Private school neitute u...

Hman deuhah khan Mizorama private school-te a him tawk loh thu leh rikrum thilah naupangte tan dam khawchhuahna tur a awm loh thute kha chanchinbuah an ziak a. Khatih hunlai khan ngaihtuah lo mah ila naupang school admission tih dawn leh an fee pe tura kan chhungkaw sum bawm kan khawih chet rualin ka rilruah a rawn chiang thar leh ta uar uar mai.

Keini ang chhiar zau vak lo tan chuan school building hian safety norms a neih leh neih loh kan hre ve lo a, a nei emaw nei lo emaw kan fate hi an admission leh thla tin tuition fee kan pek aṭanga chhut hian building ṭha deuha lehkha zirtir hi chu an phu a ni.

Mizoram khaw­pui ber Aizawla pri­vate school ṭha kan tihte buil­ding chhiat-zia leh hmunhma neih chhiatzia ka ngaihtuah hian, kan pawisa pek nen a inphu lo a ni.

Mizoram sorkar hian private school-te hi a vai hian en­nawn leh vek rawh se. Lirnghingah kan fate an him em? Kangmei chhuak se naupang tlan chhuahna tur leh sahimna zawnna tur hmun âwl (space) a awm em?

Naupangte infiam hlimna tur hmunhma an nei em? Kan fate tana school-a fee kan pek luh hi school neitute sum bawmah a lut hmak hmak a nih ringawt chuan thil fel lo mai ni loin thil sual a ni phak lo maw? Sorkar school chhiat chu advantage-ah hmangin heng mite hian Mizo nu leh pate leh an fate hi min exploit a ni zawk lo maw?

Private school hi state dangah chuan mi hausain an din ṭhin a ni tlangpui. Mizoramah chuan mi hausain an din tho a, a tam zawk hi chuan eizawnna bul ṭanna atan an hmang niin ka hria. Tuna hausa zui tate pawh hi school an din hmaa mi hausa an ni bik lo tlangpui a ni. School dinin an sumdawng a, an hausa ta a ni.

An hausak hi an thawhrim rah a ni a sawisel theih a ni lo. An hausak chhan zirlaite hmakhua an ngai zui lo a, an classroom chêp leh standard hniam em em hi an ngai pawimawh lo a nih chuan school neitute hi ka dem a ni. Hmun thengthaw zawk, space nei zawk Dur­tlang lamah Gospel Centenary School an insawn dawn tih ka hriat hian ka lawm a, ka fate kal ve phak lohna school ni mah se anni chuan an hausak chhan zirlaite hma khua an ngaiin ka hria.

Aizawla private school lian, a neitu hausa si, building chhe si, him si lo, infiamna nei lote hi inngaihtuah zui teh u, kan fate tana pawisa kan pek zat hi a tam teh a nia aw.