Mipuiin kan tuar nasa tawk tawh
Tunlai chu khawtlang leh pawl hrang hrang ten hnatlang kawng chhhe lutuk an siam thawm hriat tur leh an siam lai thlalak hmuh tur a tam leh ta hle mai. Ni e, Mizoram hmun tin maiah kawngpui a chhia a, hmun tam takah motor tlan hleih theih loh khawpin a chhia a, kan national highway kawngpuiahte chuan mipui mamawh phurtu truck-te an mu tak ngêt ngût a!
Kan Mizoram khawpui lah chu district khawpui dang zawng zawng ai pawhin tunah hian kawng a chhe zawk mek awm e. Kum dangahte pawh Aizawl khawpui chhunga kawngpuiah chhia a lo awm tawh ṭhin a, a bikin fûr laiin. Mahse, tunlai ang reng renga Aizawla kawng chhe nasa leh chhe tam hi ṭhangkhat lian zên zâwn chhungin a la awm lo hial mai thei. A chhe rualkhai hle a ni tawp mai.
Heti tak maia kawng a chhia hi fûr ruahtui tlak rei lutuk vang a nih ber hmel a, chu chu kan PWD Minister pawhin a sawi dan a ni. Fûr a rei a, kawng a chhe zual zel a, a siamtu lam tan mumal taka siam hleih theih pawh a ni rih lo. Hei hi chu mipui pawhin kan hrethiam.
Mahse, i'n ti teh ang, a bikin Aizawl chhungah, kawng siam dan pangngai ang taka siam theih a la ni lo chung pawh hian a chhe zual lai, khuar thûk leh zau zual laite hi chu alkatra hmang vak lo pawhin a hnawh mâm theih a ni. Kawng siam dan pangngai ang taka siama a tlo dan tur angin a tlo dawn lo tih chu hriat sa a ni; mahse, heti taka kawng khuar chhe nasaa Aizawl mipui, VVIP leh VIP zawng zawngte nen vek intlantir reng ringawt hi chu a dik lo a ni.
Bawngkawn kâwn kawng phei hi a chhe fo a, PWD lamin an hnawh mâm fo, a chhe leh thuai ṭhin, mahse, an hnawh leh mai ṭhin bawk. An hnawh hnuhnun ber, tuna kan rin tak rihah hian alkatra an hmang vak pawhin a lang lo, mahse, hei rin ai takin a mâm ṭha a, a daih rei ta phian bawk. Bawngkawn kawng phei ang deuh hian hmun danga kawng khuar chhe zual laite pawh a tih ve theih ngei tur a ni; kan hotute hian an duh phawt chuan. An duh loh vang leh tum loh vangin an siam lo mai zawk a ni.
Sawrkar hotu lamin sawrkar hmasa lama kawng an siam a ṭha tawk loh thu te, fûr khat pawh daih lova an siam thu te, thil dang eng eng emaw an sawi. A dikna chin pawh a awm ang. Mahse, sawrkar hmasa kha han mawhpuh ṭalh a ṭulna ka hre ve lem lo. Kawng chhiat chhan hi a hmaa an lo siam dan a ṭhat tawk loh vang a ni thei, fur ruahtui tam lutuk vang a ni thei.
A chhan chu eng pawh ni rawh se, tunah hian hmun tin maiah kawng a chhia a, siam a ngai a ni mai. Mipuite kawng ṭhaa an tlan theihna tura kawng chhia siam chu sawrkar mawhphurhna a ni. Sawrkar awm chhan a ni a, PWD awm chhan a ni a, PWD engineer-te awm chhan leh sawrkar aṭanga thlabi hlawh tam tak neia an awm chhan a ni bawk.
PWD Minister leh Engineer te u, mipui tana awm leh thawk in nih kha; ruah a la sur zauh zauh zel a nih pawhin, Aizawla kawng khuar chhe lutuk avang hian mipuite'n kan tuar nasa tawk tawh e, kan chau zo dawn, a chhe zual lai talte hi chu han thawm ṭha lul tawh teh u.
- Rinpuia Tochhawng