Sikul kal tur dan hi ngaihtuah nawn se

Mizoram sawrkar chuan sikul kum thar, April 2015 aṭangin sikul ṭan hun a ti hma a, zing dar 8-a ṭan vek turin sawrkar school leh private school zawng zawngte a hriattir a. Mahse Mizo Students Union-te chuan duh lovin, sikul ṭan hma lo turin an ngen a, zirlaite sikul kal lo tur leh nu leh pate pawh an fate sikul kaltir lo turin an ngen a ni.

Sikul ṭan hma hi sawrkarin uluk taka a ngaihtuah hnuah chhan hrang hrang avangin ṭha a ti a, zirlaite bakah Mizo mipui nawlpuite'n kan ṭhatpui zawk turah ngaiin thutlukna a siam a nih hmel a. Mihring chu ngaihdan hrang nei kan ni a, sikul ṭan hma hi mi zawng zawngin ṭha an ti vek lo tih pawh a hriat. Mahse sorkarin mithiamte nen uluk taka a ngaihtuah hnua ram leh hnam tana ṭha zawk tura a ngaih a ni a; a pawmawm khawp mai.

Sikul chu i ṭan hma phawt mai teh ang u. MSU-te pawh a ṭhat leh ṭhat loh tur hre chiang bik si lova pawngpaw dodal nghal ngawt hi an tih loh tur an ti a ni. Zing dar 8-a sikul ṭan chu a tlem berah kum khat tal hmang tawh niin, chutah chuan ram leh hnam leh mipuite tan a ṭha lo zawk a nih chuan dodal se a âwm a, a hriatthiam theih ang. Chuti ni lova a ṭhat leh ṭhat loh pawh an hriat hma hauh leh, an rin thu vang ringawta duh loh bur nghal ngawt zawng, a zialo lam deuh e. A lehkhathiam tih chi loh deuh tlat.

Ka hmuh danah chuan, sikul ṭan hma chungchangah hian MSU-te hi an ṭang laklawh mai mai a ni. Nikum lama sikul ṭan hma rawtna thâwm a awm tirh aṭangin an duh loh thu leh sikul ṭha hma chu ṭha lo an tih thu nasa takin an tlangaupui a, an dodal zel dawn thu an puang a nih kha. Khatih lai kha chuan sikul ṭan hma an duh lohnaah an ṭang khawng viauin a lang.

Mahse, hun a kal a; media hrang hranga kan hmuh leh hriat danin, kumin March 31-a MSU-in sikul ṭan hmana tura sorkar thuchhuak copy Vanapa Hall kawta an hâlnaah MSU President chuan, "MSU hian engtik lai mahin sikul ṭan hma hrim hrim hi kan do ngai lo,' a ti a ni awm e. "A duh chuan zing dar 5:00-ah ṭan se pawi kan ti lo. Mizoram sikul tinte hian NCF 2005 Chapter IV-in a sawi angin sikula zirlaite dinhmun ṭheuh ngaihtuahin an tana ṭha ber turin kal mai se. Dana a inziah ang ngeiin sikul tinte thuneihnaa dah ni se MSU chuan kan duh a ni," a ti bawk niin media-te'n an ziak a ni.

Thil chiang ta chu, MSU-te hian a tirah sikul ṭan hma hi an duh lo bur a, tunah erawh chuan an duh lo bur tawh lo a, an dinna an thlâk tawh tih hi a ni. Sikul ṭan hma duh lo bur si lova tuna sikul ṭan hma an dodal tlat si leh, tuna an chhuanlam awm mekte ngaihtuah hian, MSU-te hian pressure group an nih angin thâwm neih an duh a, issue siam an duh a; an ṭang laklawh a, sawrkar dodal zawngin hma an la zui mai rih niin a lang!

MSU-te hi ngun takin inngaihtuah nawn leh se a va ṭha dawn em. Hei hi ka ngen ve duh: zirlaite hmakhua an ngai tak tak a nih chuan, tlâwmah la lovin, sikul kal tur dan te, sikul kal lo tura inngen ang chite hi titawp hram teh se. Chu chu an hmingṭhatna zawk tur a ni ang. Chuti ni lova an dodal reng chuan zirlaite an tibuai mai mai a, an dinsak zirlai, a tam ber chu naupang tê tê lehnghalte harsatna an thlen mai mai a ni.

MSU duty intite'n sikul kal lo tura an lo dang a. Zirlai naupang tê tê, sikul kal châk tak takte sikulah an han kal dawn a, thil chinchang hre ve phak si lote an hawihai lutuk hmel hmuhte hi an khawngaih ve lo em ni? Chuti chung chuan zirlaite hmakhua ngai inti ngam tur an la ni em?

A tawp berah chuan, zing dar 8:00-a sikul ṭan hi Mizoram mipui nawlpuiin pawi an ti lo a, an hreh lo tih a chiang. Chutiang a nih avang chuan MSU-te hi tuna an thil tih avang hian hmingṭhat phah chu sawi loh, an la intihmingchhe zawk thei tihte pawh lo ngaihtuah ve mawlh teh se.