Rorelna a lai thei lo

Tun hnaia Aizawl Municipal Council lamin maxi cab stand an thlak avangin buaina a awm neuh neuh a, a tuartu hi thingtlang lam an nih avangin an âng thawm pawh a ring a, mipui nawlpui pawhin kan lainatin thupek chhuahtu AMC lam kan dem ta niin ka hria. Unau duhtak, khawngaihin i khawhawi tizauin han ngaihtuah chiang hlek la, i ngaihdan i thlak leh theih chuan a lawmawm khawp ang.

Roreltu dinhmunah inṭhuttir ta la, thingtlang maxi cab chhuahna hmun tidanglama thingtlang mite tana harsatna siam hi i tum lo ang tih a chiang a, tuna AMC Councillor-te pawh hian thingtlang mite tana harsatna siam hi an tum reng reng lo asin. AMC hotute hian Aizawl khawpui hi an thlir a, traffic jam nasa lutuk leh khawpui tawt hi tihziaawm theih dan an ngahtuah a, he rawtna hi an siam ta mai a ni. Thingtlang mite tihbuai tumna a ni lo a, khawpui (thingtlang mite tan pawha kan khawpui ber, kan khaw chhuak mi tam berte pem luhna) nuam leh thawl zawk siam tumna avanga hetiang thil hi lo awm ta a ni.

Tunah hian bus zin chhuak turte hi khawpui dai aṭanga chhuak an ni deuh vek tawh a, MST Bus hi chu hmunhma an neih ṭhat avangin a chhuahna bik an nei a, a bak zawng hi chuan khawpui dai an pan tawh. Heng hmuna kal tur hian City Bus fare a hranpa chawi leh chu a ngai ngei a, mahse thuneitu lamin an insawntir avangin an kal mai a, phun thawm a awm mang loin kei chuan ka hria. Maxi cab dinna sawn bik hi chu kan phun nasa mai a, hei hi thingtlang hmuhsitna leh harsatna siam tumna a ni lo a, mipui tam berte tana ṭha tur zawnna a ni zawk tih kan hriat chian a ngai a ni. Chuti lo chu, "Thingtlang min hmusit," tiin kan in fuihpawrh khawlo zo mai ang.

Khawpui lian zawk kan thlir chuan mirethei awmna hmunpui (slum) pawh a ṭhiahin an ṭhiat a, an chenna inte hial tihchhiat a ni ṭhin. Khuain hma a sawn dawn chuan tun hmaa building lo ding tawhte pawh tihchhiat a ṭul chang a awm a, kawngpui kal dan tidanglamin mi tam tak eizawnnain a tuar ṭhin. Hengte hi hmasawnnain a ken tel a ni. An rorel dan hi mirethei zawk thlirna aṭang chuan a lai lo mai ni loin thinrimna tham a tling a, vuivaina tur a tam hle awm e.

Tichuan AMC rorelna pawh hi thingtlang mite chuan lai loin an hre dawn a, an thlirna tarmit chauh vuah chuan a lai lo reng a ni. Mizoram pum thlirna tarmit han vuah hawh ta se, Mizo zawng zawng kan luh khawmna khawpui hi chu khawpui nuam leh thawl ṭha ni se kan ti ṭheuhin ka ring a, chuvangin Maxi Cab hmun thawl zawka sawn hi 100% in ka support tlat a ni.