KELKANG HARHNA

Kelkang harhna hi a ṭhen chuan Speaker bik pawh kan awm lo a, Thlarau Thianghlim Crusade a ni e, an ti hial a ni. Kal kan tam tawhin TV-ahte mi tam tak kawm mah ila, la hre chiang lo leh kal duhten thil an ruahman thiam nan ka ziak ve a ni e.

Zantin dar 7:00-ah inkhawm a awm a, khaw neitute kalphung ruahman ang anga kal a ni a, Pastor leh Revival Speaker-te pawh awm se, an ruai chuang lo. A khua hi Thlarau Thianghlimin a chenchilh rei tawh a, an thusawi a nung a, mikhual tan a hlawk bawk.

Kelkang harhna hi a inṭan dan chiah sawi a har a ni ang. Dorikhuma damlo phai kal haw Pathian chawimawi tura thurawn petu an awm a, 7.6.2013-ah Pathian a chawimawi a, an hlim hle. Hetihlai vel hian mipa naupang kum 13 mi Zairemmawia ho an ṭawngṭai a harhna an chang. Heng hunlai vel bawk hian KṬP hruaitute Thlarau Thianghlim dilin biak inah kar khat an riak lut bawk a ni.

Tin, kum 2010 khan Upa Tawka, Hruaikawna mi khan, Kelkangah Thlarau Thianghlim a thleng dawn, tiin tuallaiah a rawn au a, a haw leh mai a; tuna hmun thianghlim hi mihlim Dengsailovi’n Upa leh Kohhran hmeichhe hruaitute hruaiin, "Heti chin hi humhalh rawh u, hmun thianghlim a ni," a ti a, a lo kawk kual tawh. Tichuan, harhna thlen ṭan khan Pu Thianga, Sesih khuain hmun thianghlim an tih chin chu a samfai a, Kraws a rawn phun ta a ni, an ti.

Nitin Bethel a ni a, Bethel inpui an sakah 10:30 am-ah kan innghakkhawm a, hruaituin thil ṭul a sawi a, ṭawngṭai sak tur hming pek luh a ni a, mi 300-500 hming pekluh a ni a, a mal mala sawisen pawh a ni lo. Hmun thianghlim kraws bulah dahkhawmin Bethel dawnah a huhoin kan ṭawngṭaisak ṭhin. He mi hnu hian ke lawngin hmun thianghlimah a leng zawng chu zuk leh hmuam pai lut loin min luhtir a. Mobile leh pawisa erawh chu a bo min hlauhpui a, pailuh an phal. Hetiang hian hmun an siam-

1. Bethel inpui 2. Hmunthianghlim

3. Peniel 4. Paradise

5. Moria 6. Giead

7. Gilgal

Zankhat chu hmun thianghlim Kraws chu a êng a, a ral a, Bethel kawng pawh a ên phâk an ti. Tin, Gilgal luhna dinglamah hian Vang kung a awm a, a pang lehlamah chuan chemtea rin ni awm takin kraws a awm a, thing pang pem pawh a dam tawh a, he kraws hi Khawbung pa pakhatin mobile phone ṭha vak loa a thla a lak laiin Isua tuar lai hmel a lo lang tih sawite a awm. Tin, Gilead an tih hi sawntlung pawng a ni a, pa pakhat ke sa a lawn a, a dam daih ta mai a, chuta ṭang chuan damna awmin an hria a, a lei hi an la a, an ei a, dampui an awm nuala hriat a ni. Heng an hmun hming hi Bible aṭangin chhut la awmzia leh phuah chhan a awm zel a, hengah hian kraws an phun vek a ni.

Kelkang khaw mipuite inpekna hi a ropui hle, Biak in kawta reception office chu chhun zanin an nghak a, a bulah KṬP-ten mikhual lo thleng apiang thingpui an lo pe reng bawk. Kum 2013, June-a bul ṭan an nih kha. Tin, mipa tleirawlin mikhual an sem kual reng a, a neituten inthlahrung miah loin an lo siam zel. March 25, 2015 tlai khan thlipui leh ruahpui a lo thawk a, a lo thleng thar chu an puanthuah nen lam an huh nual mai a, a bul hnai remchang apiangah an tlanlut a, an luhnate chuan mikhual engzah pawh lo nei tawh se, meilum, thingpui leh chaw an lo buatsaih zung zung zel a, an inpekna hi mihring mihrinna ringawta tlin chi a ni lo.

Thawhṭan aṭanga Inrinni-ah chuan zan dar 7:00-ah inkhawm ṭan a ni a; nimahsela dar 4:30 pm-a kal chuan biak-in chhung kan chang tawh lo. 2:30 pm - 7:00 pm chu Pathian faka zai nan an hmang a, an lam mup mup mai.

Inkhawm banah Bethel inpuiah ṭanin Hmunthianghlimahte a indawt zelin kan kal a, a tawpna Gilgal hi AR Lammual tiat vel, ngaw hnuai tlang zawl a ni a, heta hun kan hman zawh hian ramhnuaiah a ṭhen an Bethel a, a ṭhen an haw a, an ṭhente chu hmun remchang laiah a hlawp hlawpin Pathian an au a, Gilgal phei chu a zau a, a chhun a zana mi tam takin Pathian an pawlna hmun a ni a, kraws vuana mittui tla zawih zawiha ṭawngṭai te, bawkkhupa ṭawngṭai te, zuang zuang chunga Pathian au tein hun kan hmang nileng zankhua a ni. Hun rei tak chamchilh a, fatua ṭang nghal an tam a, a la kim lo, tia kawng lak aṭanga kir lehte an tam mai.

He harhna hian kan ram pumah sual sim harhtharna rawn thlen se, sum leh pai leh material changkannain kan kohhrante na taka a hrut meklai hian Pathian nena len dunna tak tak kan ram pumah hian rawn hruai thleng se a duhawm hle. Sawi loh theih loh chu an Upate tlawmzia leh harhna lo thlentirha naupangho ze nawi deuh ti mai ila, an han awm pawh tlawm takin an kilkawi thiam a, an inpekna a ropui hle.