Langtlang sorkar

A kamkeuna

Lan tlang theihna (transparency) hi sorkar ṭha (good governance) innghahna bulpui (principle) ber anga ngaih a ni. Langtlang tih awmzia chu, ‘thu hriat insem leh inhawng taka thil tih’ tihna a ni. Zalen taka thu hriat theihna hi langtlang taka thil tih theihna atana thil pawimawh tak chu a ni. Transparency tih awmzia chu democracy ram pakhata mimal tinte hian sorkarin dan, ruahmanna, hmalakna, policy emaw thutlukna a siamte chu a dik leh dik loh leh an tan a hlawkpui em, tih enfiah emaw, fuih emaw theihna Right to Information (RTI) an nei tihna a ni. Hei hian inhawnna, inbiakpawhna leh accountability a keng tel a ni. Company, pawl, administration, leh khawtlang hrang hrangah langtlang tak leh dik taka thil kalpui leh mawhphurhna hlen a ni. Hei hian a tum ber chu Citizens’ Charter hnuaia sawrkar aṭanga mipui hnena rawngbawlna zawng zawng pek chhuah a nih theih nan a ni. Transparency hian hmasawnna ngaihtuahna leh rawtnate mipui hriattirna mai ni lovin, mipuite chu vantlang agency-te’n an ngaihdan ngaihthlak leh an thil ngaih pawimawh leh ngaihtuahnate chhan let an duh tih hriattirna a pe bawk.

A nihna tak chu

Langtlang sorkar hi sorkara thuruk leh hmalakna hrang hrang zêp ruk leh thup awm lova mipui hriata puan chhuah ringawt hi a ni lo. Transparency-in a tum tak zawk chu kha hmalakna kha ruahman lãwk ang takin a ṭhat zawng (quality) leh a hlut zawng (value) bakah, sum leh pai ruahman zat leh hun tiam (time bound) chhung ngeia peih a ni em, tih leh, a nih dan tur ang thlapa siam leh saka hman ṭangkai a ni em, tih hi a phawk chhuak zawk tur a ni.

Tuna kan awm danah hi chuan transparency a awm meuh lo niin a lang. A bikin sorkar department pakhat PWD hnuaia contract hna hrang hrang bikah phei chuan transparency a awm lo hulhual a ni lo’m ni a tih theih hial awm e. A chhan chu contract hna pakhat mi pahnih pathumin an lei chhawn ṭhin avangin plan & project (draft project report) ang thlapa thawh zawha hman tlak hmuh tur a vang hle. Open tender pawngsual, restricted tender pawngsual, departmental work pawngsual tihte leh Revenue Department hnuaia LSC/land lease lem, LSC inbuk thuah leh thil dik hlel chi hrang hrang sawi tur tam tak awm mekte hi a dikna chu a ni thei awm e.

ZPM ministry hnuaiah hian level hrang hrangah monitoring committee dina vil zui tura tih a ni nâin, a langtlang chuang lem lo tih chu a hriat theih mai awm e. Chuvangin, langtlang sorkarah chuan dikna leh rinawmna nen ruahman lâwk ang thlapin plan & project leh scheme-te chu kalpui a ni tur a ni.

RTI a langtlang em?

Right to Information (RTI) Bill hi Parliament of India chuan June 15, 2005 khan a pass a, October 12, 2005 aṭang khan hman a ni. India ram pumah sorkar aṭanga information hmuh theihna turin ni tin dilna 4,800 thehluh a ni. October 2005-a RTI Act hman a nih hnua kum sawm chhunga zirchianna hmasa ber neihah chuan dilna maktaduai 1.75 chuang thehluh a ni tawh a, hmun lia ṭhena hmun khat (¼) chu centre-a dilna a ni. Pending case nuai 3.2 a awm mek bawk.

He dan hman tirh aṭanga kum sawm chhung khan dilna 1,75,00,000 chuang thehluh a ni tawh tihna a ni. RTI dilna hmasa ber chu Pune-a police station-ah Shahid Raza Burney-a'n a thehlut. RTI Act chuan mimal chanchin chungchang leh mimal nun tichhe thei thil eng pawh pek tur a ni lo tih a sawi. RTI hian mimal chhiatna tur dil a phal lo va, mimal dikna chanvo a humhimsak tlat zawk a ni.

RTI chhanna chu a dik thei ang ber leh rintlak ngei a ni tur a ni a, dilna chu ni 30 chhunga chhan ngei ngei tur a ni bawk. Hetiang a nih lai mek hian Mizoramah chuan RTI chhanna fumfe vak lo leh rintlak vak lohte leh tihkhawtlaite pawh a awm nual ṭhin niin a lang. Hei vang hian Mizoram bika RTI-ah hian transparency a awm chiah lo niin a ngaih theih. Chuvangin, Assembly session-a zawhna leh chhannate pawh a taka thil thleng nen a inang lo fo niin a lang. Chutiang zelin mimal RTI zawhna tam tak pawh chhan fuh tawk loh a awm fo bawk niin a lang. Hei vang hian Mizoram chhunga RTI bikah hian transparency a awm chiah lo ni berin a lang.

Accountabillity tlakchhamna

Accountability chu mimal emaw, pawl emaw, sorkar emaw, a mawhphurhna thil nena inzawm, a hnathawh emaw, a nungchang emaw aṭanga teha rintlakna a ni. Mawhphurhna nen a inzawm a, mahse, enkawlna lama thlir zawk tur a ni. Lantlangna (transparency) hian mawhphurh theihna (accountability) a keng tel ngei ngei tur a ni.

Kan politician tam tak, kal tawhte leh tuna kan hrawn mekte pawh hian accountability an tlakchham avangin mipui rin an hlawh zo ṭhin lo va; a tawpah hminghliauna tam tak nen an thuthmun an chhuahsan a ngai leh fo. Sorkar department hrang hranga officer rual, NGO leh kohhrana hruaitute thleng pawhin accountability tlakchhamna hri hlauhawm tak hi kan vei tlang mek niin a lang. Chuvangin, langtlang sorkar hmel lanna pawimawh tak pakhat chu accountability a ni.

Eirukna laka fihlim

Eirukna awmzia kan hre tlang tawh. Sorkar development sum a hmanna tur ruahhmansa ang ni lova hman leh estimate amount aia tlem emaw, a aia tam emaw, a hmanna tur ni lova hmana tihpelhena leh khawihchingpenna hi eirukna (corruption) chu a ni. Eirukna tih thumal hi kum 1,300 lai vel aṭanga lo irh chhuak a ni a; Latin thumal, 'corrumpere' tih aṭanga lo piang a ni. Mizo ṭawng chuan–hlemhletna, thuneihhna hmansual, tibahlah, tiphirsi, rinawm lohna, thamna, inbumna, chet dan dik lo, a lema thil tih, hlep rukna, etc. Sawifiah dan tur tam tak a la awm thei awm e.

Eirukna hi hlawm lian pali-ah ṭhen theih a ni a; chungte chu–1) Mamawh leh duh inpek tawn vanga eirukna, 2) Dinhmun inthlauh vanga eirukna, 3) Dan pangngai leh dan ang lova eirukna leh, 4) Vantlang leh mimal eiruknate a ni. Tunlaiah ngat phei chuan zah pawh dawn tawh lovin ualau tak leh ngampa takin eirukna hi a rawn inlar ta a. A nihna takah chuan eirukna ni tawh lovin, a langa eina emaw, 'eilanna' tia a sakhming thlak hial chi niin a lang. Khawi kipah pawh eirukna hian kua a hreuh a, bu a khuar a, mi a rawn pawngsual ta chiam ni berin a lang.

Thuneihna hmansual

Thuneihna hmansual (abuse of authority) chu mimal pakhatin a thuneihna leh dinhmun dik lo taka a hman emaw, nawr luihna emaw hmanga a vilik ṭhin hi a ni. Chûng thil tihte chuan hnathawktu hnathawhna himna a tichhe thei a, an hnathawh ṭhat theihna a tichhe thei a, a nih loh leh an sum leh pai lama himna a tichhe thei a ni. Sorkar department inkhaidiat danah pawh thuneihna chhawng a awm thliah thliah lain, a bik takin directorate level-ah director tam takte’n an hnuaia officer hrang hrangte lakah inluling taka an thuneihna hmang sual ṭhin, hmang sual mek an awm avangin thawhhona a tichhia a; hna a chak lo va, officer lian ve tak tak office clerk lianpui anga ni tin pisa kaia pindan hrana thu zahawm ve satliah ringawt ṭhin, engmah ti thei si lo eng emaw zat an awm mek niin a hriat theih. Hetianga department director thuneihna hmangsual ṭhinte avang hian thawhhona ṭha a awm thei lo va, accountability & transparency a awm thei hek lo. Thuneihna mahnia pumhmawm duhna hian sorkar chak lohna a thlen mek a ni.

Hetiang a nih lai mek hian department hrang hranga concern minister-te hian thuneihna tenau zawng zawng thlengin department-a an thawhpui officer-te thuneihna chhuhsakin, thuneihna pumhlum an hum tlat ṭhin niin a lang bawk. Chu-a-chhapah staff transfer & posting hi an tuipui em em ṭheuh emaw tih tur a ni. MST bus ticket, silpaulin dilna, etc. thil te tham zawng zawng thlengin dik lo takin thuneihna an hmang sual ṭhin niin a lang. He tradition ṭha lo tak tun hma aṭanga ministry apiangin an hman ṭhin ang tho hi ZPM ministry pawh hian a la kalpui chhunzawm zel niin a lang.

Transparency government-ah chuan hetiang thuneihna hmansual hi awm tawh lo tura mipuiin an beisei lain, engmah danglamna a awm chuan loh avangin sorkar chak leh langtlang sorkar chu beisei chi rual a ni lo tih chu a lang chiang hle awm e. Sorkar official-te’n ṭha taka ministry an thawhpuia chak taka hna an thawh a duh a nih chuan ZPM ministry hian thuneihna sem zâi hi a hnuk pawimawh tak a ni tih hria se a lawmawm ngawt ang.

A tlangkawmna

Langtlang sorkar awmzia leh a pawimawhzia kan hre chiang ta. Ministry kal tate pawh khan huapzo sorkar, miretheite nu leh pa, rethei chhumchhiate dâwm kângtu tur angin an insawi chamchi ṭhin a; mahse, lalṭhuthleng an han luah chiah a, an thusawi ang an ni leh ṭhin si lo. Beidawng fuan khawm Zoram mipui zahna kawna kan din ngir khup laiin ZPM party a lo lang a; mipui tuihalna phuhruk turin ‘Mipui sorkar’ kan din dawn an ti a, mipui sorkar chu an han din ta a. An ziarang tur lang khawpin thla 8 lai an sorkar ta a; mahse, langtlang sorkar hmel erawh a vang kher mai! Inthlan hma khan mipui lakah intiam vak vak lo tal se a ziaawm tur. An tih tur an sawi vak vak a, an ṭawng an um pha leh si lo va; accountability & transparency an hnuchhawn leh si niin a lang.

Khawvela awm chhungin thil engkim tih dik vek sen a ni lo; Pathian tak chauh lo chu famkim tu mah an awm lo. Chutih rualin, 80% tal hi chu an ti dik thei tura ngaih a ni. Mizoram development sum 100% mipui tana kal ral tura beisei a nih laiin 30%-35% chauh mipuiin an chang ṭhin a nih hmel? Hetiang a nih chhung chuan langtlang sorkar hi beisei chi rual a ni lo.

Sorkar hian mipuite laka a tih tur ngaih pawimawh flagship programme a tlangzarh ziah a; mahse, an term chhunga tihlawhtling an la awm lo. Chuti a nih ahnekin an flagship programme 50% tihlawhtling sawi tur pawh an la awm ngai lo. Tunah pawh ‘bana kaih (hand holding) policy’ an sawi leh ta mek. Hei pawh hi kum 5 chhung hian 20% a hlawhtling ang em tih chu chhut tham tak a ni. ‘Science chu a tiha tih a ni’ tih a nih angin sorkar flagship programme pawh hi a hming thlak kual emaw, a hming sawia au kualpui vak vak ringawt ni lovin, a tiha tih a ngai. Chuvangin, tuna ZPM ministry hi a pawngapuia sawisel ringawt lo hian, Zoram mipui hian langtlang sorkar dik tak kan nei thei dawn em tih hi uluk taka chîk chungin, dawhthei takin i ngaichang chhin phawt teh ang u.

- Dr. C Lalrampana