AMC leh sumo stand sawnchhuah

Lalthutthleng inchuha an buai luih luih hnuah AMC chuan Aizawl khaw­pui traffic tawt lutuk tihziaawm nan rua­hmanna a siam a, chu a ruahmanna chu khawsaka harsa zawk, thingthlang mite har­satna belhchhahtu a ni. Ruahmanna mu­mal awm hmasa loin khawpui chhunga sumo stand te chu khawpui pawn lam, kawngpui zau laiah sawn an ni a, a tuartu tan a nghawng a na hle. Zing kara sumo chhuakte hi traffic jam siamtu an ni lo tia mipuite'n nasa taka Facebook lama âw an chhuah hnuah AMC lama an hotu pakhat chu Facebook kaltlang vêkin a insawifiah a, mahse a insawifiahna chu sumo service nei­tute sumdawnna dem­na lam daih a ni thung.

Sumo neitute'n stand thar an hmang duh lo a nih chuan an passenger-te chu an awmnaah an lam mai tur a ni, a ti a, Aizawl veng hranga hranga aṭanga khaw hla tak tak pan turte a ngaihtuah duh lo nge, sumo ser­vice-a sumdawngte a ngaimawh zawk tih hi ngaihtuah tham fe a ni. Zing kara sumo chhuak te hi office, school leh dawr kaite chhuah hmaa chhuak ṭhin an nih avangin 'rush hour' a traffic jam chhan an ni lo tih a chiang a, hetihlai hian chhûn, working hours-a khawpui chhung aṭanga sumo chhuak ṭhinte chu traffic jam siamtu an ni tih erawh phat rual a ni lo.

AMC-in khawpui pawn, kawngpui zau lai aṭanga khualzin tur a chhuahtir ringawt hi a ngaihtuah thui loh thlak hle a, khualzin tur emaw mahni khaw lama haw tur pawh ni se, inthiarnate, ei leh in tur, chakkhai lamnate miin an mamawh ṭhin a ni. Tuna AMC-in sumo chhuahna atana a ruahmanah hi chuan a zin turte mamawh chu sawi loh sumo dinna tur hmun awl a awm ṭawk a ni ber.

Eng pawh nise AMC thuneitute hian sumo stand sawn chhuahte a ngaiah a sawn vek thei lo a nih pawhin zing kar leh tlailama khawpui chhung aṭanga chhuakte hi a stand ngai aṭangin chhuahtir leh thei se a duhawm hle. A ṭul a nih chuan hun bithliah siamin, zing lama chhuakte chu zing dar 7 hmaa khawpui chhuahsan vek turin ti sela, dan khauh tak siamin, tlai lama chhuak ṭhin te tan zan dar ruk (emaw a aia tlai hretah pawh nise a remchan dan zelin) hnuah chauh stand a din phal tiin dan siam bawk se la, dan chu traffic police te nen khauh takin lekkawh se, mi harsate harsatna nasa takin a chhawk ngei ang.

Hetihlai hian khaw­pui a ṭhang a, mihring kan pun chhoh zel avangin khawpui a chep tulh tulh a, state pawn leh chhunga maxi cab service te hi khawpui chhung aṭanga chhuak reng thei an ni dawn lo. Hei vang hian kan sor­kar hian state pawn leh chhunga maxi cab tlante tan termi­nal mumal tak min ngaihtuahsak se la, chu chu nakin zelah Mizo­ramin tourism industry kan tihlen huna kan infrastructure mamawh leh hman ṭangkai tur a ni nghal bawk ang.