Written by
- Patrick Z
Chhingchhip
PI LEH PU DAN HUMHALH
Hman ni chu khaw pakhatah kum 70 chuang tawh, sorkar hna aṭanga pension mitthi vuina-ah ka kal ve a. Khual aṭanga vuinaa kal pawh kha kan ṭhahnem hle a, thihnaah hian chhungkhat laina kan kim thawkhat deuh ber
ṭhin awm e.
Mitthi vuina hunserh hi lumen a ni bawk a, an lo ti hma deuh a, dar 11:00am-ah ṭan a ni a, thlasik ni atan phei chuan a fuh viau mai. Mitthi hi MUP member a nih bawk avangin hunserh ṭan dawnah a vuitu chuan MUP lam aṭanga vuina hun hmang turin a ko ta a. A mitthi chanchin tlangpuite hun hmangtuin a sawi hnuah MUP-te invui dan angin a sun nan Darkhuang vawi sarih an tum leh a, mipui chu ngawi rengin kan lo ding a. He mi zawh hian hun neitu chuan a ralna sum chu mitthi kan sun mek nupui, ruang kil lai mek chu ko chhuakin a hlan ta mai a, a mak ngawt mai.
He mi zawh hian Civil Pensioner Association lam aiawh chu vuina thu sawi turin koh a ni leh a. Thu a sawi zawhah a ralna pawisa sum chu mitthi nupui, a pasal ruang bula ṭhu, lungchhe taka ṭap fap fap chu ko tho lehin, a hlan ve leh ta mai a!
Kan Mizo danah kha chuan ruang awm laia ralna sum hlante kha an duh loh leh thiang loa an ngaih a ni ṭhin. A mi nawlpui pawh hian hei hi kan la keng kawh ṭha viau a, ruang chhuah hnu hian khual khuaa hawng leh turte pawh hian kan ral hlawm zel ṭhin. Hetih laia kan Mizoram Upa Pawl, kan Mizo serh leh sang leh dan vawng him ber tura ngaih siin an bawhchhia a, ruang awm lai ngei maia an han ral mai khan min ṭhawng a. Kan hnam chin dan leh serh leh sangte vawng him ber tura ngaih siin a bawhchhe pawla an han tang ta mai hi a mak hle mai.
Upa Pawl member-te phei chu khawi lo han kal vak tur pawh an nih hmel tawh lo a, a tuk, thlannghah ni lamah pawh ral ta mai se a inhmeh viau zawk awm e. Pensioner Association member-te kha khual khua a mi pawh an ni si lo.
Mizo dan pela han che mai tur atan chuan an nihna nen a inhmeh lo a, an ral ngei a ni tih vuina a lokalte khan hre ve se an ti a ni mai awm mange a tih theih. Hei hian mitthi kan sunna lam aiin lansarh tumna, a kawk zawkah a ngaih theih.
Ruang chhuah hnu lamah ralna sum hi in hlan ṭhin ni se a ṭha hle awm e. Kan pi leh pute phei kha chu an puithu khawp a, khual aṭanga ralna inthawnte pawh an duh lo a nih kha. Kan pi pute dan leh kan Mizo dante hi a ral mai loh nana humhalh hi kan tih tur a ni a, Upa Pawlte lek phei chu Hnam Dan humhalh kawnga a meizang hlaptu ber an ni tih hriain fimkhur deuh tawh sela a ṭha hle awm e.