BJP hnuaia kûn ṭheuh ṭheuh

MP inthlan dawn khan MNF, ZNP leh MPC-te khan BJP kha an mawngzawmpui a, an han insawithiam viau dawna a nihna takah chuan BJP thu thua awm an ni a, BJP duh danin candidate an inṭawm a, an tling zo ta chuang lo.

Tichuan Congress an tling ta a, Mizoram­ah Congress MP nei mah ila central sorkar lamah BJP an chak fawr ropui si a, BJP hnuaiah kan zavaiin kan kun ta a ni e.

Tichuan BJP chu an lal ta a, an zia an chhuah ṭan ta a ni. India ram hmun hrang hranga sakhaw dang betute chu an chêp nghal a, Kristian sakhaw betute Biak In tihchhiat a nih bakah Kristian puithiamte pawhin nêkchep an hlawh ṭan ta a ni. Kristian tamna Mizorama party-ten na takin an dema an au chhuah pui ka lo rin ve nen Congress chu an ngawi ta dûk mai. Congress chuan state-a pawisa an neih lohzia hriain central lama BJP sawichhiat chu an hlau nasa mai a lo ni a, kan Kristian puite thlavang pawh hauh ngam lo 'Kristian Chief Minis­ter' chu kan nei ta a, kan 'Kristian MP' pawhin engmah a sawi ngam lova, BJP rorelna hnuaia kan awm vang a ni.

Kan sakhaw biak in an khawih hnuah bawng talh an khap a, India ram puma khapte an duh tih chanchinbu leh TV-a kan hmuh hnu pawhin MNF chuan BJP chu an dem ngam lo, mahni pute tunge sawisel chut chut ngai!!! MP pawh nei hlei lo MNF chuan an president chu hel be tura an rawn sawm ve avangin BJP-a tlatlumah ngaiin an lo chhuang ve em em a, zahthlak tak a ni. ZNP pawh hi nationalist party an nih tak tak chuan tun hi BJP dem hun a nih vei nen, anni hi MP inthlan dawna BJP hnuaia kûn loh hlaua zin kual zek zek kha an nih avangin BJP chu an sawisel ngam lo mai ni lovin a tlawnin an tlawn niin ka hria.

A au chhuak ngam awm chhun chu MPC an ni deuh mai a, anni hi chu an aw hi a ring tawh si lova, AMC lamah Congress nen an lo inzawm bawk nen a buai zo ta niin ka hria. Tichuan BJP chuan Mizoramah bu an khuar a, Chakma awmna lamah ṭan an la a, Kawnpui leh a chhehvelte pwh hi an thlithlai nasa tawh an ti. BJP hnuaia kun vek kan ni a, tumahin kan sawisel ngam lo.

Nakin lawkah bawng sazuarte ei­zawnna hi a la tawp ṭhup mai thei a ni.