Mizo thalaite tan kut hnathawh a zahthlak tawh lo e!

Kan tun lai nunah, khawvel lama intlansiakna a nasa a, a chhia leh a ṭha pawh dawn zo meuh loin sum kan hmuhna tur apiang chu kan bawh a, mi lar kan inchherchhuak nasa a, lehkhathiam pawh kan tamin hna in min daih lo ta hial a ni.

Zai ngaina hnam, zaithiam tlemna ram, music video siam thei tamna rama zaithiam in ti, lar taa inngaite leh model emaw in ti a, vawi 20 vel thla lak ṭhat hnua vawi 1 chiah mi hmuha phochhuah tlak nei thei leh thlalak fuh deuh apiang social media a phochhuak duh awmna, a hman leh a rem apiangten, miss leh idol an thlang ta emaw tih tura mi lar insiamna, state leiba ngahzia ngaihtuah pha loa lirthei nalh taka kan han tleng siau siauna, kum tina lo halna ramah hian, eng hna pawh thawk ila, a zahthlakna a lo awm reng reng lo.

Mi hmasa tam takte kha, inhlawh chunga lehkhazir chhuak deuh vek an lo ni a, an tu leh faten, harsatna hnuaia lehkha kan zir ve an hlauh em avangin an theih tawpin min dawm a, keini nawmchen nan leh intihtheihna ang zawngten kan lo hmang a, nghawngkawl pawh hre lo tam tak kan awm phah hial reng a ni.

Kan Mizo hmeichhiate hian Mizo mipate hi kut hnathawh hrehna thinlung min pe fo mai. Ban khur laia bungbu ut ut chu an kal pel thuai a, chak taka lirtheia tlan te erawh chu an melh no hle ṭhin. Hei vang hian mipa rilru a kawi zo a, mipa tam takin hmeichhe ngaihsan nih tumin chhungte chawmhlawmin in penparh dan kan ngaihtuah ta ṭhin a ni.

TV lamah ni se hmasawnna lam aiin Korean film kan inngaihsan siak a, an film star te an tumin theih tawpin ṭan kan la a, mahse Mizo kan nihna a bo thei chuang lo. Fiamthu thiam hmingthang, Russell Peters hi Indian (Vai) thisen a siam a ni a, mah se Canada-a piang a ni. Helin Mumbai an beih hnuin - England ah show ropui tak a nei a, mipui hmaah ‘ka mi leh sate an bei’ ti ngat a ni a. Mizo thisen kai, ram danga piangte tan chona a tlingin ka hria.

Mizo ṭhalai thlir dan dik lo a thlir na na na chuan a hun hmain nupui pasal an nei a, naupang te niin fa an nei a, rilru puitling lo a nupaa insiam na na na chuan harsatna an tawk fo reng a ni.

Kan nu leh pate sorkar hnathawk an nih loh avanga zahpui tlat te hi a va mak em! Engtiang fa koa ropui nge i nih? Nu leh pa te zahpui mi an tluang ngai lo a, zahpui tur khawpin tumah an ropui hek lo. Thawhchhuah aia ba ngah zawk state kan ni a, ba hmanga in lak mi len chu a nuam viau a, mahse rilru a hah duh a ni. Ram changkang apiangah kut hnathawkte hi zah an kai asin.

Mizote hi kan nu leh pa te an tar hnu thlenga hna la thawh tir zel awmchhun kan ni hial awm e. Hnam changkang zawkte hian kut hna an thawk nasa a, kan thawh tura kan ruat ngai loh, hna chi hrang hrang hi an thawk a ni ber zawk.

Mizo ṭhalai ṭhenkhat chuan ngaih­zawng pawh ngaihtuah hman lovin inhlawh chungin lehkha an zir a, ṭawng­kamin kan fak a, an tih anga ti tur leh an tih ang tithei turin nu leh paten kan fate rilru huaisenna kan pe leh ngai si lo. Khawtlangah leh Kohhrana inhman la rem ti si loin, social media lamah chuan nasa takin an inlar a, lehkhabu hi finna a ni ti chungin lehkhabu ngainat kan inzirtir chuang si lo.

Mi ropui tam tak bulṭanna sawi a ni fo a, Oprah Winfrey te, Cristiano Ronaldo te, Steve Jobs te, Abraham Lincoln te hi an chanchin hre lo kan awm lo ang. Mahse an chanchin ngaihnawmna lai chiah rilru-ah kan dah a, ‘ka nu, ka pa, chumi chu ka duh,’ tiin naupang chhia ang maiin kan la awm fo ṭhin. Hengte tan chuan kut hnathawh zahthlak lo(h) ngaihna a awm lo.

Mizo ṭhalai tam tak an harh a, ro thukruk sut buaka mual mual an nei ṭhin. Tin, India ram khawpui hrang hranga hnathawka awmte leh foreign-a hnathawk tam takte hi hnathawh hreh nei lo deuh vek an ni. Mizo ṭhalai kut hnathawh hreh lo tan kawl a eng mek e. Ram changkang apiangah kut hna an thawk nasa a, hrisel pawh an hrisel a, hun pawh an vawng dik a, mi hausa pawh an tam a, zah pawh an kai.

Nupui pasal pawh mi taima lo chu an duh lo a, keini ram angin darthlalang screen hmaa ṭhu nileng thei leh thlalak siam danglam fe hnua FB a post ang chu an zawng lem lo. Model lar tak tak, harsatna tam tak paltlang a, keini ram ar hmai pawh tiat lo pawhin kan lo hmelhriat theih chhan chu an taimak em vang a ni. Keini model nawmchen nghal tumte ang hi chu an ni ve miah lo!

Ziak leh chhiar thiam tamna ram, mahni a hna insial kuak tlemna ram, chhungte chawmhlawma inti milian chawp ṭhalai tamna ram, thil chik peih ṭhalai tlemna rama ṭhalai kut hnathawk hreh lote hi mi fakawm tak an ni a, hengte hian fa pawh nei se mi tuarchhel takah an chher chhuak ṭhin. Mizo mi hmasate pawh khan, an fate nasa takin an chher hriam a, an tuchhuan thumna leh tuchhuan li-na ho hi chuan hun hman dan pawh kan thiam tawh lo a, kan thatchhia a, kut hnathawh chu saruaka khawlai kal ang deuh thawah kan ngai ta hial a nih hi.

Ṭhalai, kut hnathawh i zah chhung chuan engtikah mah i hlawhtling ngai lo ang.