifing an fin loh ṭuma ngaihdan a ni. Rin aiin kan rui lo.

Keini ṭhianho hi zu in lem lo kan ni a, zu zawrh ni hnihna zanah khan kan leng chhuak a, khawlai fang kan ni deuh ber a, zu zawrh nghawng a awm dante kan thlir ve mai mai. Tun hmaa rui deuh deuh awmna ṭhin Vanapa Hall leh Zodin velah chuan rui chu an awm ngei a, zu rui ni pawhin an lang chiah lo.

Zu zawrhna hmun ber Millennium Cen­tre chhehvelah chuan zu rui hmuh tur an awm lo a, mipui awm khawm deuh chu an awm ve ṭhin a, zu lam buaipui niin an lang lo.

Kan kal lehnaa mipui awm khawm tamna chu veng tina kawn zau laiah a ni deuh zel a, kawng kama ei tur zawrhna (tunlaiin Aizawlah zan lama kawngpui kama ei tur zuar hmuh tur an awm nual) hmunah mi an awm khawm deuh ber a, an rui buai lo, kan chhuah zan hi chuan.

Hman zana Ṭhuam­puia police kah hlum ruang hmuah zan khan ka kal ve bawk a, zing lam thleng khan kan awm a, zu zawrh hnua thil thlengah chuan ruih buaina chance a ṭha viau a, an rui vak lo. Rui chu an awm a, rui buai chu kei chuan ka hmu fuh lo.

Khati zat mipui pungkhawm, boruak ṭang ru tak bawk si-ah kha chuan khawilaiah emaw buai deuh laih laih mah se a âwm ve rengah ka ngai ang a, rui buai an awm pawh kei chuan ka hmu fuh lo. Ka hmuh loh liamah an buai a nih chuan ka hriat loh thil a ni.

Tichuan, ka ngaih­tuahnaa thil lo kal ta chu, "Zu hi chanchinbu, TV, Facebook, whatsapp lamah hian kan lo rui nasa ber a nih hi. A takah chuan an rui buai duh ta lo a nih hi," tih a ni. Mifingho rin aiin mimawlte'n zu an rui lo.