An va zaktheilo em
Birth certificate kan siam thei titute thu leh hla hi kei chuan ka hmu ve lo. Mahse, a hmutute sawi danin, 'Raltlan tan pawh kan siam thei' an la ti cheu a nih chu maw le! An mâwlzia leh an zahtheihlohzia hi a va rapthlak zawk em!
He thu LPS Chibai Mizorama ka ngaihthlak ruala ka thinur chuan, “Dan bawhchhiatna a ni a, case siamsak theih an ni, ti ringawt lovin, a ti âwm leh ti thei tuin case siamsaka man nghal tur alawm. Vawiin lama thawm dang engmah a awm loh chuan ka phak tawkin a theih theihnaah ka aupui dawn a ni,” ka lo ti ve nasa mai. Nimahsela, Central YMA lamin an lo bawhzui chat mai a, a va lawmawm em.
Dan leh hrai hre map lo, sawrkar leh department hnathawh dan leh kalphung hre reng reng lo, thil pawi leh hlauhawm leh zahthlak pawh hre lo khawpa mi mâwl zaktheilo an ni. Hetiang ho buaipui ber leh tuipui ber chu, kut tlingloa pawisa neih dan leh an thiam ber chu social media hmeh zut zut leh bih ngut ngut chiah a nih hmel.
Hetiang khua leh tui tana chhenfakawm lo lutuk tak kan lo tam tak em em nachhan chu–lehkhabu chu sawi loh, ni tin chanchinbu leh hunbi nei pawh chhiar ngai lo, TV-a Mizoram leh ram dang chanchin thar en ngai lo, TV-a inkawmhona leh thu ṭha leh pawimawh sawi pawh bengkhawn ngai lo, mi tak tak bula khawsa ngai lo, nileng zankhuaa social media bih ngut ngut ṭhin, a chang leh mahni chauha nui vur vur ṭhin, mahni level-pui chauh kawm ṭhin, an thu hriat chhun leh thuziak an hmuh chhun pawh anmahni anpuite thu leh hla social media-a mi chauh, mahse, intifing em em si te, 'Chhuan bengtlalo' ho kan lo tam tak vang a ni.
Nimahsela, mahni hma chauh sial tawhna, mahni thu thua awm tumna khawvelah hian atu-a-te mah hi a ruh langa inhrilh leh inzilh inzilh pawha danglam thei hi kan awm ta mang lo a nih hi. Khawvel tar tawh, hun hnuhnunga thil awmzia tur Bible min hrilh lawk a ni miau si.
Amaherawhchu, hetiang teh nuai karah pawh hian khawvel tan leh mahni mihringpuite tana thil ṭha leh hmasawnna tur leh, thiamthil thar la ngaihtuah char chartu te, mahni mihringpuite himna tur leh damna tur te, mahni hnampui leh mahni ram leh hnam tana thil ṭha ber duha theihpatawp la chhuah hram hramtute leh, an fin, an thiamna leh taimakna nena la ṭang fan fan tute thu leh hla leh, an theihtawp chhuaha ṭhahnemngai taka la bei hram hramtute hi chu i zah em em ang u. Anmahni vanga la thlamuang thei, awlsamna nena hma lam pana la dam khawchhuak thei hram hram kan nih hi.
- K Hmingthankaia